نزل خبر روحتنا للبصره ويه ابويه مثل الصاعقه على ماما ...تهسترت وكامت تخربط بالكلام ساعه تعاتب ابويه وساعه تلعن حظها وتدعي على نفسها .....
جدي طلب منها تطلع وصاح على مرت خالو اجتي اخذتها بس مدخلت للاستقبال لان جدي طلعها لامي لبيته ...
صارت امي كدامنا وخالتي حاضنتها وتمشيها ...راسا شبكتنا اني واخواني وكالت يلا بسرعه خلي ننهزم هذا يريد ياخذكم مني ....بسرعه انطوني عبايه ...مدام ابويه يمه خلي نطلع ...
سحبتها بيبي ....
يمه.... سموره حبيبه ...سمي بالرحمن بنتي ...اشو باعي عليه محد ياخذهم منج يمه شوفي هذا اخوج ابو قدوري اجه باعيلي يوم ....اشو تركي نداوي ...
تركتني امي واخذتها بيبي لغرفته وهي كأن موبوعيها تمشي بلا شعور ..مددتها
بيبي على السرير وطلعتنا من الغرفه ...ظلت تقرأ ايات وتسمي على راسها ...
ابو قدوري ...السلام عليكم ...
الحجي ..عليكم السلام تعال بويه اكعد ...
قاسم ...اهلا ابو قدوري ...شلونك ..
ابو قدوري ...جنت زين بس وصلني خبر خرب عليه زينيتي ...خير بويه شصاير ...
قاسم ...اني جاي اخذ الولد وناديه ويايه يعيشون هناك بالبصره ...
ابو قدوري ...وامهم ...
قاسم ...سميره ب راحتها تريد تجي بكيفها تريد تظل ورقتها توصل لي يمها ..
ابو قدوري عصر كف ايده بغضب ...لزمه ابوه الحجي من كتفه ...
الحجي ..يعني انت جاي تريد طلك سميره وتاخذ الاولاد ..
قاسم ...اني مكلت هيج اني أخبرها تريد تجي اهلا وسهلا متريد براحتها ...وحتى ولدها كبروا ميحتاجوها بعد ....
كام ابو قدوري ولزم قاسم من قميصه وصاح عليه...
انت تدري بنفسك شكاعد تحجي ...
قاسم ..نزل ايدك رحمن ميصير تتصرف هيج ويايه ...
ابو قدري ...لا بويه اصلا لازم اسويلك حفله ومزيقه (موسيقى) على هذه سوالفك ....لك انت واحد جبان حسافه هذوله ولدك ...يابويه من اشوف قحطان وعدنان وغيرتهم على اخواتهم وشهامتهم احمد الله الف مره لان مطلعوامثلك جبان ...
نفض ابو قدري ايده من قاسم ...
يابه سميره وين هيه ولدها ....
الحجي دزيتهم بيتنا ...
قاسم ...اني طالع ...الاثنين اجي الكي غراضهم جاهزه ...بس كتبهم ياخذونها لان الخاتون خالتهم محضرتلهم هناك كلشي ...
ابو قدري ...اي هيج كول من البدايه دزتك الخاتونه حتى تاخذلها ولد اكبار مأدبين اخلاقهم عاليه وبنيه مثل الشمعه كامله مكمله ....وسميره لجهنم ..اهم شي الخاتونه ترضى عنك ...
هد عليه خالي يريد يضربه لكن جدي صار بينه وبين قاسم ...
طلع قاسم واجى جدو وخالي لكوا عدنان وقحطان كاعدين بالغرفه الثانيه واني ويه البنات يصبرون عليه ...وامي على حالها متحجي بس تهذي ولزمتها الرجفه ...
ابو قدري ..تعالي باباتي .ابني قحطان تعال انت واخوك ...
باباتي اسمعوا مني لتنقهرون ولاتخافون مادام جدكم واحنه بالوجود محد يتعرضلكم والصار اليوم هاي فورة اعصاب لتشيلون هم لو اعرف اسويها حرب متطلعون منا الا برضاكم ...
