تغيرت حياة قاسم بعد ما سقطت سميره طفلها الي ماكمل شهرين من الحمل صار اغلب وقته بالمخزن او يكعد ساكت ...
سميره هم عانت من الاسقاط اكثر منه بسبب الم الاسقاط وخيبة الامل الي حاطت بيها صارت مثله او اكثر منعزله عنه حتى مرات متكعد وياه بالحوش مثل مامتعوديين ....
اقترحت ام سعيد على ام سميره ياخذنها لمقام خضر الياس وتشعل شمعه وتخليها بالنهر لطلب المراد وتطلع من حالتها النفسييه ...راحن على قاسم للمخزن حتى ياخذن الاذن منه بروحتهن للزياره ..قبل قاسم يرحون ..
اخذن سميره بعد صلاة الظهر حتى يبقون وقت اطول وتغير نفسيتها من تشوف الناس والمقام وطلعن لزيارة الكاظميه وتعشوا هناك كلش ارتاحت سميره لطلعه وخاصه الكعده على دجله وعلكت شمعه خلتها بالمي لطلب الذريه ....
رجع قاسم بعد صلاة العشى للبيت طانوا هسه راجعين من الزياره سلم ودخل لغرفته ...راحت سميره وراه تشوفه اذا يريد عشى كاللها ...ماريد شي ما اشتهي بس سويلي استكان جاي ..طلعت امها وام سعيد لبيتهن وهي راحت حضرت الجاي وجابته شرب منه وكاللها عندي سفره للبصره يجوز ابقى اسبوع او اكثر
اذا صارت اقفل البيت وانتي روحي لاهلج ...
تفاجأت سميره من كلامه شعنده بالبصره جاوبته ...زين خلي اروح وياك اشوف البصره وشط العرب ...شدكول !!
جاوبها بعصبيه ...اني مرايح اتونس عندي شغل ...راح انزل بيت اختي كريمه ..يايوم تسافر حتى احضرك الجنطه ...
مامعلوم يجوز هذا السبت لو الي وراه ...
حضري شغلات السفر والجنطه من باجر ...
دخل نام وسميره مارتاحت لسفرته بقت تسولف لنفسها ليش يبقى اسبوع وينزل بيت كريمه ماكو فندق لو خان ينام بي ....
راح الصبح لشغله ودقايق ورجع يركض فتح الباب وصاح سموره يابه ...بسرعه وين الجنطه ولمي غراضج حتى اوصلج لبيت اهلج ...
هي واكفه باب المطبخ متعجبه عليه ليش هيج فرحان بالسفره ولاكأنه قاسم الي طلع معبس وجهه من الصبح ...
يلا بويه شجاج راح يجي الربل ...
فزت على صوته وبسرعه ركضت حضرت ملابس السفر وشغلاته واخذ فلوس وياه ..يلا وين ملابسج طلعتيهن ...
لا اني اروح وراك بعد وكت هسه ..
شلون ماكو هسه يلا حطيلج لبستين تلاثه بسرعه اريد اقفل البيت على ايدي اني انتظر بالحوش ....
سحب جنطته وطلع خلت سميره دشداشتين وربطه ولبست عبايتها وطلعوا قفل الباب وصعدوا بالربل نزلها باب اهلها فتحت امها الباب ...تعجبت شبيهم من الصبح جايين ...
خير يمه قاسم بيكم شي !!
صباح الخير عمه ...طلعتلي سفره للبصره يجوز اطول اسبوع اكثر وجبت سموره تبقى عدكم من ارجع اخذها ..
يا يمه هلا بيك وبيها الحبيبه ...فوتوا جوه احطلك ريوك ..؟؟
لا عمه اريد الحك القطار ... اودعناكم وسلميلي على عمي والولد ...في امان الله ...صعد وطلع بي الربل للمحطه ...
دخلت سميره وامها البيت وهي عبالها تحلم شبي هيج متلهف للسفر ...
يمه روحي نامي بغرفة خواتج بعد وكت ارتاحي ...
