آنين الليل الاحمر.....
#الجزءالاول
#البارت_الرابع
.
ليلان العطواني ....القصه حقيقيه....
من طلعت من المدرسه نمشي اني وورده شفت سوسن وجماعته بالباب يباوعون عليه ويهزن بأيديهم استهزاء بيه اشتعلت نار وشطت اني هاي الفگريه ام الجرود تضحك عليه بسيطه ....
دخلت للبيت ماسلمت على اي واحد ركضت صعدت على غرفتي شمرت الجنطه وبدلت ملابسي لحگتني امي بصينية الغده بالبدايه رفضت بس بعدين من توسلت بيه اكلت ....
نزلت الصينيه وغسلت بين ما أريد اصعد سمعت سعاد تصيحني تعالي اخذي الفرشات شريهم ع الحبل ....
اني ضجت شيصعدني فوگ الطابق الثاني والفرشات ثگيله اهوووووو ياربي هسه الا تعصبني وتخليني اكفر بالهندي ...
بدون جدال اخذتهم وصعدت رفعت ثوبي من الجوانب ودخلت بالشورت وفتحت باب البيتونه ...
وإني اغني اغنيه عبد الحليم اهواك واتمنى لو انساك ...انتبهت شفت واحد دا يراقبني طالع راسه عرفته ماهر سويت روحي ممنتبهه بالعكس گعدت وادلع بمشيتي گدامه ...حتى بلكي يحس هذا المطفي صرت وره الفرشه الچبيره فتحت سحابة ثوبي حتى صدري يبين من ادنگ ع الفرشه الثانيه....
لاحظته رفع راسه اكثر وبده يباوع ....
اني شعلته شعل ونزلت عفته لان ادري بي استوه ع الاخر وصار نااار....
نزلت سمعت امي تخابر بالتليفون وتحچي عن عرس اني مهتميت رجعت على غرفتي گلت خل اشوف التلفزيون شطالع بي ....لگيت صور من المعركه ...غلقته خفت من صور الموته والدم ....
گعدت أقره جغرافية ...وشويه نمت فتحت التلفزيون لگيت فترة برامج الاطفال كارتون سندباد كيفت ...وبقيت اباوع عليه لليل امي صاحتني ع العشه ...نزلت گالت حضري نفسج تاخذين اجازه الأربعاء نروح على بيت عمتچ نوريه تريد تزوج ابنها قاسم ....
عرس هلا هلا حتى ارگص براحتي وادندن ومحد يگدر يمنعني ....بديت احسب اليوم الأربعاء ساعه ساعه ....وافكر شنو البس ...دورت بكنتوري ماكو ملابس جديده نزلت على امي توسلت بيها تأخذني للسوگ...
_يمه ماعندي ملابس شلون نروح للعرس ....
_ولج قبل شهرين اشتريتي ملابس ...شبسرعه تشترين مره ثانيه....
_يمه صارن قديمات وعيب تقبلين يعيبون علينه ....هنا دخلت سعاد ع الخط وگالت اني هم ماعندي ملابس يمه واريد تراچي ذهب من ذني الي يسموهن نخل السماوه حلوات ....
_ياااا هاي انتن شبيچن يجي ابوچن واگله وإذا وافق نروح واذا ما وافق تعتمدن ع القديمات.....
اني فرحت وكيفت راح اشتري ملابس جديده وراح اروح للعرس بالكوت ....هاي بمكان الفرحه فرحتين هلا وهلا ....
الصبح رحت للمدرسه ...صحت على ورده ...
_لچ شفتيها هاي شسوت البارحه ام الفگر الزباله ...
_اي شفتها وعوفيها عليه إلا اادبها واربيها
_ولچ راح اروح بعرس ابن عمي....للكوت....
_صدوگ شوكت حبابه اخذيني وياچ ...اريد اتونس...
_ولج تعاي وياي حتى نطبگ سوه ونرگص ....
_علواه امي تقبل چان رحت وياج بس اني اعرفها هسه ادگول شعندچ رايحه ويه الناس الغربه..
دگ الجرس وصار الاصطفاف ودخلنا للصفوف درس وره درس الحد الدرس الثالث كان شاغر دخلت المعاونه وگالت اريد اربع بنات يشيلن الكتب ..نريد نوزعها ع البنات كان اسم الكتاب الثوره ...گامت سوسن وعايده اني طفرت وندست ورده واحنه هم ست ....
