بردت حياتي مثل برد كانون ....
الا قلبي يبقى يسعر بنيران تموز ...
مرت فتره واشهر على سميره مثل الحلم متذكر منها غير شبح قاسم وهوسة اولادها يمها اما نادية زاد تعلقها بيت جدها وصارت هناك عدهم تبات ونست ابوها ودلالهالي ما لحكة تشبع منه ...
مرت سنوات ولازم ناديه تروح للمدرسه ...
ماماريد بابا قاسم يوديني اروح ويه ابويه الحجي للمدرسه ...
سميره ...يمه لتعاندين ابوج يلا حبابه ..
نزلت عليها وحجت بهمس يم اذنها ..خلي يوصلج اليوم وباجر اخلي ابويه ياخذج للمدرسه ...يلا بنيتي السباعيه ..
شالت ناديه جنطتها الي امها خلت بيها لفه وخياره لفتهن بورقه وكيس حتى
ليتلفن ...راحت تركض كدام ابوها للباب حتى توصله رساله زعلها عليه وهي مامعتمده عليه يوصلها ...
بالبصره ...
ورود زادت تجارتها والمؤسسه سلمتها لكريمه بصوره رسميه وهي بقت للتجاره والحفلات ويه اهلها وسفرات جانت كل سفره تروح بيها تدور على طبيب مشهور حتى تعرف سبب تأخر حملها بعد الاسقاط الي صارلها اول زواجها لكن بلا نفع كل الدكاتره كالولها ماكو سبب يمنع الحمل جانت ترجع محمله بالهدايا والالعاب لاولاد قاسم من ترجع لكن هو كان ياخذهن ويوزعهن على اولاد الناس المحتاجين لان سميره متريد شي منها جانت تكول لقاسم ...
كافي اخذتك مني ومن ولدك النوبه تريد تاخذ ولدي ونداوي ...
وهو ميريد يجرح ورود يوزعهن بدون علمها حتى ليجرحها ...
تفوقت ناديه بالدراسه لان جدها جان يدرسها وحتى سميره عجبها تدرس وياهم تاخذ دفترها وتكتب ويه ناديه لليل تخلص واجباتها بيت جدها هي وامها واخوانها ويرجعهم خالها لبيتهم ...
قاسم تقريبا همل سميره وصارت علاقتهم رسميه على كد الاطفال واحتياجاته من يكون يمهم واغلب وقته بالبصره جان حتى من تصير مناسبه او لمه يم اخوانه مياخذسميره وولدها يجيب ورود من البصره حتى تحضر وياه كدام اخوانه
هذا الشي خلا سميره تغلق على حب قاسم بكلبها وتشمر المفتاح بالشط مثل متكول ...
جانت ام سعيد تمر عليها الصبح شوفها شلون حالها تغير وكبرت قبل وقتها ...
ام سعيد...والله يايمه كمت اذب اللوم على نفسي اني سعيت بزواجج وجبتج لشلعان الكلب ...
سميره ..لا خاله شعليج انتي قابل تدرين بقاسم راح يتزوج عليه ويعوفني ..
ام سعيد..اريد اعرف شيريد بعد اشو صاح مرتي متخلف طلكها وتزوجج وصلوات جبتيله الولد والبنيه وخير وبركه عليمن هيج مصروع يريد يحط راسه براس خوانه بس الله يهدي ما كول غيرها ...
شالت سميره ابنها الي راح يلعب الحوض مال المي وجرت الثاني بيدها ... وكالت ..
ربج رحيم خاله شريد منه غير يحط باله على ولده ...حتى ناديه شبعت قهر عليها تعلقت بجدها ونست ابوها من كثر ما مسافر للبصره ..
مرت ايام ونجحت ناديه للثاني ابتدائي واخذها جدها حتى تستلم الشهاده ومن عرف ناجحه الاولى وفه بوعده الها وصعدها بالربل من المدرسه لبيته والموسيقى دك وراها وهي مكيفه صعدت صديقاتها ولد خالها وياها يركصون طلعت ناديه طشت جكليت بالباب عليهم والجيران عبالهم عرس بيتهم مو نجاح ...
ليل رجع قاسم وسولفله رجال جيرانهم لكاه بالشارع على زفة ناديه السواها جدها وهو بقى باهت ميدري شنو يجاوب الرجال غير جنت مسافر بشغل وكلفت جدها يروح وياها ...