سميره ..يمه ...
ها ...ا ي ..
شبيج يمه شجرالج !!؟
ماكو يمه بس قاسم فرحان بالسفره واخذ فلوس هوايه وياه وراح ينزل عد كريمه اخته ؟؟؟
شكو منها غير عنده تجاره وبيت اخته موجود ليش ينزل بفندق ....
ليضل الشيطان يلعب بدماغج ...قاسم خوش رجال ...روحي روحي ..
للظهر رجع ابوها للبيت سولفتله امها شلون اجه قاسم وسميره وخبرته بشكوك سميره وتغير زوجها عليها بعد ماسقطت طفلها ....
حجيه لتخليين الوسواس يدخل بكلبج قاسم ماعنده زايده ناقصه خليها ترتاح عدنا ويه خواتها اني ماعجبني تبقى وحدها من ذاك اليوم شفتي شصار بيها بيوم التخربطت جان راحت من ايدنه واحنه مندري ...!!
وصل قاسم للبصره ونزل بفندق ماراح لبيت اخته للصبح راح على مكتب زوجها وسلم عليه ...
يا اهلا بقاسم حياك الله ....شنو هاي المفاجأه ...
الله يسلمك ويحيك ابو سامر ...البارحه وصلت عندي شغلات وبضاعه بالميناء انتظرها تجي و كلت امر عليك اشوفك ...
هاي شلون ترهم ياقاسم بيت اهلك بالبصره وتنام بفندق لو تسمعك ام سامر تنيمني وياك بالفندق 😀...
يابويه بيتكم عامر باهله واني مامطول اسبوع ثلث ايام وارجع لبغداد ..
لا هسه نخلص شغلك ونروح للفندق ناخذ غراضك وتسكن عدنا ...
بكيفك يابه ...
رجعوا للفندق اخذ جنطته وطلعوا لبيت كريمه خانم ....
دخلت سياره ابو سامر للبيت ...بقى قاسم منبهر بيت اخته الحديقه الواسعه والمدخل الكبير واشجار الحمضيات والنخل على طول المدخل والبيت وسط البستان ...
ماشاء الله ابو وسام ...بيتك يفتح النفس ويشرح الصدر..
الحمد لله هذا البستان اخذته قريب على الشط ومعزول حتى جيرانه بستان بيت فيصل باشا هذوله مايجون بس بالشته وبس الفلاليح بالبستان مالتهم بالصيف يعني مثل متكول ماكو احد يزعجك ولا تسمع صوت غير بس العصافير والبلابل ...
يابه صدك جنه بالخير عليكم ...
دخل للصاله استقبلته كريمه الي مستغربه هذه الزياره ...شعجب ياقاسم اليوم فرحت البصره بجيتك ياخويه ...حمد لله على سلامتك ..
الله يسلمج كريمه خاتون ...
اشو وينها سميره مو وياك ...
لا ..لا اني اجيت بشغل وهي عد اهلها ..
ليش شصار جان جبتها وياك تشوف البصره ...
ياخويه هي تعبانه صار مده من سقطت طفلها مو حمل سفر ....
يا ااا حرمات ...غير دكول دز برقيه ياقاسم شجرالك ؟؟!
هاي الصار ...
دعوفيه ياكريمه خلي يرتاح وحضروله غرفه ينام بيها ....
تدلل انت وقاسم كل الهلا بي ...
صعد قاسم ويه اخته ..دخلته بغرفه اثاثها فخم ومريح وبدل ملابسه ونزل حطوا الغدى ...بعد الغدى اخذه زوج اخته افتر بالبستان ومسوين كعده على الشط نسى قاسم كل حسراته وهمومه من كعد بهيج مكان هادئ ...ضل يراجع نفسه لو متزوج وحده من الخوانم والبشوات جان عرفت شلون تغير حياته وتخلي يصير مثل ابوسامر ويجوز احسن ......
صوتوا للقصه ...آرائكم راح تأثر هذه السفره على بيت قاسم وسميره ؟؟؟؟
