مرحبا ..
اني ناديه ابويه مثل متعرفون تاجر جبير وله سمعته واسمه بالسوك ..اني اشبه بلون عيونه شهل وبياضه لكن شعري بي كسره على امي ...ما عشت بدلال ابويه وحنانه غير ثلاث او اربع سنين لان تزوج وخلانه ...
اذكر من جنت زغيره ويرجع من المخزن اروح ركض عليه يشيلني ويكلي هلا بناديه خاتون ويطلعي مصقول وبيض الحمام من جيب الستره مالته ...حتى من يكعد يصلي اركب على ظهره ماجنت افاركه حتى من ينام انام بحضنه على قنفة الحوش ...اني اكثر من اخواني شفت دلاله وحنيته تالي تركنا ومجنت اعرف ليش بس اشوفه ياخذنا بيت ابويه الحجي ويعوفنا وبقيت ايام انتظره جنت اكعد بالباب للمغرب انتظره وميجي حتى باليل ابقى ابجي اريد انام بحظنه وهو ماكو ...
تالي ابويه الحجي (جدي) كام ياخذني من امي وانام يمه الى ان تعودت عليه وعوضني عن غياب قاسم ابويه ...
وصرت احبه واسمع كلامه جنت استشيره بكل شي حتى دراسه هو يدرسني لان امي متقره ولا تكتب ..واذكر من نجحت من الخامس ابتدائي كعدني يمه وفهمني ان لازم بعد ما اطلع لوحدي بالدربونه ومن ارجع من المدرسه او اروحلها اجي ويه بنات خالي لو ويه مجموعة من بنات الجيران ووصاني ابد ما امشي لوحدي حتى بالعصريات ميصير اطلع العب بالباب مثل قبل وعلمني على الصلاة والصيام ...حيل احبه لجدي واحترمه ...وابويه قاسم شبه معدوم دوره بحياتي لان هو سحب نفسه من عدنا صرنا منشوفه بالشهر مره او مرتين ومرات ميجي يدزلنا المصروف بيد عمو صديق ينطي لجدي وجدو يجيبه لامي ....
جنت احب خوالي وكعدتهم ابد مفرقونه عن اولادهم حتى جانت ماما تقفل بيتتنا من يجني خالاتي ونروح نبات بيت جدي يسون كليجه ويلفن دولمه ومرت خالو ابو قدري تلم الجهال كلهم ونشتري حب ومصقول ونكعد تقرالنه قصص مرات من خيالها ومرات من الكتب حتى خوالي من تقره يكعدون يمنا ويسمعون القصص ...ههههه يعني عبالك تلفزيون مشتغل الكل يسكت ويسمع واذا اكو شي منعرفه تشرحلنياه ...
من شالوا بيت خالوا ابو قدري وبعدين خالوا ابو يحيى هم شالوا كلش فرغ البيت علينه ...بس يجون ليلة خميس على جمعه ولو من يجني خالاتي بيبي دز عليهم نتغدى ونتعشى سويه احلى شي بالصيف نفرش على طول الحوش وابويه الحجي وبيبي ياخذونا الجهال كلنا نكعد بأول السفره وخوالي ونسوانهم يمنا ...مره خالي مناضل الزغير حب يتشاقه وياه كله ميصير الجهال ليكدام برأس السفره واحنه بذيالها ...رد عليه جدي وكله هذوله الجهال حصتي من الدنيا انتوا اكعدوا يم نسوانكم ...
بالشته نكعد بالهول ونجيب بطانيات ونتلفلف بيها والصوبه معلوكه بالزاويه عليها قوري مي حار والثاني مال الجاي وخالتي تملي القالب حب شمسي وتحمص بي على الصوبه للتعلوله ...احلى ايام عشتها بينهم ...
بيت اعمامي ما اعرفهم ولا يعرفوني حتى بالعيد بابا مياخذنا نعايد عليهم ولا امي تطلب تروح عليهم ما اعرف ليش ...
