مثل قاسم دور الحلمان وبقى يصيح ..صديق ..جيب كواني العدس ..
ضلت سميره على صفنتها واخذت نداوي ترضعها لان كعدت على صوت ابوها شالتها وطلعت للحوش وبقى الاسم على بالها ...
مرت ايام وبقى قاسم على اتصال وبرقيات بينه وبين المؤسسه والصدك بينه وبين ورود وتكونت علاقه محبه بينهم عرف من خلالها انو ورود مامرتبطه بأي شخص ولاتحب الارتباط بهذا الوقت لان تريد تمارس عملها ودوامها بالمؤسسه بكل حريه وبنفس الوقت اسست تجاره صغيره لنفسها ....زاد اعجابه بيها اكثر واكثر ....
صار عمر نداوي سنه وكامت تخطي اولى خطواتها اخذوها للكاظميه امها وبيبتها ومجموعه من الحبايب للزياره وتوزيع ثواب بهذه الفرحه ...
فات قاسم للبيت وكال لزوجته تحظرله جنطة السفر عنه سفره للبصره ...طلع من الفجر صعد بقطار البصره ...ووصل اول ما راح للبستان شاف الفلاح وافتر بين الاشجار رجع لكه زوجة الفلاح ام ناصر فارشه حصيره من الخوص ومحضره الغدى وخبز التنور الطين ولبن وبس تصب الدجاج والتمن ....اكل قاسم بشهيه لان الاجواء تفتح النفس النخل واشجار التين والحمضيات المتوزعه على طول المكان ...وراها نام وكعد العصر حتى يقابل ورود بالمؤسسه ...
دخل شافها تصف بسيارتها على الشارع انتظر حتى تدخل وهو بعدها بدقايق دخل ...
قاسم..السلام عليكم استاذه ورود ..
ردت عليه بدهشه ..عليكم السلام ابو ناديه ....ااالحمد لله على سلامتك ..
قاسم ..الله يسلمج ..شلونكم
صارتلي شغله قريبه كلت امر اشوفكم ...
ورود..اهلا وسهلا تفضل ...
صاحت على ام سلمان تجيبلهم جاي ...
استرسل قاسم بالسؤال عن المؤسسه وشغلها وحفلات التبرعات ...
ورود ...هم زين موجود يمنا حتى تحضر حفلنا الي حيسويه فتحي باشا والدي للمؤسسة ومنها تتعرف عليه ومنها تشاركنا الحفل ...
قاسم ...واني حاضر نتشرف بشوفت فتحي باشا هيج انسان معروف بحبه للخير والمساعدة المحتاج ضروري اتشرف بمعرفته ...
ورود ..النا الشرف ابو نادية انت صديق مقرب وانسان محترم الحفل باجر بالستة يبدي اول نسوي عشى للمقربين وراها فقرات الحفل ...بيني وبينك عدد قليل حيجي على العشى حتى الباشا ياخذ راحته لان صحته موكلش واكيد انت و كريمه خاتون وابوسامر اول المدعوين ...
قاسم...مابي الا العافيه والسلامه ...ان شاء الله نجيكم ..
ام سلمان ...العفو استاذه هاي الدشاديش والبناطير خلصنهن البنات خياط خابري الحجي يجي ياخذهن للمحل ...
ورود ...هاا ماشاء الله عيني ام سلمان جيكتي عليهم زين خما ناقصين شي بالخياطه ..بالعدد ...
ام سلمان...اي استاذه كلشي سويت حسبتهن وكتب الولد العدد بهذه الورقه
...
ورود..عاشت ايدكم هسه اخلي السايق ياخذهن للمحل ...
قاسم...استاذه اني نازل للسوق اذا تحبين دليني على المحل واوصلهم بطريقي ..
ورود..لا العفو ابو ناديه منريد نكلف عليك ...
قاسم..لا يا عيني وين الكلافه بس انطيني العنوان ...
