طلعت ام سعيد من الغرفه ووجها مستبشر خير وكانت امها لسميره واكفه يم الباب بإنتظار البشاره ...
سألتها لام سعيد ...ها داده بشري اكو حمل ؟؟
ردت عليها ...ان شاء الله اكو كولي يارزاق .
رفعت ايدها على فوطتها ام سميره وكالت يارب يارزاق ارزق بنيتي الذريه الصالحه يارزاق ..وشالت مبلغ وخلته بيد ام سعيد ..
صار العصر ورجع قاسم والفرحه مبينه على وجه لةن ام سعيد رايحتله للمخزن مالته ومبشرته وحتى تاخذ البشاره منه ..
الله يساعدك ابو محمد ☺
رد عليها هلا بإم محمد الغاليه منا وجاي لتعبين روحج بالبيت اني وصيت ام سعيد تشوفلنا وحده تساعدج بالبيت ..
ردت سميره ليش ياعيني تكلف على روحك هو انه شعندي وامي تمر عليه لو وحده من خواتي تساعدني ...يلا ارتاح وانزع ملابس الشغل حتى تنتظر للصلاه راح بإذن الغروب ..
دخل قاسم لغرفته مثل العادة فتح باب كنتوره وبدا يخلي فلوسه ويسجل بدفتره الوراد مال المخزن ...طلعت سميره من المطبخ وسألته شتحب نسوي عشى اليوم ..
ردعليها اليوم وصيتلج على كباب و روبه حامضه واعرفج تحبين الريحان وياه شويه ويجي صديق (صديق العامل مالته وأمين على المخزن ينام بي )جايبهن ...يلا بويه توضي وتعالي اسمعي مني القرآن (سميره لا تقره ولاتكتب بس تحفظ بسرعه من يقرأ قاسم تتوضه وتكعد يمه تسمعه شلون يقرأ )..وفعلا كعدت سميره تسمع الى ان اذن وصلو المغرب سويه وبعدها وصل العشى جابه قاسم من صديق وكله ...ليش يا صديق غير تاخذ عشاك منه ؟!!
رد عليه ..عمي انه خبزه وتمرات وروبه كافيات عليه وعود نص اليل اسويلي قوري جاي وخبزه لو جعت ..
لا لا ما مقبوله منك ياوليدي اوكف هسه اخلي خالتك تسويلك عشى وتاخذه ...
دخل قاسم للحوش وصاح بويه سميره سوي ماعون كباب وطماطه مشويه وخضره وخبز وجدر ديري بي روبه لصديق خطيه حرام علينه ناكل ونعوفه ...تأمر ابو محمد يجرالك ...راحت وسوت صينيه مثل ما طلب منها ووصلها للعامل بالباب ....
بعد العشى كالتله ..ابو محمد اريد اطلب منك طلبه واذا مالك واهس خليها تولي ماريدها ...
انتي تأمريني عيوني سمره 😍
اريد اروحن لبيت ابوي من تزوجت ماشايفته ولامارني حتى خواتي واخواني اشتاقيتلهم ولسوالفهم ..شتكول نروح هسه ..سكت قاسم ...رجع كاللها حقج بس ما نتأخر لصلاة العشى نكوم ...فرحت سميره من كل كلبها لان ما طالعه من يوم دخلت بيت قاسم ركضت لبست ثوب جديد وحجاب مثل ماعلمها وطلعت عبايتها بين ما قاسم غير ملابسه وطلعوا لبيت عمه ابو سميره ...وصلوا وتفاجأوا بيها صايره حلوه ومربربه على كولة عطوفه اختها ...بيت اهل سميره على كد حالهم صح ابوها عنده محل واخواتها يشتغلون بحمام السوق بس مو مثل قاسم وثروته .. ماعدهم تكبر على الناس بالعكس كل الطرف يحبهم ويحترمهم ..بعد ماكعدوا بيت اهلها شويه وصاح اذان العشى باوع قاسم على ساعته وكال لعمه...
من رخصتك عمي انه عندي طلعه الصبح للحله تدري موسم تمر لازم اشرف على البضاعه .. بلكي تصيح سميره حتى نرجع لبيتنا .
ركض مناضل اخوها الزغير يصيحها لبست عبايتها وباست ايد ابوها وطلعوا بالباب كالتله عمته ام سميرة ...يمه ابو محمد ليش ما تخليها عدنا دام تسافر للحله ؟؟؟خطيه خواتها متشوقات لسوالفها ...
دار قاسم على سميرة كأن يكوللها ليش خليتيني بهيج موقف 😤عاد هي دنكة بالكاع ..جاوب عمته ...يمه اني ما مانعها من جيتكم اذا تريدين خلي البنات يجوها الصبح هي كل يوم لحالها من الفجر لحد العصر ...هلا بيهن خواتي واعز .