قدوري ابن خالي هو جان مسؤول عنا لان هو الجبير بينا وجدي دائما يوصي علينا جان حريص علينا ياخذنا اني وبنات خوالي نروح نشتري ونرجع حتى الظهاري من ينامون بيت جدي يجمعنا بالاستقبال ونلعب مدرسه لو حزورات حتى منطلع للحوش نسوي هوسه جانت تصرفاته مال واحد اكبر من عمره ...هذا الشي خلاني احبه واتعلق بي احس بأمان من يكون ويانه جان قدوري و يحيى ابن خالي الثاني نفس العمر بس يحيى اهدء منه...
يحيى يحب يرسم ويسوي اشكال بالطين حيوانات ..ورد ..اي شي جان يعرف يسوي ...لذلك منعزل عنا ..
اما بنات خوالي هنه اخواتي وخاصه هيومه صديقتي وكاتمه لاسراري تعرفني اكثر من امي ...
طعبا هسه خلصت المتوسطه وقدمت على معهد المعلمين ولازم اروح اقدم
بابا قاسم دز عمو صديق حتى يروح ويانه اني وامي للمعهد اسجل واستلم الكتب والزي بس جدي رفض ومقبل نروح وياه ...
الحجي ...روح بويه صديق لشغلك وخابر ابو ناديه كوله الحجي يسلم عليك يكلك لتشيل هم ناديه بنتنا واحنه نتكفل بيها ...
صديق ..والله ياعمي راح تخليني محرج كدام ابو ناديه ...خلي اخذهم وتعال انت او واحد من الولد ويانه ..
الحجي ..لابويه وسفه عليك انت ابنا ونأمنك على روحنا ...وام ناديه مثل اختك لاتفهمني غلط ...
اني اريد اروح وياهم اشوف ناديه من تسجل بالمهعد وافتخر بيها ...
وفعلا اخذنا جدي اني وماما وسجلنا بالمعهد الي جنت كلش متعجبه بي بناء عالي وحدائق ومطعم بي ومن سلموني الزي تنورتين رصاصي وستره نيلي وقميصين بيض ...رجعت للبيت فرحانه واكمز مثل الفراشه اي واحد يجي من خوالي وولدهم اركض اطلع الملابس والكتب وافرجهم عليهن ...
جدو تعب ودخل لغرفته وصاح بيبي تروحله ...
الحجيه ..خير حجي خما بيك شي ادري بيك موحمل تعب ومعاملات ...
الحجي ...شأسوي ياحجيه اخلي سميره وبنتها يرحن ويه صديق للمعهد صحيح الرجال آدمي وماشفنا منه الا الخير ...بس ماترهم ....
اه اه لو ادري ابوها بيش يفكر جان ارتاحيت ...رجال غيره مابراسك محنه على ولدك ماكو دز العامل ياخذها وانت موجود .... تدرين من دخلنا وسلمنا الفايل قرأ المدير اسم ناديه قاسم عبدالله ...سألها عن ابوها وينه طلع صديقه ...كلناله بالبصره عنده شغل ...حسبي الله ونعم الوكيل ..
الحجيه ..الله يحفظك الهم وتعوضهم عن ابوهم ....ارتاح هسه خلي اجيبلك مي دافي تخلي رجليك بي ...
مرت العطلة واني اراجع بكتب المعهد واخواني سووا محل قماش ويه خالوا اشترك بي قحطان وعدنان وقدوري وسمير ابن خالي الثاني وبيبي وجدو هم الهم حصه جان رزقهم خير من الله ماشي وخالي ينطيهم بضاعه من دكانه يعرضونها بمحلهم حتى يوصي النسوان يرحن عليهم يشترن قماش دشاديش وعبايات ..
امي عجبتها الفكره وصتهم اي مريه تريد خياطه يدزونها عليها ...جان خياطها يخبل على الموديل حتى الدشاديش تنسقهم لونين تطلع تخبل ...
امي بقت تخيط بس اخواني سدوا المحل لان رجعت المدارس وهم ثالث متوسط لازم يقرون ...