ابتسمت ناديه ونطته العنوان راح وصل البضاعه لمحل بالسوق فاتحينه حتى يعرضون بي شغل الخياط ويكون دخل ثاني الهم ويه التبرعات ...
رجع لبيت كريمه وبقى عدهم لنص اليل وراح لبستانه اخذ فراشه وفرشه على الصبه بالحديقه خلى راسه على المخده وظل يفكر بابتسامة ورود وكلامها ويتخيلها بالسمه مثل نجمه تلمع ودعى لربه ان تكون من نصيبه ....
ثاني يوم نزل للحلاق عدل لحيته واشترى عطر جديد وقميص وحذاء وشماغ وعبايه جديده لان عباته بقت بيته بغداد ولازم يكون متأنق بالحفل ومقابلة فتحي باشا ...
لبس قاسم القميص الأبيض وصايه نيلي وجاكيت والعباية النيلي والمسبحه مالته بايده وهو وجهه ابيض دائري واكتافه عراض طلع شيخ عشيرة ...حتى ام ناصر
من شافته صلت على النبي وطكتها بهلهوله ...
ظل يضحك عليها وكاللها ...
خاله ام ناصر كون انه طلعت عريس هل طكيتيها بهلهوله ...
ام ناصر وهي خجلانه مغطيه حلكها بالفوطه ...
ياعمي ابو ناديه لعد انت من كبرك تستاهل زينة البنات
...(هي تكله عمي لان هم فلاليح عنده مو من اللائق تصيحه باسمه )..
قاسم...الله يطول بعمرج خاله ..وكلمت عمي ترى ماريد اسمعها انه حسبت ناصر ابنكم او اخوج الصغير وهذا بستانكم وانه خطار عدكم ...
طلع لبيت كريمه ومناك طلعوا سويه للعشى ...
وصلوا لقصر فتحي باشا ...استقبلهم ابن اخوه صبري
( محامي ومرشح لمجلس اعيان البصره وهيج حفلات تفيده بالانتخابات)
اتفضلوا اهلا وسهلا بابو سامر
اهلا خانم
اهلا شيخنا ..شرفتونا
ابو سامر ..النا الشرف صبري افندي ...هذا قاسم ابو ناديه نسيبي واخويه وتاجر من تجار بغداد ومساهم مهم بالمؤسسة...
صبري ...اهلا ابو ناديه شرفتنا ..
قاسم..اهلا بيك النا الشرف بمعرفتكم ..
بعدها بدقايق نزل فتحي باشا والخانم زوجته وورود ..وهم سلام وترحيب وتعارف ...بعدها الخانم ام ورود اخذت كريمه وانعزلوا على جهه من الصاله وبقى قاسم ويه الباشا ولبقيه يسولفون على الوضع والانتخابات ...
فتحي باشا ..ياجماعه اني وكل اخواني ماعدنا رجل سياسي بالعائله ولانحب هذا الشي لكن.. صبري افندي ..درس القانون وآصر يقدم لمجلس اعيان ....ضرب عكازته بالارض كأنه مراضي على ابن اخوه...
قاسم..حقك باشا السياسه لعبه خطره وهوايه بيها جوانب والسياسي مثل الحيه كل يوم تلبس جلد جديد ...لكن الاصيل ويحب بلده ويريدله الخير مثل صبري افندي ان شاء الله يكدرون يخلصونه من هذا الشي ..
صبري ...ان شاء الله ...
ابو سامر ..اني من خلال شغلي بالمقاولات اكثر وجهاء البصره وعوائلها العريقه دتبيع املاكها او تخليها للفلاليح وتطلع للهند وبريطانيا خوفا من تدهور الاوضاع...
فتحي باشا ...صح وهذا الي اقصده الوضع مو تمام على كولة اهلنا الوضع مزلاكه متدري بياساعة تنجفي على وجهك ...والله الستار .