رد عليه ابو سميره ...يدوم عزك وليدي هم ما متعلمين عليها بعيده عنهم هسه يتعلمون يا بويه وصد على مرته ونظر إلها بعين الغضب ...يلا بويه توكلي ويه رجلج طلعهم رأس الشارع وهم كملوا طريقهم للبيت ..طول الطريق قاسم ساكت ويزفر ويعوذ من ابليس انقلب واحد ثاني فتح باب البيت ودخل ودخلت وراه سميره محتاره ليش هيج صار بي صاح عليها سميره رايح اصلي بالجامع وارجع ارتاحي انتي ..
الله وياك ابو محمد ...
طلع وهي اخذها التفكير يعني شيصير لو تبقى عند اهلها ليله ليش يزعل 😣...
تأخر قاسم برجعته للبيت وسميره بعدها نفس ملابسها وعباتها على القنفه يمها تنتظره خايفه وحدها لان هو من العصر يدخل البيت مايطلع لثاني يوم لصلاة الصبح ما معلمها يطلع باليل ويتركها ...دخل قاسم بعد ما صعد الكمر لنص السمه (يعني تجاوزت الساعه العشره واكثر )..تلكته سميره بلهفه ..ليش هيج عفتني بهذا اليل وطلعت ياعيني 😢متخاف عليه ...استاحشت بالظلمه وحدي
رد عليها ..
لعد شلون تردين تعوفيني وحدي وتباتين عند اهلج انه هم استاحش مثلج ...
انه مارحت بعيد واكف ورى الباب بالدربونه واسمع صوت خطواتج يم الباب بس ردت اعلمج درس مايتكرر نومه عند اهلج ماكو نروح ساعة زمن ونرجع امج تكول اختج تريد تكوليلهن ارجع ويه رجلي صار معلوم ...سحبها من اذانها بكل عصبيه ...هي بقت مصدوه صدك هذا قاسم الحنين العطوف الي قبل ساعات يدور حلال وحرام هيجي نقلب حاله ...دخل قاسم وسد باب الغرفه حيل هز السكوت الي يلف البيت بذيج اللحظه دخلت وراه غيرت ملابسها وصعدت على فراشها وهو داير ظهره ونايم كأن هي ما موجوده يمه بقت تمسح دموعها بالسكته تخاف لايحس عليها ...لكن هو يعرفها تبجي سكته بقى يصارع ويلوم ويه نفسه ليش هيج سوى وياها ومد ايده عليها ماتستاهل منه هذا التصرف ...بقى بحيرته وعصبيته الى ان اذن الصبح كام لصلاته بدون ما يصيح سميره مثل عادته يوميه تصلي وراه ..لكن هي كاعده طلعت ثوب الصلاه وتوضت ووكفت تصلي ...بعدها دخلت المطبخ تسوي جاي واطلعت السله تاخذ منها البيض تسلكه للريوك ...طلع قاسم للحوش صاح .سميره ..سميره طلعت وكفت كدامه عيونها وارمه من البجي وكالت ..
أمر ابو محمد ...
تنهد قاسم كاللها كوليلي قاسم ...
ابتسمت ابتسامه رفيعه ..مايجوز اصيحك باسمك ...
لا سمعيني حبيت اسمع اسمي بحلكج 😍
أمر ...قااسم ..ردت عليه وهي خجلانه ماكايلتله باسمه من قبل ...
سامحيني يبعد روح قاسم 😘باسها من راسها وهي انفجرت بالبجي بحظنه كأن طفله فاقده حنان امها ...وهو هم ضل يتعذر منها ووعدها ما تطلع عصبيته عليها طول عمره ..طلع لسفرته للحله وبهذا اليوم وصلت اخته( كريمه خاتون )من البصره حتى تبارك زواجهم هي وابنها وزوجها (رحمان افندي )...
كريمه خاتون تختلف عن خوات قاسم لان هي سافره بلا عبايه او حجاب وزوجها رحمان موظف بالطابو بهذاك الزمان طانت وظيفه كبيره ومميزه ودخلها عالي لذلك هم ثرائهم وحالتهم كلش زينه وماتحب تجامل او تغض البصر عن شي تقصير او شي ما يعجبها ...صار زواجها من رحمان عن طريق قاسم لان هو صديقه ويخلصله معاملات بالميناء مال البصره وياخذ عمولته من تجار بغداد وهيجصارت القسمه )نرجع لبيت سميرة ...