داومت بالمعهد كان بس بنات واني مو كلش احب اسوي صداقات ولا اتعرف على وحده ...قضيت لحد نصف السنه واني لحالي صح يجون بنات يسلمون عليه وناكل سوا بس مو كلش صديقات
لحد رابع يوم امتحان طلعت للحديقه اراجع بيدي ملزمه انكليزي اجتي وحده حلوه وانيقه صح لبسها نفس الوان الزي لكن غير قماش التنوره منسقه على جسمها والقميص ابيض قماشه ناعم عليه ترواكه رصاصي حياكه صوف كلش عجبني لبسها ...
وصلت يمي سلمت وكعدت على المصطبه واني امشي واقرأ ...
صباح الخير ...
ناديه ..صباح النور ..
اني اسمي رفيف ...مرحله ثانيه طبعا انتي متعرفيني ولا متشاوفين اني بنت عمج عبد الكريم ..
ناديه بأستغراب ...اهلا وسهلا ...اكيد معرفتج اعتذر ..
رفيف ..لا عادي مو ذنبكم ...شنو عدكم اليوم امتحان ...
ناديه ..انكليزي ..
رفيف ... هنيالج بس ماده وحده ...احنه علوم وطرائق ...اليوم ابقى للعصر هنا بهذا البرد ...
سكتت ناديه معرفت شنو تكوللها ...
باوعت على الساعه ...
ناديه ...يلا عيني صارت بالتسعه بدأ امتحاني ...اتشرفت بمعرفتج ..ان شاء الله موفقه بلامتحانات ...
رفيف ..اجمعين عزيزتي سلميلي على عمتي والولد ...
ناديه ..يوصل ..
كملت امتحاناتي وبقى بس استلم النتيجه حددوها على اسبوع الجاي ...
اخيرا عطلللللله
اخذنا جدي لكربله بتنا عند بيت خالتي بيتها وحدها وعيالها بيت اخت جدو يعني زوجها ابن عمة ماما ...عدهم ارض زراعيه وحلال (اغنام وابقار ) خطيه شالونه بالصلوات وبناتهم كلش حبابات تعجبن بينا اني وبنات خالي لان نداوم اعداديه ومعهد هن للابتدائيه ومكعديهن ...طلعت وياهم واخواني للكاع نلم بتيته ونسوي شدات بصل اخضر ونجمع طماطه اشكال عدهم مزوعات حتى اخذني يم البقره يردوني احلبها وجدي يضحك عليه لان اخاف منها ....
بقينا اسبوع ورجعنا لبغداد وهمه كلش ضاجوا على روحتنا يردونا نبقى اكثر يمهم بس جدي وخالي عدهم اشغال ولازم نرجع ...بيبي عمة ماما نطتنا دجاجات وديج وحليب وصناديق طماطه وبصل وبتيته ...من كلشي حملت النا ...
رجعنا للبيت لكينا خالوا مناضل ويه صديقه واكفين بالباب نزلوا الاغراض واحنه دخلنا نرتاح ليل اجه علاوي ابن خالي دك الباب ...
عمه جدو يريدج بالغرفه مالته ...
سميره ..صار حبيبي بس اصلي واعشيهم نجي نتعلل يمكم ..
علاوي ..لا عمه ..
اتلفت وشافني واكفه ..
سحب ماما من ردانه حتى يحاجيها بأذانها ...
جدو يكول خلي تجي لوحدها ...
سميره ..صار عمه هسه جايه وياك ..
راحت ماما واني موتني الفضول ليش يردوها لوحدها اكيد اكو شي ...
سميره ...مسيت العافيه حجي داز عليه ..
الحجي ..اكعدي بويه ..هسه اخوج سولفلي ..قاسم جاي من جنا بكربله وكايم يحجي ويصيح ليش طالعين لكربله وهو مايدري وثاني يوم داز صديق ومالاكينه ومناضل كايلله للجمعه يلا يردون ...وقاسم جاي ثاني يوم موصي اخوج راح يجي يوم السبت الصبح ...
