مشت الايام عاديه لحد شهر رمضان وصيف حار ...
افتحت الباب علينا العصر جان ابويه قاسم دخل للهول (وهاي اول مره يفوت داخل البيت كل مره يكعد بالاستقبال )
اجيت سلمت عليه وماما سلمت وكعدنا
قاسم..وين الولد ..
ناديه..بالسوك شويه ويجون ..
قاسم ...خير ان شاء الله..
صار قريب المغرب وابويه كاعد ساكت وامي كامت تحضر الفطور لان راح يبقى ويانه .رجعوا الولد تفاجأو بوجوده ..
قحطان ..خير يمه عنده الحجي هنا ..
سميره ...اشششش ليسمعك يمعود ..احنه كاعدين وطب علينه ..
عدنان ..خاف متعارك ويه الخاتون ...
قحطان ..ولك انت تظل فطير هاي الخاتون بابا الخاااااتون شحده يحاجيها حجايه مو يعاركها ..
سميره ..يلا يمه توضو حتى نصلي عوفونه من السوالف ..
كملنا صلاه وصبينا فطور كعدنا لاول مره كلنا على سفره وحده حتى بابا ياكل ويباوع علينا اكو سر غريب بعيونه .
اجى جدو وبيبي ورى الفطور كعدوا يمنا وسوالف عاديه ونقاشات على الوضع واحوال الناس ...
صار قريب نص اليل ..
سميره ..يمه عدنان هاك هذه افراش روح مده لابوك هسه نعس ..
عدنان ..صار...
تعال حجي مدد على فراشك لوتنام جوه بالغرفه خاف ماتعرف تنام بالكاع ..
قاسم..لا بابا مده وين مجان ..
عدنان..حجي نكعدك على السحور ...
قاسم ..اي قبل السحور حتى اصلي كم فرض ..
طلعت من بيتنا ورحت يم هيومه ..
ناديه..سلام عليكم .
هيومه ..هلاووو وينج اليوم صدك ابوج هنا ...اشو ما له صوت راح لبيته ...
ناديه ..علكيفج عيوني ويايه ههههه
لا موجود نايم ...
هيومه ..وج اجه قدري وراد يشوفج من سمع ابوج هنا بطل ضل يفتر بالحوش ...ومشى ..
ناديه ..يااا غير تجين تصيحيني ...عابتلج ..
هيومه ..يمه الحب يمه هو مكال صيحيها شعليه ...يجوز خاف من ابوج وانهزم ...ههههه .
ناديه ..لا عيني قدوري ميخاف ...
يلا اني ارجع خاف امي تحتاجني ..
رجعت بحسرتي حتى سحور ماكلت زين لان مشفته لقدوري ..
صبح الصبح كعدنا لكينه ابويه قاسم طالع من البيت ...
سميره...وينه ابوكم شوكت طلع ..
قحطان ...يمكن قبل السته اني سويت نفسي نايم هو لبس ملابسه وطلع ...
عدنان...يلا يلحك يرجع للبصره قبل الظهر حتى ليصير عليه افطار ...
سميره بحصره...الله وياه هم نعمه شفنا وكعدنا واكلنا ...
اوف يايمه كل هذا الي يسوي وبعدج تحبينه ...سولفت بداخلي ..
قرب العيد وتحضيرات وتعزيل وامي صار عدها الخياط اضعاف متلحك مرات اكعد على المكينه بدالها اني وهيومه ...
اخر خميس برمضان اجه قحطان كال عمي عبد الكريم جايه للمحل وراح يمر علينه ورى الفطور هو وعائلته ...
صدك دزت امي على جدي وبيبي واجه عمي وزوجته ورفيف وابنهم خالد ..
اني مشايفته لعمي سلمت وكعدت ..التفت عليه خالد ..
شلونج نداوي مبروك على النجاح ..ان شاء الله تكونين احسن معلمه ..
ناديه ..الله يسلمك ..
ام ناديه ..بلكي ياعمه تقنع تريد تصير استاذه بالمعهد ..
خالد ...عفيه سباعيه احسن الها عمه لتخافين عليها ..
ام خالد قربت على سميره ...عيني خلي نروح للهول حتى ناخذ راحتنا ..
ام ناديه ...من رخصتك ابو خالد اخذوا راحتكم اني اخذ الحبايب واجيبلكم الجاي ...يلا يمه يلا ام خالد تفضلي ...
