أذن العشى ودخل قاسم يصلي والبيت كان يزهي من النظافه والترتيب وطبعا صبيحه وسميره ماقصروا بالترتيب وياهن قاسم يوجهن على الترتيب وشلون يصير التقديم ....يجوز تستغربون ليش هيج مهتم بأدق التفاصيل ...
لان قاسم هو الوحيد من اخوانه الي بقى محافظ على بيت اهله وساكن بي والباقي من اخوانه صاروا افنديه وبيكوات وتوسعت تجارتهم وغيروا سكنهم لمناطق راقيه وجديده ونسوانهم مثلهم صارن خوانم وعدهن خدم وحشم الا هو بقى على طبع امه وابو وطيبتهم لذلك خوانه قليل يمرون عليه للبيت حتى هو ماعنده اولاد اوبنات حتى اولاد اخوانه يجونه لذلك يحس بنفسه اقل منهم من هذا الجانب واكو نقص بحياته لازم يكمله وهذا كان سبب طلاقه من زوجته لاولى ....
طلع قاسم بعد ما كمل صلاته وصاح ...سمر سموره
ردت عليه من باب المطبخ ...أمر ابو محمد جايتك ...
روحي حضري حالج والبسي ذهبج كله وخلي صبيحه تساعدج اريدج اليوم تطلعين خانم ووصيها هي تقوم بالضيافه ممنوع تكومين على شي سمعتي بويه ...
صار ابو محمد مثل متريد ...صبيحه تعالي عمج يريد يكلمج ..
.اجتي صبيحه واتفق وياها على التقديم والضيافه.... سوت كهوه وجاي وتمر بصحون زغيره وخلت كلشي بغرفة الخطار (الغرفه الثانيه )بعد ما رتبتها وفرشتها جديد ...ودخلت ويه سميره تساعدها بالبس ...
اكول داده سميره ...ليش متلبسين هذا الفستان المطوب احلى وخلي شعرج شويه نازل وربطه بلونه تطلعين كمر ..
ردت عليها سميره ...بس هذا نص ردن وخايفه ابو محمد مايقبل لان افوت اسلم على خوانه ونسابته راح البس كوستم العرس هم حلو وجديد مالبسته غير من طلعنا للكاظميه بيوم السبعه ..
ولبست سميره وتعدلت بانتظار الخطار...شويه وسمعوا صوت الربلات بالباب واندكت الباب فتح قاسم واستقبلهم بالترحيب الحار والعتب لان كاطعين زيارتهم اله من زمان ...
دخلوا الزلم للاستقبال واخذت سميره حمواتها ونسوان حموينها للحوش وكعدت ترحب بيهم وتتعرف عليهم حماتها الجبيره (ام محمد )عايشه بديالى عدها ولدين بالكليه العسكريه وواحد يدرس طب بتركيا ..والثانيه (ام زهران )بالصويره هم رجلها عنده بساتين واملاك وعدها ولد وبنات بس ما دارسين ...
والاخيره كريمه خانم ( ام سامر ) عدها سامر وسندس متزوجه بالبصره وسامر اصغر من اخته بسبع سنوات ..بدن يسألن بسميره وشلون عرفت قاسم .كالت الهن ...
اني ماعرفه ولا شايفته بس اهلي يعرفونه وام سعيد تعرف امه الحجيه الله يرحمهاوابو الحجي وابويه كال خوش زلمه وصارت القسمه ...
كالت ام محمد ...بالخير عليكم حبيبه منه المال ومنج العيال صيري سباعيه وجيبيلنه الولد خلي نفرح ..وطلعت من جنطتها تخم ذهب وخلته بيدسميره كهدية زواجها ...
ومثلها سوت ام زهران هم تخم ذهب وباركتلها على الزوج واتمنت الهم الذريه الطيبه ..
الا كريمه بقت ضامه الهديه بصفها على القنفه ...وكالت يعني دوارة حفافه مبين هذا الزواج من عنوانه ....
طلع ابو محمد وسلم على خواته وشكرهن على جيتهم ..عاد كامت كريمه وسلمت عليه وانطته تخم الذهب وظرف بي مبلغ جان كاللها هذي هديه العروس اني شعليه انطيها الها يا ام سامر ..دارت على سميره ونطتها الهديه من غير متباركلها مثل ماسون خواتها ورجعت تسولف لاخوها عن البصره وشغلها والخوانم وبنات العوائل الي بيها ..
والله يا قاسم لو اعرف الك نيه تتزوج مره ثانيه جان اختاريتلك خاتونه تلوكلك ادب ونزاكه ورزانه وتقرأ وتكتب حتى تركي تسولف ...هسه انت شنو غيرت عن زواجك الاول 😎تسولف وتباوع لسميره صفح ....
وسميره مدنكه لكن تفور من الغضب ...