دنكوا عليه اخواني باسوا راس خالوا وهو حظنهم حتى يهدوؤن شويه واني اباوع عليهم قحطان طبعه مثل خالو اذاعصب يحرك الدنيه وهو ضخم بس اسمع زفراته للهوى عبالك يتعارك وياه
وعدنان خال راسه على كتف خالو وساكت ...
عدنان من هو زغير ويه امي حتى اكثر مني ...يعني صدك هو وقحطان توم لكن قحطان اسبع منه وجريئ اكثر يطالب ويتعارك على حقه والشي الي يريده ...
وعينا على صرخت بيبي ...
يمه سموره جاوبيني ...يمه اسم الله الرحمن ....ولكم تعالوا الحكوا عليه ...
ركض خالي والولد لكينه امي مغمى عليها ...شالها خالوا وقحطان لفها بعبايتها هي جسمها كلش ناعم وركض بيها للمستشفى قريبه علينه ...لحكوا بيبي وعدنان ومرت خالي وما اخذوني وياهم
جدي بقى بالبيت يمنا ...
دخل توضأ ويصلي ودموعه دير سكته ...
مرن اكثر من ثلاث ساعات وصار اذان العصر وهمه ماكو ولا احد بلغنا شي ...
واني كاعده بالباب من الداخل اريد اروح للمستشفى وجدي ميقبل ...
انفتحت الباب دخل خالو مناضل ميدري شكو ..لان جان بالنجف ويه اصدقائه ...
مناضل ..خير نداوي شكو كاعده هنا بهل البرد ...شبيج ...
علاوي ...عمو غير اليوم اجه ابوها يريد ياخذهم وياه مدري وين وتعارك ويانه وعمتي تخربطت و شالها عمو رحمن للمستشفى ...
(نطاه علاوي نشره مفصله 😂)
مناضل ..صدك هذا يحجي ...
متحملت كمت اشهك وابجي ...
خالوا فدوه اخذني للمستشفى كلهم هناك وجدو ميخليني اروح عليه ...فدوه اريد اشوف امي ...
مناضل سهله سهله باباتي ...التفت على علاوي
وينه جدك ...
علاوي ..يصلي بالغرفه...
دخل خالي واني بقيت بالباب اجتي هيومه توسلت بيه اطب مقبلت راحت و جابتلي بطانيه وكلاص جاي
هيام ...هاج نداوي فدوه ةشربي كثرتله شكر يلا اشربيه لتتمرضين ...هسه تجي عمه كلشي مبيها ...هياصلا متقبل عليج كاعده بهذا البرد ...
اخذت الكلاص وهي لفتني بالبطانيه وراحت لخالو مناضل يصيحها تصبله جاي ...
هيام ..فدوه عمو اخذها لعمتي بالمستشفى ترى راح تموت من البرد وليهسه بلا اكل ...
شرب خالي استكانه وصاح نداوي يلا بابا نروح نشوف امج ...
دخلنا للمستشفى لكينه خوالي الكبار اثنينهم واخواني واكفين بابا غرفه كال خالي تعالي هذوله ...
دخلت امي نايمه ومشكلين بيدها مغذي
ذبيت نفسي عليها وسحبتني خالتي ...
ماببها شي حبيبتي كومي ...الصبح يطلعوها ...
ناديه ..خاله لعد ابات يمها هنا ..
قدوري ..لا ميصير تبقين هنا هم الصبح طالعين ..
الحجيه ...صدك يمه اكعدي هسه شوفيها وتالي اخذي اخوانج وصيري سباعيه ..احنه الصبح يمكم ...
رجعنا للبيت جدو اخذنا يمهم نام بس منو نام ولاواحد عبالك النوم هجر عيونا ...
للصبح طلعت امي للبيت بس ساكته تباوع علينا الدكتور كال هذه من الصدمه لتخلونها تبقى لوحدها ولا تحجون بالموضوع كدامها ...