ثاني يوم الصبح راح لبيت عمه يرجع سميره وجهاله لبيتهم ...صادف عمه الحجي بالبيت مطالع للشغل لزمه دخله لبيت وقاسم مقبل يدخل تالي كله الحجي عندي كلاموياك ميرهم اكوله بالباب ...
دخلوا للاستقبال وناديه تلعب بالحوش ولاكأن ابوها مر من يمها ...
الجد .ابو ناديه انت مسوليتك كبرت وثكل عليك الحمل واني ماعاجبني سميره وولدها وبنتها مهجولين كل يوم بيت اني ..
قاطعه قاسم ...حجي مو تدري شغلي يطلب سف....
ابو ناديه ...اني عاذرك بس اني اكولك بنتي وجهالها بعد مالهم رجعه لذاك البيت مو يوميه حمال باش شايله اطفالها رايحه لبيتها الصبح راجع النا المسى ..
حجه قاسم بعصبيه ...
حجي رحمه لهلك اني هذا حالي من اتزوجت سميره لليوم تجارتي وشغلي يرد ركض وسفر ولو متعاجز منهم ياحجي اخذهم للبصره لبيتي نستقر هناك ...بس سميره متقبل تسكن هناك ..هذا الي مسكتني ..
الجد...اسمع قاسم اني مامتعاجز منها ولامن ولدها ذوله ولدي اعرف الهم اكثر منك وتدري كلش زين ناديه واخوانها قطعه من كلبي دون عن كل احفادي ...الي اريد اكولك اني اشتريت بيت ام خضر جيراني وفتحت السياج وصار بيت واحدوذاك هو فارغ ولدي عدهم بيوتهم ومستقرين بيها ...
لم ايده الجد بعزم وغمض عيونه ورجع زفر نفس بعصبيه ...
ابو ناديه اني اريد بنتي كدام عيني ليل نهار واخوها الزغير راح يلبس عسكري بالكليه واني ماعندي حيل اركض بليل او نهار لبيتك اجيب وارجع ...الي اكوله خلي سميره تسكن بهذا البيت ويانه وبيت ام خضر معزول تكدر تاخذ راحتك بي بهل الايام الي تجيهم بيهن والمدرسه قريبه على نداوي والولد يرحون ويه ولد خالهم ويردون ...هسه شكلت ...
سكت قاسم لحظات وكال ...اني ماطلع من بيتي شتكول عليه العالم واخوتي ياكلون وجهي ...
كام الجد وصار بعصبيه ...لعد وين اخوتك من تروح اسابيع بالبصره تدري بيهم اطفال وامهم زغيره عايفها وحدها حايره بأمرها يدرون بينا نركض بيها بنص اليل للمستشفى من جاهلها يتمرض ...يدريون ناخذهم للمستوصف تلقيح وعلاجات وصيف شتى ماسمعت واحد من خوانك دك بابها بغيابك وكال اخوي مسافر خلي امر على مرته وجهاله اشوفها شنو محتاجه وهذا الزمن الي الناس كثر جوعها وطلعت عينها تاركين مره وجهال طول اليوم وحدهم وتالي حضرتك مكعدها حارس على بيتك ...اسمع قاسم اذا بقيت مصر على وضعك مالك زوجه عندي من باجر طلك ...وبنتي عندي ومؤخر الزواج والنفقه كلهن الك اني حصتي بنتي وجهالها ...اتفضل كدامي اريد اروح للسوق ..وانت ارجع لبيتك فكر زين ..
طلع قاسم متعجب من عمه شلون هيج يعامله ويتكلم وياه ...التفت على ناديه وهي مستمره بالعب بالحوش حتى ماكدر يباركلها بنجاحها او يسلم عليها ..
رجع لبيته محمل بغيظ وحقد على سميره وحس بلوعه لان تزوجها لكن كلام عمه صح لان هو كل وقته هناك بالبصره يم ورود قرر يلم المشكله ويشتري بيت قريب على بيت اهل سميره احسن ما توصل للطلاك وينحرم من اولاده ...
طلع العصر يدور بيت ماكو قريب عليهم راح للمخزن وهو يفكر بكلام عمه ...ماحس الا اذان المغرب يصيح وهو بلا اكل او شرب ..
لزم راسه وصاح صديق ..صديق ..
اجه صديق يركض ..خير عمي بيك شي ..