اوصيج بويه لاتخافين ولاتنهزين هو هم حقه لازم نخبره بروحتكم ويانه ...
الحجيه ...صدك تحجي ...هو شالهم وشمرهم هسه صاروا عياله ويخاف عليهم ...
الحجي ..حجيه الله كريم رجال حقه يخاف على بنته وولده وذوله امانه عندي ...
الحجيه ..صدك يولي سميره هاي ام حميد جنت عمتج شافت ناديه وتسودنت عليها تكول انطونياها لحميد ..يدرس كلية شرطه بالموصل ...شكلتي ..
سميره ...يمه فدوه اروحلج هسه اخذناهم لكربله نزور ونشوف عمتي ..ابوها حرك الدنيا مو النوبه ازوجها ...انسي السالفه يمه ...
رجعت ماما تتصفن ...اني سويت عشى جبن عرب وسويت بيض وطماطه لقحطان وعدنان راد بيض سلك ...جبت القوري وصبيت النا ...بس ماما هيج كعدت ويانه ما اكلت ...
ناديه ...ماما ...شبيج حتى متعشيتي ..
سميره ..ماكو يمه تعبانه من الطريق صبيلي جاي وانطيني حب راس ...
صبيتلها ولميت المواعين غسلتهم وطفيت اضويه البيت الداخليه المطبخ والهول وبقى بس ضوء التلفزيون جبت حب ركي وحب ابيض وكعدنا نكرز اني واخواني وامي دارت وجهها على الحايط على اساس نايمه ...
ثاني يوم كعدتنا امي من وقت بعدها حتى ثمانيه مصايره ...
قحطان ..يمه شعدنا موعطله خلي انام ...
سميره ...لا ابويه انت اكعد وكعد عدنان اليوم ابوكم راح يجي عليكم خما تتلكونه
عيونكم مقفله من النوم ..يلا عيوني ريوكم حاضر ....
قحطان ..استغفر الله ...هسه كون الخاتون متخلي يجي يارب ...
عدنان...هو.... عدنااااان..اكعد يمعود ابوك يريدك ...راح ياخذك للبصره ..كوم لم هدومك ...
كعد عدنان متخبل عباله صدك وقحطان يضحك عليه ...
وصل قاسم مثل ما اتوقعت سميره ورى التسعه بدقائق ...اندكت الباب واصلا قبلها اجه علاوي كاللنا ابوكم اجه بالطريق جان طالع يجيب صمون وشايف سيارته بالفرع
...
فتحله قحطان الباب سلم عليه ودخل للاستقبال امي كالت لعلاوي صيح جدك كوله عمو قاسم هنا ....
اجينا سلمنا عليه وكعدنا محجه شي ....
بس يفرك بالسبحه بيديه ..
دخل جدو وكام ابويه سلم عليه ..
قاسم ..الحمد لله على سلامتك حجي زياره مقبوله ..
الجد ..الله يسلمك ابو ناديه ...الحمد لله ..
قاسم ..حجي الامانه الي عندك اريدها هسه صار وقتها ترد لراعيها ...
دار جدي وجه علينا وكال لقحطان بويه اخذ اخوتك وروح ليم بيبيتك كوم بويه ...
طلعنا وبقت ماما وجهها اصفر وتفرك بايدها .
الحجي ...شنو الي صار ابو ناديه سامع شي ...
قاسم ...حجي انت ماقصرت شايلهم عني من يومهم وهس كبروا ويعتمدون على نفسهم واني هم اريدهم يمي مالي حيل بعد اروح وارد مناك لهنا ...
الحجي ...هذا الحجي جديد ابو ناديه ..
الولد والبنيه مدارسهم هنا واصدقائهم وميعرفون بغير مكان يتعبون ..
قاسم ..كل شي صعب بالبدايه تالي يتعودون ...
سميره ...بس اني ماروح للبصره هنا عايشين مرتاحين ودواماتهم اكيد ميقبلون ..
قاسم ..اني ما كتلج ترحين وياهم ما وجهت الج الكلام ...
اني جاي اخذ ناديه واخوانها ...
