كعد قاسم يشرح لزوجته عن المؤسسة وشنو شغلها وشلون ورود دايرتها وبنفس الوقت فاتحه تجاره وتسافر على طول لمصر وحدها ....
حست سميره وهي تسمع قاسم بأنكسار وخيبه داخل نفسها يعني هي لو متعلمه ومتثقفه كان صارت مثل ورود لكن حضها قليل مثل متكول ام سعيد من تسولفلها على بنات البشوات شلون عايشات حياتهن وحتى هي احلى وانزك منهن وعقدت عزمها الا تكون ناديه متعلمه ودارسه حتى تكون قويه مثلهن ....
مرت اشهر وقربت ولادة سميره ...قاسم مستمر بزياراته للبصره يقضيها بين البستان ومقابلة ورود الي بدأ حبها يكبر بكلبه وهي ترتاح لشوفته ..ومرات تعاتبه اذا طول عليهم ومازارهم ....هويحاول يوصللها مشاعره ويعرف ان هذا الشي راح يسبب مشاكل خاصة في بيته بغداد مع زوجته لكن هو انطه لنفسه العذر اذا تزوج ورود راح تبقى بستان البصره وسميره بغداد ....
فد يوم دخل قاسم للمؤسسة وهومقرر يعزم ورود على المطعم حتى ياخذون راحتهم بالكلام ...فعلا قبلت بعد اصرار وملحه من قاسم تطلع وياه لوحدهم ....
اخذها قاسم لمطعم على الشط وكعده حلوه بي ورود فضلت يكون خارج الولاية تخاف احد من معارفهم يشوفها ويفتهم الشغله غلط ..
قاسم ...ست ورود ماكو داعي تخافين او تنحرجين من كعدتنا ...احنه بينا شغل وقبل كل شي احنه معارف مو غربه ...
ورود ...صح ابو ناديه لكن الناس متعرفك انت بغداي مو من البصره واني صح متحرره واطلع وارجع براحتي لكن احنه هم تحكمنا تقاليد واعراف مجتمعنا وخاصه بالبصره العشائر قبل البشوات يحكمون ...
قاسم ...اعتذر مره ثانيه لان خليتج بهيج موقف ...بس صدكيني اني قاصد خير وو.ما احب الف وادور ...انتي عرفتيني شنو وتعرفين اختي كريمه ودخلتي لبيتي وشفتي زوجتي ام نادية مره بسيطه متعرف من الدنيا غير النعم والحاضر كل همها ترضيني ودور راحتي لكن ....
ورود ... اني مستغربه صراحه ليش تكول لي هذا الكلام ...وانتم فعلا ناس محترمين وخلوقين وام ناديه حبابه وطيبه فوق متصور ...
قاسم ...الصراحه اني انعجبت بشخصيتج واخلاقج العاليه واريد اتقدملج ....
اني ماريد غير موافقتج ومراح ابعدج عن البصره واهلج بستاني حاضر والببت جاهز بس انتظر موافقتج ....
ورود ...هاي شنو ابو ناديه شلون تقبلها اني دخلت بيتك واكلت وشربت ويه زوجتك تالي اخذك منها ...لا قاسم افندي ترى انت متوهم ...
قاسم ..ورود اني ماريد جواب هسه ولا باجر فكري زين واني موجود وراح انتظرج لو لاخر العمر ...ورود اني حبيتج من كل قلبي اني طريق البصره بغداد متحمله وكاطعه كله علمود شوفتج ...تدرين كريمه صارلها هنا اكثر من تسع طعش سنه اني بهذيج المده لو مرتين لو ثلاثه جايها وهي اختي واني دبرت زواجها من ابو سامر ....هسه صرت من اشتاقلج احس مختنك اروح احضر جنطتي واركب القطار واول ما انزل بباب المؤسسة اشوفج من بعيد يلا يبرد كلبي حتى ايام امر اشوفج من بعيد وافوت داخل اريد اخبرج بحبي واخاف ترفضيني ...ورود انتي فتحتي عيني على غير دنيه ...انتي الورود بس الي تتفتح ...احبج يبنت الباشا احبج....
