غدير : ( سمعت صوت احد صعد ع الدرج فتحت الباب شوية و باوعت وشفت عفراء متجهة لغرفة مرتضى ... مرتضى ميحب الشغلة العوجة لان هو مغرور ... واني اكره عفراء لذلك اتخذت قراري ودفعتهة ورحت ختلت بالدرج اباوع ... )
عفراء : ( ماعرف منو دفعني بس حسيت نفسي وكعت اني و الصينية و ثنيت رجلي وكعدت بالكاع الم بالاماعين المكسرة جان ينفتح الباب وطلع مرتضى كبل ضربني راشدي اني انقهرت كلش لان ضربني واني مسويتلة شي ... حطيت ايدي ع خدي وباوعتلة ) حقير ... بعد لا تمد ايدك علية ترة تصير غير شي (نزلت راسي وبقيت الم بالگزاز و احجي علية بصوت ناصي) گبر شكد ميستحي ... صاير زلمة براسي و هو خواتة يفتارن وية الولد ... صدك ساقط...(دااحجي وماحسيت الة مرتضى شال گزازة و ضل لازمهة بيدة ويحرك اصبعة فوكاهة)
مرتضى : (كاعد بالغرفة ما حسيت الة اصوات اشياء تتكسر كمت طلعت شفت الفصلية مكسرة المواعين ضربتهة راشدي ع اهمالهة بس هية ماسكتت ضلت تدردم علية مسكتت الهة وردت اخوفهة كعدت بصفهة وشلت گزازة بيدي بديت احرك اصبعي عليهة و باوعت بعيونهة مباشرة ) اذا تبقين هيج ماعتقد رح تعيشين يوم واحد
عفراء : (ابتسمت بأستهزاء ورفعت راسي وگتلة) انتة من كل عقلك معتقد اني خايفة منك ؟؟
مرتضى : (جريت ايدهة بكل قوتي وحطيت الگزازة ع وريدهة ) وانتي معتقدة اني ماگدر اكتلج واخلص منج ؟؟
عفراء : (جر ايدي حاولت اتقاوة ويا بس ملخ ايدي حيل بكل قوتة وحط الگزازة ع ايدي) واو .. صاير زلمة ؟؟ .. اذا انتة گدهة سويهة بس اذا بعدك جديد ع لزم شي حاد فأنصحك تعوفهة لان اخاف تنجرح (ضحكت علية ) كافي سوالف زعاطيط صير زلمة و لو مرة بحيات... (مكملت كلامي جرحني بكل قوتة اني گبل حطيت ايدي ع الجرح لان ضل يجري دم )
مرتضى : (تجاوزت هواي ... نتفتني نتف ... محد مسمعني هيج كلام من قبل نرفزتني جرحتهة وضليت لازم ايدهة علمود متحط شي عليهة و توقف النزيف هية ضلت تتقاوة وياي وتحط ايدهة ع الجرح و ادفعهة ... الى ان اغمة عليهة يلة عفتهة ) بديتي الحرب وياي ... تحضري للهزيمة .. (كمت من يمهة وحطيت الگزازة فوك جرحهة .. داانزل من الدرج شفت غدير واكفة ع صفحة .. صحت عليهة ) شعندج هنا ؟؟ واكفة شماتة ؟؟
غدير : (دااباوع عليهم صدفة صار مرتضى كبالي ... اني توترت كلش) ها ؟؟ اني .. اني ..
مرتضى : (قاطعتهة بصوت عالي) عود الفصلية صديقتج وانتي جاية تتفرجين عليهة و تتشمتين .... (انطيتهة ظهري ) وحدة اتعس من الثانية شورطني وياكم (نزلت عليهم جوة لكيتهم يباوعون تلفزيون ويضحكون ... صحت عليهم ) شنو هل الاهمال ها ؟؟
تغريد : (تعجبت من مرتضى لان يصيح وكمت وكفت يمة حطيت ايدي ع شعرة وبديت احرك بأيدي ... بس هو فاجأني ودفع ايدي ) ابني .. حبيبي .. شبيك ؟؟ وبعدين شبيهة ايدك كلهة دم ؟؟ منو ضربك ؟؟ الفصلية ضربتك ؟؟ اليوم اذبحهة (رحت واريد اصعد بالدرج كلي)
مرتضى : يمة شبيج ؟؟ اكلتيني اكل ... الفصلية فوك كلشي مابيهة
مهند : (تعجبت من كلام مرتضى ساعة يكول اهمال ساعة يكول كلشي مابيهة و فوك هذة عصبي و يصيح و ايدة كلها دم ... بس لمن دفع ايد امة صرت عصبي لان يتجاوز عليهة رحت علية وصيحت ) انتة صاير عاق ... وطايح حظ ... و ادبسز .... (حطيت اصبعي ع راسة ودفعت راسة بأصبعي) حط ببالك اني هسة بأستطاعتي اطردك من البي.....
