مرت اربع ايام واحنه بالبصره خابر بابا لعمو صديق حتى يروح يطمن خوالي على وصولنا ...بابا واسامه اخذو قحطان وعدنان للشركه مال بابا تصديرالتمور الصبح حتى يشوفهم الشغل ويتفرجون على البصره ...
وجدو كال لازم ارجع مباقي للعيد شي وتصير القطارات زحمه ...
سميره ...اني ارجع وياك حجي يلا يمه اجمعوا غراضكم ...
ناديه...ماما شلون نرجع وبابا ...
سميره ..الحمد لله صحته زينه ويجوز ترجع الخاتون لبيتها على العيد ...مالنا مكان هنا ..
ناديه ...اكيد ابويه مراح يقبل متشوفينه صار يومين يطلع اخواني وياه دلاهم على بساتينه ومحلاته واليوم اخذهم للشركه ...يريدهم يمه ماما ...منكدر نرجع ونعوفهم هنا ...
سميره بعصبيه. ...اسكتي ناديه انتي متعرفين شي ...حجي اني ارجع وياك ..
الجد ...لابويه مترجعين هذا بيتج وتشوفين الرجال شلون طاير بولده وبيكم ...ليش تبعدينهم عنه ...فكري بعقلج بنيتي شفتي من وكع شلون جبتينه مناك لهنا ...
سميره ...وهسه صار زين وكلمن يرجع لمكانه ...
الجد..لابنيتي انتي العاقله الفاهمه هذا بيتج وبيت ولدج وحلالهم ...ليش تخلين الغريب يطمع بي ...
سميره..يابه موهيج جان تفكيرك ...
الجد ...الدنيه تغيرت بويه والولد كبروا ولااني دايم الج والهم ...الرجال حس بغلطه ..صح متأخر بس هاي هيه نحمد الله من وعى النفسه ورجع الكم ...
سميره ..شلون يعني اضل هنا مكابله ورود ...لابويه اموت بقهرتي ...
الجد..ارتاحي ورود ماترجع بعد ....
سميره ...شمدريك يابه هو مطلكها ...لو لا
سولفلك عنها ...
الجد ...بويه لا تسولفين بعد بسالفتها المره خلص بعد ما ترجع لتظلين دورين بسالفتها ...اني الصبح راجع لبغداد وانتي صيري سباعيه مثل ما ربيتج واعرفج عينج على قاسم ترى تعبان وولدج حطيهم كبال عينج ...
سميره..بويه خوفتني ...ما اكدر مااصبح بوجهك ووجه امي شعندي هنا ...
الجد ...عندج ولدج وابوهم وحلالهم ...
هذا بيتج سميره صيري عاقله وسباعيه ...
باليل جدو خبر ابويه بسفره ..
قاسم ..عمي ابقى هنا وكلنا نروح مصباح العيد لبغداد ...
الجد ..لابويه هاي امانتك وصلت لك اني هم عندي حمل هناك اباريه ...
اسامه ..خالو اني نازل لبغداد واوصل جدي ويايه ...
الجد ..هذا هوه يجدي ورى السحور نطلع ...
جنت يوميه اصلي الفجر واسمع ام ناصر وجنتها بالبستان يحلبون الابقار اويخبزون ابقى اباوع عليهم من الشباك ..
من تعلى الشمس انزل وياهم اخواني تعلموا يطلعون على الشغل ويه ابويه بس قحطان يلح يريد يرجع لبغداد بس امي فهمته ان هذا مكانه وابويه محتاجنه يمه ...
صار العيد وهذا اول عيد ويه ابويه اخذنا صلينه صلاة العيد بخطوة الامام علي ...
صح حاره لكن اجواء العيد مبينه على الناس ...اشتريت فرارات اني وعدنان وكمنا ننفخ عليهن وامي تضحك عليه تكول ..لا صرتي معلمه وتفرين فراراة ههههه..
رجعنا للبيت جانت عمه كريمه ولدها اثنينهم وزوجها جاين علينا ..
سلمت علينه بتكلف بس بوست بابا ..
لكن زوجها كلش خلوق وحباب سألنا عن امورنا واحوالنا بغداد ..الظاهر شايف الولد بيتهم من قبل بس اني مشايفني ...
اسامه نفس غرور امه لكن اخو شبه ابوهم بكلشي ...
صعدت لغرفتي تذكرت لمتنا بيت جدي هسه ملتمين ولعب وسوالف اكيد قدوري هناك يتذكرنا وهيومه وبيبي كعدت على الكرسي طكيت بجي حتى للغدى منزلت ...اريد ارجع كافي ....
صعدت امي ...ناديه انزلي عيب من الجماعه ..
ناديه ..ما اشتهي يوم ...
سميره ..شبيج يمه ليش تبجين مو هسه فرحانه شجرالج ...
حظنتها ....
اريد ارجع اشتاقيت لخوالي وجدو ولكلشي هناك فدوه خلي نرجع يوم ..
سميره.. باجر راجعين كلنا لتبجين العصر ياخذنا ابوج للسوك نشتري ملابس للعرس ويعشينا بالمطعم بعد شنو تأمرين حبيبه ...
ناديه مسحت دموعها ..يا عرس ماما ..
هيام وقدوري ...صارت صدك ...شوكت ...
سميره ..انطيني مجال يمه ...صح هيام لعروسه بس مو الي بالج راح تتزوج خالد ابن عمج ووبعد باجرالحنه مالتهم ....
كمزت ناديه ...صدك ماما ...عليج الله ...
سميره ..اششششش فضحتينه مخبله شجرالج ...يلا يلا كدامي هسه وبعدين كمزي براحتج ...غسلي هاي العيون المدمعه بسرعه ...
اسامه ....
اهلا اني اسامه ابن عمتهم كريمه كملت معهد محاسبه ولزمت شغل ابويه ومرات اصفي حسابات خالي ....
اول مشفت ناديه كلش عجبتني هدوء وثكل ورزانه وفوكهن جميله وعيون شهل وبيضه ...رشيقه جدا ...تجاهلتها مجرد السلام بينا ...حتى اعرف نفسيتها شنو ...واني اشيل الجنط اول منزلوا شفتها عصبيه كلش ...عرفت متحب احد يتجاهلها ...بقيت اتردد على خالي واخذ الولد افرهم يشوفون المنطقه لكن مسولفت وياها اي شي ردت اعرفها اكثر ...استتدرجت عدنان بالسؤال عن احوالهم بغداد ..عرفت هي طالبه معهد عالي وتريد تكمل دراسة حتى درس بالمعهد يعني عدها طموح وهذا حببني بيها اكثر ...
اخذناهم لبغداد عدهم عرس ..اني ترخصت ورحت لبيت خالي هناك ...
