ذنب بلا ذنب

15

☆ ذنـــــــــــبٌ بـــلا ذنـــــــــــب ☆

الـكـاتــبــة #نـــازك_الــبــور ✎

" ₁₅ الــبـــارت الـخـامـس عــشـر ₁₅ "

جنة : هذاك الاستاذ .. هذاك الاتفاق 

نشف دمي بجسمي .. يتذكرني ... عرفني

بروف عوني : الـ جذبني الها مو بس شدة جمالها .. لا و السانها الحلو .. تحسها جبل و واكف يطلب .. الجبل همين يسال السما عن المي ..

حجيت وياها كالتلي اني بالمدرسه طالبة .. اريدك تجي بمدرستنا تصير معلم الي .. ضحكت و كلت الها لا بابا ميصير شتكولين لو انتي تجين يمي من تكبرين .. كالت لي ميخالف اتفقنا ..

رغم اني عقدت الاتفاق وياها .. بس جنت منطي امل للاتفاق ان يتم بنسبة 1 بالمية ..

بس تدرون شنو صار ..؟

يكولون المعجزات راحت ويا زمن الرسل

بس هي اثبتت انو لا زال زمن المعجزات ليومنا هذا ..

جنة : ماحس غير بس دموعي نزلت وية كلامه ..

بروف عوني : التقيت بيها باحد اقسام كلية الطب .. لو بيدي اني اكعد باستولها و اخليها تقوم مقامي كـ بروف بالطب
..

العظمة ماتعرف عمر .. و لا اصل و لا فصل .. مو الشهاده و الاصل و العمر يصنع العظمة ..

داخلكم يصنعها مثل ما صنعت عظمتها هاي الطفلة المشرده ..

العالم كله مشرد و هي بوكفتها .. بتسولهاا .. بركضتها ورا الناس .. بهدومها الممزقه .. بحفوو رجليها الصغار .. بكعدت امها وراها بالشارع .. بقسوة العالم و الحياة عليها ..

هي القوة و العالم مشرد .. هي العز و العالم ذليل ..

عظيم اني من اصنع من الماكو اكو .. من افرض ذاتي ع الحياة لو شيصير ميصير .. من الحياة تحكم علية بالذل و اني اذلها ..

عشتوو العاشته هاي الطفلة .. لاا

و انتو بحياة كريمة و عز و توصفون العلم بالضغط و التعب .. ماريد اصنع منك طبيب تشيل صدريتك البيضه و ترفع راسك كدام الناس و تتباهى ..

مداصنع منك انسان مغرور تتعالى ع الناس بشهادتك الطبية .. انت خادم و المعلم خادم و المهندس و المحامي و و

ناخذ الشهاده حتى نخدم مو حتى ننظر للناس بعين صغيرة والله شنو فلان عامل و اني طبيب؟؟؟  لييش ..؟؟ هذا يا علم علمك هذا المبدأ

العلم للخدمة .. مو للتعالي و التباهي

اني من دنطيك علم ماداصنع غرورك .. داسلمك ارواح بيدك .. مسؤولية تفتهمون شنو مسؤوليتكم .. ارواح ناس .. اتعبوا و ابحثوا و اتعمق اكثر بعلمك بحب و شغف .. و اذا مو كدها غادر الطب .. الطب مامتوقف عليك و مراح يتوقف ع احد ..