اي ابو ناديه شلونها بغداد.. تجارتك اشلونها..
قاسم..الحمد لله الوضع مثل البصره مقلق خاصه هسه الطلاب مظاهرات وبليل يلصقون منشورات لكن الحياة ماشيه ..والتجاره نعمه من رب العالمين ..
فتحي باشا ..الحمد لله ..ان شاء الله عدنا نزله لبغداد اني ولعائله وامرلك مخصوص ..
قاسم ..تشرفنا باشا ..
كمل الحفل وقاسم مثل كل مره عيونه على ورود بكل لحظه ..كانت اميرة الحفل كعادتها ....الصبح رجع لبغداد جاب نداوي وامها لبيتهم ورجع للشغله ...
ليلل انطته سميره الجاي وهو يلاعب نداوي بلعبتها ...
عيوني سموره حضري نفسكم راح يزورنا فتحي باشا وعائلته بهل الايام اريدج مستعده لان مامعلوم شوكت يجي بس خلي على بالج شتريدين حتى اجيبلج ...
سميرة.ان شاء الله من عيوني ..
بعد شهر من رجعته حملت سميره طفلها الثاني ...وخابرته ورود لقاسم تبلغه بزيارتهم بعد يومين لبيته وهم بغداد بيت ابن عم ابوها ....فرح قاسم وراح للسوق اشترى فاكهه وكرزات وكليجه وحتى خبز عروك بالفرن سوالهم ....لان تصير جيتهم العصر لاوقت غدى ولا يبقون للعشى ...
رجع للبيت اخذت سميره الاغراض وخبرها بجيتهم وكللها تلبسين ناديه ثوبها الاحمر وحذاءها والقبعه اريدها لعابه ...حضرت سميره وصبيحه كلشي حسب الاصول وهي لبست كوستم ستره سمائي وتنوره مورده وربطه وعبايه خلتها على القنفه يمها ووصت على صديق يجي وياهم حتى يضيف الزلم وصبيحه للنسوان ..
بعد صلاة العصر وصل فتحي وورود وامها وصبري وياهم لبيت قاسم استقبلهم بالترحيب وسميره اخذت ورود وامها للحوش والزلم دخلوا للاستقبال ..
سميرة ..اهلا وسهلا نورتوا بغداد ..تشرفنا بمعرفتكم ..
ام ورود ..النا الشرف ام ناديه ..اكيد هاي العابه الحلوه ناديه ماشاء الله ...شوفيها ماما ورود شكد حلوه ...
صفنت سميره على ورود الي اخذت الطفله بحضنها بلا اي تكلف كعدت توكلها كرزات تكسرها ناعم وتنطيها ...ورود لابسه تنوره وردي قصيره وستره وربطه مورده لافتها على رقبتها وفاتحه شعرها وحذاء كعب ....
طول الزياره ماعلقت ورود وامها على بيت سميره او دخلت بخصوصياتهم بالعكس كعدتهم كلش مريحه ولا كأنهن خوانم ونسوان بشوات كآنن متواضعات كلش ...حبوا ناديه وسميره وعزموها على زيارتهم بالبصره ..طلع الباشا وسلم على سميره واخذ ناديت بوسها وركبوا الربل لان شارع قاسم ضيق ماتكدر سيارتهم تدخل ...
اول مادخل قاسم استلم ناديه بالأسئلة
شسولفن وياج شكالن ..عجبهم مكانه بيتنه ...
سميره ...والله ناس اوادم ولا مبين عليهن خوانم وهاي ورود تنحط بالقلب اخذت نداوي تفلسلها فستق وزبيب وهذي تاكل ..
قاسم..اي هم حبابين خوش اوادم ماعدهم تكبر على الناس تدرين هاي ورود هي سوت المؤسسة مال الفقره الي اني بيها ...
جاوبته سميرة بحيره ...هاي يا مؤسسه ؟!
