اخر ايام رمضان الها طعم ثاني تنشغل العوائل بتجهيزات العيد والكليجه وتنظيف وتحضير الفطور وجان هذا الاسبوع ازدحام على امي بالخياطه حتى ورى الفطور يجون النسوان القريبات على بيتنا يقرمن او يفصلن جديد واني جبت لماما مجلات ازياء بيها اشكال الفصاللت حتى بدلات زفاف ....وسط كل هذه الهوسه اني معزوله بعالم الخساره وحدي حتى هيام ماسمعت منها جواب يريح كلبي وهيه تدري بحبي لقدوري ...
سميره ...ناديه تعالي لضميلي الابره ما داشوفها زين ...ناديه .... نداوي يوم وينج ...
شمرت الكلابيه من ايدي ورحت لامي
ناديه ..هايوم جنت اخيط بالدكم ...تردين شي ..
سميره..تعالي سويلي لابره ماشوفها ..
ناديه ..هاي سويتها تدلل ام قحطان علينا ...
سميره ...ندواي ..شبيج ...سولفيلي مزاعله ويه هيومه ...
ناديه..لا ماما ليش
سميره ..اشو معاجبتني هل الايام ..كولي ماما لتخلين بالي عليج .
ناديه..ماكو شي بس مليت بالبيت ونفس الروتين ..تعبت ...
سميره ..لا ماما عبالج ما اعرفج اني منتبه عليج من سالفة قدوري وانتي حالج تغير ...ماما كلشي قسمه ونصيب واذا الله كاتبلكم سويه محد يكدر يفرقكم ...
ناديه حظنت ماما وبجبيت بحركه ...
ماما ليش كلشي اريده يروح مني ...والله تعبت ما اكدر اشوفه يتزوج غيري ...
سميره..هو كلج احبج اريد اتزوجج ..
ناديه..لا ..بس ادري بي يحبني .
سميره ..هاي كلها الدموع والزعل ومامتأكده يحبج لو لا ....هنيالك قدوري افندي بهيج حبيبه .هههههه
ثاني يوم رجع عدنان للبيت مستعجل ...
يلا يوم بساع لمو غراضكم راح نسافر للبصره ...اروح اشوف جدو وارجع ..
سميره..خير يمه شصاير ابوك بي شي فهمني ...
امي تسولف وتمشي وراه واني وراهم اريد اعرف شصاير ..
عدنان . هيومه وين جدي
هيومه ...بغرفته .
عدنان..شلونك جدو ...
الجد ...اهلا بويه تعالوا كعدوا ....
عدنان ..لاجدي اريد اكولك لازم نسافر لابويه بالبصره اني واخواني ...
الجد ..خير ابني شصاير ..
عدنان ..اليوم اجه عمو صديق للمحل ...مخابره اسامه ابن عمتي كريمه وكايله ابويه مريض صارله اسبوع بيتهم وزوجته مسافره لمصر ماترجع ورى العيد وابويه يريديرجع لبيته ومحد يمه ...
الجد ..لاحول ولا قوة الا بالله ..
سميره ...سوده عليه ياقاسم هيج تتمرض وتنام بيت الناس تتعاجز منك ...شلون بيك
كعدت امي تبجي بسكته على ابويه..
الجد .هسه اخابر صديق افتهم منه ..
كام جدي كعديم التلفون الارضي وخابر ...
الجد ..هلا بويه صديق
...اي ..
اي ...
مابي الا العافيه ..
انطيني رقم بيت البيك ...
تعال علاوي اكتب الرقم ...
كعد علاوي يكتب رقم بيت عمتي بالورقه ...
الله وياك عمي بالسلامه ..
طلب جدي الرقم ...
الجد ...الو سلام عليكم ..بيت ابو اسامه ...اي ..قاسم افندي عدكم لو طلع لبيته ...اني جد اولاده من بغداد ....اي ..
الو هلا اسامه افندي شونك ...
الحمد لله ...طمنا خالك قاسم شلون حاله ..
اسامه ...ياجدي خالي مريض من رجع من بغداد اخر مره بس هسه تعب وزوجته مسافره وهو عند الا يرجع لذاك بيته وتعرف منو اله خابرت عمي صديق ينطيكم خبر ..
الجد زين سويت ابني ..انه باجر جايبهم وجاي للبصره بقطار الصبح بس اريدك تنطيني العنوان ...
اسامه ..هلا بيكم جدي تشرفونا اني انتظركم بالمحطه اوصلكم على راسي ...
الجد ...يسلم راس بويه سلمنا على اهلك كلهم ...
سد جدي التلفون وباوع بوجهنا...
صح احنه بعيدين عن بابا وكل هاي السنين يتمرض ومندري بي لكن هسه اخذنا القلق عليه وخاصه امي
جدو ليضل بالكم مابي شي ...كوموا لملموا جنطك حتى نطلع ورى السحور للمحطه ..ام هيام تعالي عمي حضريلي جنطتي ودوايه لاتنسينه ...يلا سموره بويه اخذي ولدج وحضروا فطوركم اجي افطر عدكم اليوم ..
