مرت ايام وقاسم فرحان باولاده عزم كل اخوانه على الغدى بعد مرور ثلاث ايام من ولادتهم وطبعا هوسة وخبصه وتعب والبيت مليان جهال ناديه بقت صافنه عليهم لان متعرفهم لكن شويه تعلمت عليهم ولعبت وياهم ..
كريمه ماحضرت بيومها قررت تجي غير يوم ...
راحت زور ورود بالمؤسسة وحست بورود مامرتاحه بشوفتها ...
كريمه ...خير ورود اشوفج ممرتاحه ...
بيكم شي .
ورود ...لاعيني كريمه خاتون ليضل بالج شويه تعب بالتسويق والخزن مال التمور ...صار يومين ما رحت للبستان تدرين شغلي بالمؤسسة ماخذ كل وقتي...
كريمه..صدك عيني حقج كله تعب عليج ...
ورود..ام سامر ليش ماتجين ويايه ديرين المؤسسه بهاي الفتره ..بين ما يخلص موسم التمر ...هاا
كريمه..ما اعرف شأكولج مو هلايام عدنا سفره لبيت اخويه قاسم بغداد مو الله رزقه ولد تؤام ...من نرجع اردلج خبر ...
حست ورود بغصه من سمعت سميره جايبه تؤام ولد ...
يعني هذا سبب انقطاع اخباره وتلفوناته بهذا الاسبوع ...
ورود ...مبروك عليكم حبيبتي يتربون بجال ابوهم ودلاله سلميلي عليه وعلى ام ناديه هوايه ...
كريمه ..يوصل ان شاء الله ..يلا اني اترخص ...
ثاني يوم سافرت كريمه وعائلتها لبغداد راحو لبيت قاسم استقبلهم بالترحيب والضيافه بعد الغداء كعدت كريمه واخوها بالاستقبال واولادها طلعوا ويه ابوهم يفترون بغداد ...
كريمه ...تستاهل كل خير عيوني ابو ناديه لو تدري شكد فرحتلك من وصلت البرقيه ...
قاسم ..الله يسلمج خيتي ...شلونها البصره اهلها ..
كريمه..البصره بخير واهلها يسلمون عليك ويباركولك ههههه ..
حس قاسم بكلام كريمه ان هي عدها احساس بشعوره اتجاه ورود ...
قاسم..والله يا كريمه ما اخفي عليج وما اكدر اخفي اكثر اني احبها لورود كلش وبعد ما اكدر على فراقها ...اني تقدمتلها على سنة الله ورسوله واريدج تساعديني حتى توافق ...
كريمه..الصراحه متوقعت هيج علاقتكم مطوره كنت اظن بس اعجاب صدك فاجأتني قاسم ....
زين وسميره واولادك شلون اذا عرفت ...
(قربت عليه) وكالت ...
هي سميره تعرف بيك تحبها لورود !!
قاسم ..لا اكيد متعرف ولا راح تعرف .
كريمه ..والله هو حقك تتزوج لكن صعبه بهيج وقت على سميره وستوها والده صراحه اني ما اشجعك خاصه بهل وقت ..
قاسم ..خويه اني ماراح اتزوجها هنا كل شغلي وزواجي راح يكون بالبستان ...يعني ما تحس سميره على غيابي ولا بزواجي ...اني هذا الموضوع مايهمني هسه بكثر ما يهمني موافقة ورود ..
ثاني يوم وصلت كريمه للبصره وطلعت بوجوها على المؤسسة استلمت شغلها
للظهر مرت ورود تفاجأت بيها ...
ورود ..السلام عليكم كريمه خاتون الحمد لله على السلامه ...
كريمه..الله يسلمج
ورود ..شوكت رجعتوا من السفر ..
كريمه ..اليوم الصبح وبوجهي لهنا اشوف الشغل وهم عندي سالفه وياج ..
ابتسمت ورود وردت عليها ..
كولي خاتون انتي تأمريني ..
كريمه ..ما يأمر عليج عدو ...
اني ماحب الف ودور بالكلام راح ادخل لج بالموضوع .
قاسم حجالي كل السالفه وهو متمسك بيج جدا ويتمنى يسمع موافقتج ...شتكولين ...
ورود..والله ياخاتون ماااا.
قاطعتها كريمه
..رجاءا ورود لاتكوليلي خاتون احنه صديقات وراح نصير اهل ..
ورود .حبيبتي احنه صديقات وعشره عمر حتى وان مصارت قسمه ويه قاسم ...
كريمه ..لا عيوني ان شاء الله تصير وازفكم بايدي ...
ورود ..اني محرجه من سميره ومن الناس شيكولون عليه اخذت اب من اطفاله وزوجته ..مادري محتاره ...
كريمه...شعليها الناس بينا وبعدين قاسم شغله توسع بالبصره وصار عنده ملك وبيت وديجي يبقى ايام هنا يعني محتاج زوجه داريه وتشوف طلباته ...وبالنسبه لسميره لتشيلين هم قاسم يبلغها بطريقته ...يلا عاد وافقي وفضيها خلي اخويه يفرح ..
يتبع 🥀