اخذتنا ورحنا ع الاداره من دخلنا كانت الرواتب جايه ومخليها على الطبله بصف الكتب سوسن وعايده شالن مجموعه من الكتب وإني تحركت وصرت وره ورده والمعاونة ممنتبهه دخلت ايدي بالعلاگه وسحبت فلوس وبسرعه خليتهم بتنورتي .بالجيب.....
شلنا الكتب وطلعنا وزعناهم ع البنات ...دگ الجرس البنات طلعن يتراكضن على ام سلام الفراشه چانت تبيع كعكه ونساتل ....فرغ الصف طلعت الفلوس راويتهن ورده
_امممممم ولچ شنو ذني ....منين جبتيهم ...
_خل احسبهم وبعدين اگولچ منين جبتهم ...اي ذني سبعين دينار كله ابو العشر دنانير ...
ولج اخذتهن من علاگة الرواتب الي بالاداره ...
_صخام وشناويه تسوين بيهن كشفوچ تره اني معليه اخاف...
_دولي جبانه هسه اراويچ شسوي بيهم ....فتحت جنطة سوسن وما ادري بأي كتاب خليتهم ...وطلعنا بسرعه نركض ع الساحه واختلطنا ويه البنات....
من دگ الجرس اجت المديره صاحتنا اني وورده وسوسن وعايده گالت اوگفن ...انتن الاربعه دخلتن للاداره لكن قطعت كلامها وگالت وداد اگعدي ماما انتي معليچ ...گعدت وإني مبتسمه بفرحة النصر....
ورده عايده وسوسن انتن دخلتن للاداره وشلتن الكتب وكانت الرواتب ع الطبله گبالچن رجعنا حسبنا الرواتب لگينا نقص ومستحيل من البنگ لأنه حسبناهم وما كان اكو نقص ....
المطلوب هسه نفتش جنطكم ونشوف الفلوس اي وحده ماخذتهن ...طفرت ورده وگالت اي ست فتشينا ....هياتها جنطتي وكتبي ....بس عايده گالت ست ليش متفتشين جنطة وداد ....المديره سكتتها بزمخه وفتشت كتبها ما لگت الفلوس ....بعدها وصلت جنطة سوسن وطلعت الفلوس من كتاب الاحياء...المديره صفنت وأخذت سوسن وهي تبچي وتحلف ست والله مو اني بس المديره اخذتها للاداره ...وبعد ما شفتها....
ثاني يوم ماكو سوسن ما داومت ...بس المديره دزت عليه اني خفت شتريد مني ....
_تعالي ماما اگعدي ...اني البارحه ما ردت احرجچ گدام البنات لان اعرف انتي متبوگين انت بت عز وابوچ معروف بس راح اسألج مشفتي وحده منهم مدت ايدها على الفلوس ...
_لا والله ست اصلا اخذت الكتب وطلعت ....
_يعني مثلا وحده من البنات تكره سوسن وتريد تورطها...
_ما اعرف ست هي سوسن حبابه متسويها ست حتى لو اني وياها متعاركين بس سوسن متبوگ....
_شكرا ارجعي الصفچ.....من طلعت شفت المعاونه وست اكرام دخلن...بقيت اتصنت عليهن ...
_شوفي ام علي اني ما اصدگ سوسن تبوگ هي شاطره ومرتبه ونظيفه...مسويها حتى لو كانت فقيره...
_اني اگول هاي سوالف وداد بس شلون اجرجرها بالحچي خاف تروح توصل لابوها وتصيرلنه سين وجيم ....
_يااااا هاي شنو هاي بالله ...
_اي عيني مثل ما اگولچ هاي بت ابراهيم جلاوي هاي معروفه عائلتها ابوها حزبي چبير مدري ويه الحزبيه والرفاق والله يرفعون بينه تقرير وگبل بالأمن على ما نخلص ارواحنه اقل شي تلث شهور حتى نطلع....
_لا عيني اسكتن الفلوس ترجع والأبنية اعتذرت منها وانطيتها اجازه اسبوع من ترجع تكون نست السالفه وراحت ...
ولحكايتنا بقيه انتظرونا......الشكر لله....