كامت امي مسحت دموعها ...هلا بيك يابه ...
جدو سوا هيج حتى يخفف من القلق الي عدنا ...
هيومه عمه اخاف يبقى خياط للنسوان راح اجيب المكينه والقماشات يمج كمليهن .
هيومه ...صار عمه ...
ثاني يوم طلعنا بالسته وربع حتى نلحك قبل الازدحام بس الغريب قحطان ما تكلم باي كلمه لا اعترض مثل عادته ولا بين مهتم للسفر شلنا جنطنا وهاي اول مره اركب قطار ...اجرلنا جدو غرفه بالقطار حتى ناخذ راحتنا بقيت اباوع على الطريق طويل ومزارع على الجهتين فتحت الشباك الهوى حار وصوت القطار يرن بالاذن ...
قحطان ...سدي الشباك جدي نايم ...
سديته وحظنت ماما الى ان غفيت حسيت على هوسة المحطه والجابي يعلن وصلنا للبصره ...صح اني ادرس واطلع واشوف عالم بس مشايفه هلكد ناس بمكان واحد وشايلين اشكال الاغراض حتى دجاج وخرفان ماخذين وياهم ...
نزلنا كعدنا على وحده من المصاطب وجنطنا ويانه ربع ساعه واجانا ولد رشيق شعره اشقر عيونه بيهن صفار عسلي لابس قاط بيجي وفيونكه (كان موديلها بذاك الوقت شبابي ) وبيده سبحه والحذاء بيجي مطعم بأبيض يعني الي يشوفه ميتوقع عراقي ..شكله اجنبي ..
الشاب ..السلام عليكم حجي ...
الجد ...عليكم السلام ورحمة الله ...تفضل وليدي ...
الشاب ..عمي انت حجي رزوقي ابو كريم ...
الجد ...نعم ابني ...وانت اسامه ابن البيك ...
اسامه ..نعم جدو اهلا ةسهلا نورتوا البصره ...
شلونج خاله ام ناديه اسف والله معرفتكم
اكيد انتو قحطان وعدنان ...
سميره ..هلا بيك خاله شلونك ..
قحطان ..اهلا ابن عمتي شونك اني قحطان وهذا عدنان ..
اسامه ..يلا تفضلوا جدو السياره تنتظرنا
بالباب.
....
كلش انزعجت منه شنو هذا سلم على الكل واني حتى شلونج مكالي واني هم عندت وضليت العب بزنجيل الجنطه لحد ما صار قريب عليه ديسحب الجنط درت وجهي عنه وسحبت جنطتنا وكمت ...
وصلنا بيت البستان الي سامعه بي مشايفته غير مره جابنا ابويه قبل لتحمل امي باخواني كان عمري ست اشهر او سبعه ...
اسامه ...اتفضلوا جدي نورتوا البصرة ...
سليم ...سليم ...تعال اخذ الجنط فوتهن جوه وكول للبيك وصلوا الجماعه ...
دخلنا داخل البيت صدك لو كالوا قصر اشكال الاثاث والستائر والتحف ...من غير الخادمه الهنديه والثلنيه مريه جبيره بالعمر عراقيه ...
هلا بيكم حجي الحمد لله على سلامتكم اني خالتكم ام ناصر اكيد انتي ام ناديه ...وهاي الكمرالحليوه نداوي ..
ونزلت على امي بوس وحظن والنوبه عليه مردت ضلوعي بالحظن ...
النوب دارت على قحطان وعدنان سلام وترحيب والاخ اسامه واكف مغتر بجماله مثل الطاوس ....
ام ناصر ..كومي عيني خاتون ام ناديه ابو ناديه فوك ينتظركم ترى ميكدر ينزل لهنا ..
الجد ..ليش شجراله هيج مرضته قويه ...
سكتت ام ناصر ومسحت دموعها بفوطتها
يايمه من سافرت الخاتون وهذا حاله جان يطلع للبستان يشوف المحصول الفلاليح بس من وصلت رساله من الخاتون انكلب حاله وظل يومين بلا اكل ولا شرب هنا دزيت الولد على كريمه خاتون اجتي شالته ابيتها هي وهذا البيك ..وهسه معصب عليهم ومرجعينه لهنا ...
سميره ..اخذتوا للطبيب شكال ...
ام ناصر ...اي خاتون اجه الطبيب لهنا وشافه وياخذ علاج بس مانفع وياه ...
خاتون اصعديله خلي يفرح بجيتكم ..
سميره ..ام ناصر ..لتكوليلي خاتون بروح اهلج ترى قلبي ملجوم من هاي الكلمه ...
التفت على جدو ...
حجي من رخصتك ...نصعد نشوفه ...
يلا يمه ...
صعدنا الدرج بعمري مشايفه مثله محجر خشب والكاشي يلمع من النظافه ...اول مصعدنا بوجهنا هول جبير بي تخم وفرشين زوليه صغيره وبردات زرق وتول ابيض بالوسط و غرف متجاوره ...
فتحت ام ناصر الباب ..
شلونك بيك الجماعه وصلوا ...
اتفضلوا يمه هلا بيكم ...