هاك روح جيبلنا عشى وقوري جاي ومر على ابو عادل كله حب راس لابو ناديه ..
بين ما اصلي الكاك كدامي .ركض صديق وهو كام توضأ ويصلي ويدعي ربه حتى يهدي لطريق الصح ...
ثاني يوم طلع هم يدور بيت جديد
بالصدفه شاف ام سعيد سلمت عليه بوجه ثكيل وراحت ..صاح وراها ام سعيد خاله ...رجعت عليه خير ابو ناديه ...محتاج شي ..
سكت قاسم والحيره بعيونه ...وكال ..محتاج واحد ينصحني ..
كلها تريد من قاسم بس محد سأله هو شيريد ...
رفع عينه بالسما حتى ليبن انكساره كدامها ..
ام سعيد ..يايمه كول بلكي اساعدك احجيلي انه هم خالتك ...
قاسم ..والله اشوف بيج طيف امي الله يرحمها ...اني محتار بروحي ...عمي ابو سميره اخذ بنته وجهالها يمه ومنعني اخذهم لبيتي يريد اسكن عنده بيت ام خضر ...حتى تضل سميره وجهالها كدام عينه ...
ام سعيد...شكو منها انت مو غريب والبيت فرغ بناتهم تزوجن ولدهم ربك مكنهم واشتروا بيوت وطلعوا وحدهم وهذا البيت بقى للزغير من يخلص كليه يزوجونه ..يعني سميره لو سكنت وياهم تونسهم وديربالها على امها وابوها ..
قاسم..واني ...
سكت من شاف مريه مرت من يمهم وانتظرها تبتعد ..
ام سعيد ..انت شبيك يمه ...انت يوم هنا وعشرين بالبصره ....
لا عبالك اني مادري ...اني امر على سميره الصبح دزني امها يمها اشوفها حايره بولدها وتصفن بالبيت وحدها مافكرت بيها مره حمره صفره وشابه والجيران كلها تعرف بيك تاركها ومسافر ومخفت ينزل عليها ظالم ويصخم وجهك لو بس يبوك بيتك ما يمسهاالناس ماراح تخليها لله راح يحجون بقصص اشكال الوان عمي اني مره جبيره واخاف من جنتي تروح لاهلها اضل احسب الظهاري اخذ عباتي وادور على جيراني مو بنيه شابه وحدها ...
خاله اصحى على زمانك ازت خوش زلمه شجرالك يا يمه ...
قاسم ...هسه والحل مايصير اكعد بيت عمي حتى لو بيت ام خضر معزول ...ماراهمه ..
ام سعيد ...عندي حل يرضيك اشتري بيت ام خضر من عمك وهيج راح تكعد بيتك ...
قاسم ..والله مادري خوش فكره بس خاف عمي مايقبل ..
ام سعيد ...هسه نروح انه وياك عليه ونشوف شيكول ..لتخاف خالتك ام سعيد وياك بس اريدك تعدل بين نسوانك ترى الظلم موزين يبن فخريه ...
(فخريه ام قاسم )
وصلوا لبيت عمه وجان طالع للمحل ماله دز قاسم واحد من ولد المنطقة حتى يصيحله ...لحظات واجه الحجي مستعجل عباله قاسم راح ياخذ سميره غصب بس من شافه واكف بالباب وام سعيد وياه عدل مشيته وسلم عليهم وفات كدامهم ...
كعد قاسم بالاستقبال وياه ام سعيد ودخلت سميره شايله ابنها وامها ...كعدن طلب الحجي من سميره تسوي الهم جاي واشر الها هي افتهمت ان ابوها ميريدها تكعد يمهم اخذت ابنها وطلعت وام سعيد تصيح وراها ...
ام ناديه حلفتج ماتسوين كلشي مانريد جا احنه خطار ...
رد عليها الحجي ..اختنا ام سعيد كدام الله وخلقه وهذا بيت اخوج بيج خير ودللي ..
ردت عليه حتى تكسب الطيبه مالته وهدؤئه ...
تسلم ابو مناضل اريدك سالم ياخويه...
هسه انت سهلت عليه الدرب ...ترضاها اليوم اطلع لجيراني واشوف ابن اختك فخريه( ام قاسم ) روحه لايبه يدور بالدرابين على بيت قريب الكم ...
الحجي ..وليش يدور موكتله هذا بيتي فارغ خلي زوجته وجهالها تسكن بي .
