آنين الليل الاحمر...💞💞💞
#الجزءالاول
#البارت_السادس
ليلان العطواني ........
بعدها گعدت ورده تسألني عن ماهر وعن عائلته للعلم هي ساكنه ورانه وامها تعرف اهله بس ما اعرف ليش هشكل تسأل وتلح ... ومن تشوفني ما اعرف عنه معلومات تضحك عليه وادگولي شگد عوبه انتي ومابيچ خير صحيح هي اكبر مني بسنتين لان مخلصتها رسوب بس هي مو اذكى مني
بديت اشك هي تحب ماهر وتريد تعرف معلومات عنه وعن عائلته.....
بديت اسولف دائما عنه وعن امه وگوتلها امه تريد تخطبله وحده من الكليه .. هاي تخبلت وصارت عصبيه ....
_هاي شبيچ شوي تغيرتي وصرتي عصبيه...ما عرفنه منو تحبه اني انتي ...
_اي اني صرت عصبيه علمودچ اني شكو وأحبه ...ماعندي حب اني هسه افكر انجح والحب خليته الچ...
_مبين گمتي تعلچين بالحچي ...
_يا هاي شبيج وداد اصلا اني وين وهو وين ....اني ما أسويها عيب عليه ...
_شوفي ورده اني ادري بيچ متحبيني وتمشين وياي لان اني انطيج ملابس واكل وفلوس وساكته عنچ ...بس ياويلچ اذا شفت تركضين وره ماهر ...لاتگولين وداد ما گالتلي....
_ياا هاي شبيج يعني اذا اسألچ عنه تشكين بيه هاي شجاچ ..
_والله اني حذرتج وقد أعذر من انذر....
_هاي هيج صارت تهدديني مو صديقتج من الابتدائيه وتعرفيني...بس مدام صارت هيچ هاي هي انتهت صداقتنا .. .
_بعد احسن ..
بعد ما ورده قطعت علاقتها بيه ضجت حيل بس ما بينت لان هي صديقتي من زمان ودائما تساعدني فكرت اروح اصالحها بس هي عافتني ومشت ....قررت اروحلها للبيت .. .واراضيها يوم الجمعة....
ورده كانت ضامتلي ضمه وإني غافله عنها وممحسبه ورده راح تأذيني بهشكل وإني كنت اكبر مغفله.......
يوم الجمعة گلت لاختي سعاد اريد اروح العصر على بيت ورده أراضيها بالبدايه هي مقبلت بس بعدين گالت اني اخذچ لو ساجد يوصلج ...اني فرحت لان حيل محتاجه ورده لان اگدر اسولف وياها سوالف هواي وخاصه ما اگدر اسولفها لاختي ....
صاحتني امي اجيبلها الثوم من المخزن فوگ السطح ...صعدت لگيت باب البيتونه مفتوح باوعت شفت ماهر يفتر فوگ اخذت الثوم من المخزن ورحت للسطح بحجة اشوف الملابس خاف واگعه بالگاع ...هو من شافني باوع شويه ودنگ ...بعدها رفع راسه وشمر طابوگه زغيره عليه ملفوف بيها ورقه ....
اني ركضت اخذتها ونزلت ع السريع لان امي خبصتني بالصايح ما لحگت ادخل غرفتي حتى أضم الورقه دخلتها بالستيان وضميتها ودگمت ثوبي....تعلمتها من الأفلام الحركه........
_ولچ هو ثوم وين صرتي راح صوتي وإني اصيحچ...تبقين فاهيه...
_يمه يافاهيه شبيج اصلا خنگني ...المخزن كله ريحة ثوم ...
_لا والله يايمه فاهيه وميفيد بيج اي تعلوم....
_هاي شبيج يايمه ...
_اسكتي وتعاي ساعديني مابقه وكت اريد اكمل الغده...ابوچ على جيه...
_صار يمه .....
اشتغلت ويه امي وغسلت المواعين من اجه أبويه گعدنا نتغده وبده يسألنه عن دراستنا واحد واحد ومن السؤال يمي گوتله اي بابا اني زينه بالدراسه چان يخزرني نشف الدم بجسمي وگلي اني كلشي اعرف لا تتوقعين نايم الچ بس هاي السنه اذا منجحتي ابن عمج حاضر للزواج افتهمتي ...
اني من الخوف سكتت لان ادري راح يضربني اذا جادلته بحچايه ....
خلصت غده ع السريع وصعدت على غرفتي نسيت رسالة ماهر فتحت التلفزيون وگعدت اباوع على استراحة الظهيره واضحك على أمل طه ومحمد حسين عبد الرحيم ....
اجت سعاد صاحتني ادخل للحمام اسبح گتلها بالليل لان اريد اشوف فلم قبلني في الظلام مال هند رستم لان احبها واشبها ودائما اقلد حركاتها ....
_اي عفيه لاشغل ولا دراسه بس افلام واستهتار ...گومي اسبحي لا اصيح ماجد عليچ...
_لاحبابه سعاد كلشي ولا هذا الأرعن بس اشوف شويه الفلم والله اسبح....
_يااا ولج وتاليها راح تخبليني ...شنو هالحب للافلام ....
_سعاد والله بس شويه حبابه حبابه.....
سعاد قبلت اكمل الفلم ...واسبح بس امي متقبل اسبح الغروب لان ادگول مو زين ....اني اصلا ممهتمه كل همي اشوف الفلم .....
من طلع الفلم طلعت لقطه حلوه مال هند رستم ترگص بيها اني رأسا لبست ثوبي المشلتح وگعدت ارگص مثلها بس نسيت نفسي ....وخليت صوت التلفزيون عالي ....ماحسيت الا الباب اندفعت ودخل ماجد يصيح عليه....
_ادبسزز سافله حقيره متستحين صايره من الكاوليات بس ترگصين ولج شلون الچاره وياچ.....
_ولي معليك بيه لتدخل افتهمت....
_ولج ويامن هذا الحچي هاااا
_وياك انت الادبسزز كافي خنگتني ...يلا اطلع لا اصيح...
_لا بالله صيحي خلي يسمع ابوچ ....
كلمه مني على كلمه منه لزمني كفشني من شعري وصيح عليه الگحبه الساقطه ام الافلام .....
اجت سعاد خلصتني منه ....بس بعد ما انتهيت على ايديه ضربته قويه مسمومه....
ولا ادگول عمره بعمري ضخم وجسم قوي ...صاحت بي سعاد وطلعته بره وإني استلمتني بذاك الحچي المعدل كله مواعظ ونصائح بس اني ما مهتمه ردتها بس تخلص....
من عافتني اخذت ملابسي وبچيت شويه ودخلت للحمام
من نزعت الستيان وگعت رسالة ماهر ....اتفاجأت وحمدت الله هم زين ما طاحت وشافها ماجد چان ذبحني هذا الخبل ...
من شفت الرساله ...لگيت كاتبلي بيها اريد اشوفچ اليوم بالليل ...بس ذني الكلمتين ....لزمت الرساله مزگتها وكملت سبح وطلعت من الحمام ....
محتاره اروح لا ....هاا خاف يكشفوني اهلي وتصيرلي فضيحه ...لا لا منو يدري اصلا من ينامون اصعد ومحد يدري...
وللقصه بقيه انتظرونا .....الشكر لله