قاسم عدل كعدته ...هلا بيكم بويه تعالوا ..
سلمنا وكعدنا سألنا عن احوالنا وكال لام ناصر تحضر غدى لان جنا فاطرين ...
التفت عليه
بابا نداوي انزلوا يم جدكم بين ما اغير هدومي وانزله ...
نزلنا وبقى ويه ماما بالغرفه ...
قاسم ...شلونج سموره تعبتي من السفر ...
سميره ..الحمد لله اهم شي تكوم بالسلامه عيوني ....
قاسم...سموره تعبان اريد ارتاح اريد اغمض عيوني واكعد مثل الناس ماكو بالي خوف وقلق ...
سميره ..اسم الله عليك ...خوفتني ابو ناديه صاير شي ...
قاسم ...صاير هوايه سموره ...موكتلج تعالي ويايه هنا نعيش ليش عفتيني ليش ...مو تكولين احبك وفتحت عيني عليك ليش خليتيني اغرك هيج جان لزمتيني من ايدي ورجعتيني قاسم الاولي ...
هذا جان اول لقاء وعتب وصراحه واشتياق من ابويه قاسم لامي ...عتب لان خلت ورود تتملك على قلبه وحياته وامي استسلمت وانهزمت من اول مواجهه ....
سميره ...قاسم انت الهوى الاشتمه اني انهزمت لان ما اكدر اشوفك تحبها وتتغزل بيها كدامي نهزمت لان ما اكدر اشوفك تطب وياها وتنسد عليكم الباب .....اني ميته قاسم من عفتك عايشه بلا روح ...انت ماحسيت بيه انت ردت ورود ورحت الها وعفتني مو انه عفتك ...
قاسم ...وين ورود ليش مسافره وانت بهذا الحال ...
قاسم ...مسح على وجهه وكال بحزن ...
بعد ماكو ورود سميره راحت ...
نزلت دموعه كأنه طفل فقد امه ...هيج جان حبه للخاتون ولليوم يذكرها حتى غرفتها محد يدخل بيها غير بابا ....
سميره ...شلون طلكتها ....
قاسم ..سالفه طويله ...طلعيلي ملابس من هذا الكنتور خلي انزل للحجي عيب منه..
نزلوا وامي لازمته من ايده شافهم ابن عمتي وركض لزم بابا وياها ونزله...
الغريب اخواني ساكتين بلا ردت فعل كان مبين عليهم اغراب وبمكان مو الهم ...
سلم بابا وكعد .
الجد..سلامتك ابو ناديه شلون عافيتك طمنا ..
قاسم ..الحمد لله ...بشوفتكم احسن ان شاء الله ...اعذرني عمي زحمتك وادري ذبيت الحمل عليك من زمان ...حاللني و واهبني ...
الجد...هاذا شلون حجي منك بويه انت ابنا نحملك بالمره قبل الحلوه ياوليدي لاتفكر بشي اهم شي ترجع عافيتك وترد قاسم الاولي ابو ناديه ...
مسح بابا دموعه بشماغه وجابت ام ناصر الغدى اكلنا وشربنا الجاي ...واسامه ويانه ماخذ راحته مبين علاقته قويه ويه بابا ..
قاسم ...اسامه اخذ جدك للغرفه خلي يتمدد ..كوم حجي
اسامه ...يلا جدو تعال ارتاح ...
راح جدي وياه لغرفه بصف الهول ...
اسامه ...خالوا من رخصتك راح اخذ الولد لبيتنه ونرجع المسه ...
قاسم ..بكيفكم وليدي بس حط عينك عليهم..
قحطان ...شنو حجي احنه اطفال ...
سكت قاسم والتفت على اسامه...
ميندلون هنا هاي اول مره يجون ...
اسامه ...صار خالوا بعيوني يلا باشوات اتفضلوا ...
طلعوا بقينه اني وامي وبابا ...
قاسم ..هابابا عجبج المكان ...
ناديه..اي بابا حلو ..
قاسم ..شونهم بيت عمج عبد الكريم سمعت زايرينكم للبيت ..
ردت احجي دخلت ماما ...
سميره..يااا مو رفيف بنتهم داوم وياه ناديه بالمهعد ومتعرفه عليها وجابت اهلها حتى نتعارف ...
قاسم ..خير ان شاء الله ..
خوش مريه زوجته ادميه ..
ناديه يوم خلي اطلع للبستان اشوفه ..
سميره ..يمه شجرالج ....تحجي وساده سنونها ...
اكعدي باجر قبل ما نرجع تشوفينه ..
قاسم...وين ترجعون ...سميره شحجيت وياج ..ارحميني يرحم اهلج .....
دنكت سميره عيونها ...الله كريم اهم شي عافيتك هسه ...
قاسم ..انتو عافيتي ام ناديه ...ابقوا هنا وكلشي ماريد ....
لاول مره اشوف ابويه يتوسل حتى نبقى عنده ولا كأنه هو نفسه الي اجه بيوم يريد ياخذنا من امي ....
وللحكاية بقيه 🌷
احبكم متابعيني الصامتين 😅