مرتضى : اطردني محد لازمك ... لا تعتقد اني بدونكم ماكدر اعيش و جاي تهددني.... (دااحجي جان يضربني راشدي )
مهند : (ضربتة راشدي لان كام يتجاوز )احترم نفسك واتأدب يا عديم التربية ... استحي ع نفسك ... حالتنة المادية مو زينة وفوك كل هذة خليتك تكمل دراسة بأرقة مدارس و كليات و حطيتلك افضل مدرسين و افتاريت بغداد كلهة علمود ادورلك ع تعيين بمستشفى زينة و واتزوجت بنية شريفة والحد هسة لابسة عبايتهة ومستحية من عدنة وفوكاهة بدون مقدم و مؤخر .... لك الشباب يتمنون يصير عدهم فلوس علمود يتزوجون وانتة زواجك ع البلاش صار ومتحمد ربك
مرتضى : ( صرت عصبي لان جاب طاري الفصلية ) اني رافض الزواج كلياً وانوبة تزوجني فصلية ؟؟
مهند : صحيح فصلية بس تبقى زوجتك
مرتضى : لا زوجتي و لا بطيخ ... اني رح اخليهة تندم لان وافقت بية بالعقد
مهند : لك ابني اسمعني ... البنية موافقت اصلاً بس انجبرت توافق وبعدين اذا متحبهة ومتريد تتقربلهة حط فاصل بيناتكم لمن تنامون
مرتضى : واساساً منو كال هية تنام بغرفتي ؟؟
مهند : تنام وغصباً عليك لان هية زوجتك
مرتضى : (بكل عصبية ) شگيت حلگي بكلمة زوجتك ... يابة اني ماحبهة وماريدهة و لا رح اعتبرهة يوم زوجتي رح ابقة اعتبرهة طول عمري عدوتي وموتهة يصير ع ايدي
تغريد : (فرحت لمن كال هيج) اي عفية ابني عفية
مهند : (صحت ع تغريد ) ولج يا مرة شنو عفية ؟؟
تغريد : (اتخوصرت) اي عيني عود ليش دتدافعلهة ؟؟ معيشتك ؟؟
مهند : اني مداادافعلهة حباً بيهة بس هية تبقى زوجة ابنج
غدير : (جنت واكفة بالدرج اسمعهم بس صارت السالفة زايدة ولازم اتدخل ونزلت گتلهم) بابا لمن خلص العقد و انتة رحت نمت وراهة بدقايق عفراء سبتك وغلطت عليك
مهند : (اتعجبت لان مبين عليهة فقيرة ) مستحيل !! ...
غدير : بكيفك بابا تصدك او ماتصدك انتة ممجبور
مهند : يلة كافي روحوا تفرقوا ماريد اشوف وجوهكم
مرتضى : لحظة ... وين رفل اشو اليوم مشفتهة ؟؟
تغريد : تعشت وطبت تسبح
مرتضى : هاا ... ماشي ... اني طالع يم اصدقائي
مهند : ابني الساعة ب8 بالليل خلي طلعتك ع باجر
مرتضى : لا يابة السالفة مهمة لازم اروح بسرعة
مهند : خير شصاير ؟؟
مرتضى : عود لمن ارجع اسولفلكم هسة مستعجل اريد ابدل واروح
مهند و تغريد : الله وياك
مرتضى : (صعدت الدرج و وصلت للغرفة باوعت جان اشوف عفراء ماكو ... حجيت بيني و بين نفسي ) عار ميصيرلهة شي شبسرعة كامت وهية هواي نزفت...
( فتحت الباب و دخلت لغرفتي جان اشوف.........
أنت تقرأ
ظلم فصلية (متوقفة)
Roman d'amourقصة فصلية مختلفة عن باقي القصص واقعية جدا باللهجة العراقية "كيف ستتحمل العيش فتاة عصبية لكنها خجولة نوعاً ما وعنيدة مع شخص مغرور ومتكبر ولايطيق وجود النساء بقربه "