اندكت الباب وصوت ربل وكف بالباب ...ظلت سميره حايره منو اجاها وقاسم مسافر ...الى ان سمعت صوتام سعيد صاحت افتحي يوم الباب اني ام سعيد جاكم خطار يمه ...
لبست عبايتها وفتحت الباب ودخلتهم لكن هي متعرف كريمه سامعه بيها ماشايفتها سلم عليهاابو سامر (رحمان)
وعرفها على نفسه ...
اهلا اختي اني ابو سامر زوج حماتج كريمه وهذا سامر ابني .. زواج مبارك الله يرزقكم بالذريه الطيبه ....
ردت عليه هلا بيكم خويه نورتوا بغداد ..شلونج ام سامر الحمد لله على سلامتكم داده ..
ردت عليها كريمه بتعجرف وتكبر ...اني كريمه خاتون ماريد تكوليلي ام سامر ...الله يسلمج ..قاسم وينه ؟؟
تعجبت سميره منها لكن ام سعيد تلاحكتها وكالت ...تفضلوا داده استريحوا جاين من سفر تعبانين ...شويه ونحطلكم غده اهلا وسهلا بيكم ..
لا ما جوعانين ..وينه قاسم ؟؟
جاوبت سميره ..ابو محمد سافر للحله للعصر يرجع ..ارتاحوا هن..
قاطعتها كريمه ...لا عيوني اني رايحه لبيت فاضل افندي (اخوها الكبير اكبر من قاسم )ولليل نجيكم نشوفه ...
ردت ام سعيد هلا بيكم خاتون تشرفونه انتي والبيك ...
طلعوا والربل ينتظرهم بالباب صعدوا ورجعت ام سعيد لسميره الي بعدها مستغربه كمية التعجرف وتعالي الي عند كريمه ...
يمه يمه هذه سعلوه مو مره حشا والله هذي تصير اخت ابو محمد لا لا مامعقوله ....
ضحكت سميره بطول حسها كأن ام سعيد هيج كالت حتى تضحكها ...خاله شراح نسوي عشى للجماعه شنو يعجبهم اني ما معاشره الخوانم والبيكوات فدوه دبريني 😐
خاله سهله هذوله يحبون نواشف مشاوي فاكهه وكهوه مو مثلنا خبزه ونحمد الله ونشكره هذوله يكومون ماخلق الله كدامهم وينكنكون منه والباقي يعوفونه ....
يااااا خاله وين ابو محمد يقبل بالتبذير والله يسويها عليه طلابه شكبرها ...
لعد انتي دبري روحج بالموجود ومن يرجع هو يتصرف وياهم يلا اودعناج يمه ...راح امر على صبيحه تجي تظل عندج خاف تحتاجينهاللعشى تساعدج ..
اي والله تسوين فضل عليه ..
طلعت ام سعيد وبقت سميره تقلد مشيت الخاتون وحركت ايدها وكعدتتها وتحجيويه نفسها ...عيني اني سميرة خاتون ...ماريد تكوليلي ام محمد ...وتهفي بيدها جذب على اساس مهفه من خشب كانوا الخواتين يشيلونها بيدهم ...
ياااا شجاج سميره تخبلتي تسولفين ويه روحج ...
صدك كون هنه الخواتين يخبلن الواحد حتى رجلها البيك فاك حلكه عليها ناثره شعرها ولابسه الفستان المورد المكشكش لعد مثل حالي حصره عليه طلعت الدربونه 😏...
رجع قاسم محمل ما لذ وطاب من تمر وحلويات وكرزات وفاكهه فوك الي عنده بالبيت دخل على سميره وصديق واكف بالباب يخلي بالاكياس من الربل لباب البيت ...كمل تنزيل وسد الباب وصاح سموره سمره طلعت تلكته كأن ماشايفته عمر 😙😍...الحمد لله على سلامتك عيوني...الله يكثر خيرك ..بس شدعوه هيج متسوك مفرغ السوك 😄
...اسمعي سموره ..
اليوم اخوتي يجونه بعد صلاة العشى زين حبيبه ماريد شغله ناقصه او قاصره من هسه تحضرين غراضج وتعزليين البيت ومفارش جدد جبتلج من الحله ومدايد مثلهن اريد اليوم تبين عروستي وحبيبتي شلون سباعيه وشايلتني وشايله بيتي ....🤗
بقت سميره صافنه😐متعجبه وعيونها لتلمع اول مره يسمعها هيج كلام صح مبطن بأوامر لكن نزل على كلبها احلى من العسل 😍😍....
تابعوا شراح يصير بالتعلوله ..احداث هامه علقوا على القصه خلي نشوف ارائكم ..ولاتنسون التصويت 🌹