رد عليها قاسم ...كريمه اني مايرهمني الخوانم لو اريد بيوت بغداد مليانه وهم باشوات وخوانم ابا عن جد لكن اني ماترهمني غير الي مثلي ويني وين الخوانم 😅..استمر بالضحك ورجع لغرفة الخطار وبقت سميره وام محمد تسولف وياها وتتعرف عليها اكثر حتى عزمتها تجي يمها للبستان كم يوم تشتم هواء نظيف ....كريمه طول الكعده تذب حجي وتصغر بسميره وهي ساكته احترام لزوجهاالى ان جابت صبيحه الجاي وقدمت الهن عاد كالت ...شنو بعدج عروس مو صار شهر وفوكه من تزوجتي لو تردين تتعلمين شلون تصيرين خانم ...ليش متقدميلنه انتي ...
اخذت الصينيه وقدمتلهن الجاي وكالت انتو من الاعزاز والي يتكبر مايتكبر على اهله ...كملت التعلوله وطلعوا كلمن لبيته ..بعدها لملمت البيت وراح قاسم وصل صبيحه بعد ما حطتلها سميره صوغه لجهالها من كرزات وحلويات وفاكهه وقطعه قماش الها تقدير لمساعدتها ووكفتها ...
رجع قاسم ولكه سميره طاكه من البجي سألها شبيج سموره ياساتر يوجعج شي
سولفيلي ...
ردت عليه بعصبيه ...اذا احنه مو من مستواكم ليش اخذتني جان اخذت خانم تلوكلك وتكدر تكعد ويه الخوانم وتعرفلهن ..تعرف تكشخ وتكتب وتقرأ اني فقيره شجابكم عليه ...
رد عليها ..اني لو اريد خانم جان اخذت منيلج هذا الكلام ...
هذا كلام كريمه اختك طول التعلوله وهي تذب حجي وتقلد ليش اخذج شلون عرفج ابوج شنو يشتغل وغيرها ...تالي تريد تخطبلك وهي جايه تباركلي بزواجي اخرها تصيح عليه لان ماقدمتلها الجاي ليش شنو بدر مني تجاها😢😢
سكت قاسم مثل العاده ميقدر يتصدى لكريمه لان اخته وانعادت نفس المشكله القديمه مثل ما كانت تعامل زوجته الاولى وميكدر يردها ....
تحولت هذيج الليله الى نكد وعصبيه على قاسم وسميره مما اضطره ياخذ مخدته وينام بالحوش على القنفه لان حس انه مايقدر يحمى مرته من كلام اهله وخاصه كريمه وعقدت النقص عنده بدت تصيطر عليه ...
كعد للصلاه وتبعته سميره سوتله ريوكه وطلع من غير ما يسولف ولا كلمه ...رجعت قفلت الباب وراحت تكمل نومتها وماحست الا للضحى والم بطنها ما ينحمل وهي لحالها بالبيت بقت تلوب من الالم لحد ما سحلت روحها لباب البيت ومدت راسها اكوبنات وولد يلعبون صاحت واحد منهم واجى عليها ...كولي خاله ..وليدي روح لبيت ام سعيد كوللها بيت قاسم ابو محمد يردون بسرعه ....راح الولد يركض يصيح ام سعيد ...سميره تعض على ربطتها من الالم وبقت كاعده بالمجاز والباب مفتوح شويه .لان مابيها تكوم تقفله من الالم واجتي ام سعيد ظلت تسمي وتعوذ من الشيطان يمه عين ال ماصلت على النبي شجرالج يمه شو دساعديني اخذج للغرفه وصاحت على الولد يروح لبيت ابو سميره يصيح امها ويخبرون قاسم بدربهم ....اخذتها ام سعيد ومددتها بفراشها وغطتها بلحاف وهي تصيح بردانه فدوه دفيني بعد طلعت ام سعيد غطى ثاني وشمرته عليها بهل الاثناء وصلت ام سميره تنوح وتدعي لبمتها يمه بنيتي شجرالج شبيها ام سعيد جاوبيني ...؟؟؟؟
مادري شكلج داده بس سموره طارحه الطفل 😢
هاي فورتلها دارسين وبابونج تشربه هسه تدفى وتنام ..والله يعوضها بالاحسن عين عين وما صلت على النبي ...
وصل قاسم للبيت وجه اصفر ويسأل عنها شبيها سموره ...
جاوبته ام سعيد ..الله يعوضك يا يمه بالاحسن منه ...سميره طرحت الطفل واللي رزقك بي يرزقك بغيره لدير بال ...
صبر عليها وتصبر بعد خالتك ..
تركها ودخل سميره تون من البرد وصاكه على ربطتها وامها يمها تفرك بضهرها وتبجي على حال بنتها ...
الله يعوضكم الاحسن يا يمه مامقسوم اللكم ...مارد على عمته ام سميره ...
دنك على زوته وباس راسها وطلع سأل ام سعيد شنو يجيب حتى يخفف المها لسميره كالتله على شغلات من العطار يجيبهم ومعلاك مشوي وكرفس حتى تعوض الدم الي نزل منها .... مشى قاسم بلا وعي بالدربونه ........
راح حلم قاسم بالولد 😢😢
تصويت حتى تصعد القصه 🌺🌺
