بيت بطرف الدربونه ولمة زلم ونسوان وهلاهل على رأي اهلنا( تجيب التايه ) ...زفه على الربل وصلت وطشوا الجكليت وطلعن الحبايب والجارات يهنون ويباركون ل(قاسم)على زواجه الثاني بعد ماطلك زوجته لاولى لان مصار عدها اطفال طول السبع سنوات الي عاشوها سويه ....العروسه (سميرة)اختارتها ام سعيد الحفافه بنيه شاطره وسباعيها ومطالع صوتها حالها حال كل بنات المنطقه ....
صاحت ام سعيد بعد مانزلت العروسه من الربل ...
دخلي يمه برجلج اليمنه يلا قاسم مدوا رجلكم وكلبوا نجانت المي حتى يدخل الخير وياها ويرزقكم الذريه الصالحه بحق النبي ...واني الصبح اجيب ام سميره واخواتها ونجيكم الضحى ..تصبحون على خير .
رد عليها قاسم وهو طاير من فرحته بعروسته الجديده وتشكر منها ونطاها فلوس تجيب الكيمر والكاهي وتجي قبل اهل سميره تعزل البيت ......
طلعوا النسوان وزلم بعد ما كملت الزفه وسد قاسم باب البيت وتوجه لغرفته.. بيته زغير عباره عن غرفتين وحوش ومطبخ وحمام بسيط لكن جدد الاثاث بقنفات جدد للحوش وغراض مطبخ جدد على حساب العرس ولازم العروس كلشي جديد حتى يفك النحس والله يرزقه بالولد هيج كان تفكير قاسم ..
دخل قاسم على عروسته سميره وكال ..
السلام عليكم ورحمة الله .. ردت عليه بكل خجل وحياء .وكامت من جربايتها و وكفت ..وعليكم السلام ابو محمد ...
يسمع منج الباري نورتي بيتج ..رد عليها قاسم وهو فرحان بيها وخاصه من كالتله ابو محمد لان هو هيج كان يسمونه بالمنطقه حتى بدون مايصير عنده ولد ...كعد على طرف الجربايه و طلب من سميره تكعد يمه ...وبدأ يوصيها ..
اسمعي مني عيوني سميره لان هذا الكلام راح تسمعينه مني مره وحده بالعمر ..اني رجال على كد حالي كافي خيري وشري عن العالم واظن ام سعيد مسولفتلج عني وعن اطباعي وراح هم ازيدج حتى من اجي للبيت او اريد شغله ما اظل مشلوع كلبي اريد كلشي حاضر ...اني شغلي وطلعاتي ويه تجار الغذائيه بحسب اني ابيع طحين وتمن (رز) وبقوليات يتحتم عليه ملابسي دوم مرتبه ونظيفه وجنطة سفري جاهزه وملمعه وهذيج الخانه من الكنتور خاصه لملابس السفر وغراضي واوراقي ماريدج تلعبين بيهن تغسلين الملابس وتسفطيهن واني اجي ادخلهن بالخانه واقفل عليهن ...هذا شي والشي الثاني ماحب المره الي تسولف للرايحه والجايه هيج بيتي وهيج رجلي هاي الشغلات واسوالف النسوان تطير البركه وتجيب علينا عين العالم اني حتى نسوان اخواتي واخواتي ماريدهم يعرفون عن حياتنا شي ...والاكل والمسواك اجيبه الج كل يوم خبز وصندوق المخضر يوصلج لباب المطبخ واهم من هذا كله الصلاه والقرآن والحجاب كدام اخوتي وحتى كدام اهلج هذي ما اوصيج عليها ومصرف مخصص الج كل شهر انطيج لو كل سفره تضميهن الج ليوم عازتج ولو اني ماراح اخليج معتازه غير رضا ربج فيا بنت الناس هذا العندي وهذي حياتي يعجبج تشاركيني بيها حياج الله مايعجبج مراح اجبرج والج عندي اردج لبيت اهلج معززه واني اطلع كدام العالم بيه الصوج وما حويتج ....
كل هذا الوكت وسميره تسمع لقاسم وقوانين حياته وشنو يحب وشلون راح تعامله ...بعد ما خلص كلامه وخيرها بين عيشته لو ترجع لبيت ابوها كامت على طولها وباست ايده وهو باس راسها وتمت ليلتهم على خير وسعادة .ومن وقتها حست انو قاسم هو زوجها وابو بيتها وسندها الي يحرص عليها اكثر من نفسها ..مر شهر على زواجهم ودز قاسم على ام سعيد حتى تكشف على سميره لان لازمتها الدوخه وتتاخر بالنوم مو مثل قبل ...وصلت ام سعيد ودكت الباب على سميرة .
توقعاتكم للقصه 🙂
