بقى قاسم بيت اخته نزل للسوك اشترى هدايا وصوغات لسميره وبعض من اصدقائه الي بغداد وللعامل مالته ...وبرجعته من السوك شاف خطار عند اخته نسوان خوانم مثل متسميهن كريمه ....صعد لغرفته وبدى يحضر غراضه حتى يرجع لبغداد ..دخل عليه ابن اخته الزغير وكاله ..خالي ماما تريدك بالصاله.....
نزل قاسم وسلم على صديقات اخته ..الي كانت متقصده تراويه شلون مستوى صديقاتها الي كان ممكن تكون وحده منهم زوجته ...كعد وياهن وكانن يتفقن على جمعيه خيريه يدرسون بيها اللاولاد ويعلمون النساء على الخياطه قرر قاسم ان يكون وياهن بهذه الجمعيه او المؤسسة ...لكن الي جذب قاسم اكثر هو نزاكة وترافة ورود خانم الي كانت تقريبا تدير الحديث وياه بكل سلالسه تختلف عن النسوان الي يعرفهم ..
ورود كانت بنت واحد من تجار البصره مكمله دراستها الجامعيه بمصر لذلك عدها نوع من القوة والجرأه والصلابه بالحديث والاقناع وهذا الشي الي كان معدوم بالنسبه لنساء ذاك الوقت بحكم العادات والتقاليد الي غالبا ماتمنع البنات حتى من التعليم ...
بقى قاسم مستمر بالكلام ومنجذب لورود وسوالفها عن الحياة بالقاهره واختلافها وشلون كدرت تسكن هناك اربع سنوات وحدها ...ونصحته يسافر لهناك للترفيه وزياره معالم مصر ...
بعد ما انتهت الزياره وطلعن الخوانم ..التفت كريمه لاخوها مبتسمه ...ها قاسم لازم عجبتك سالفة القاهره 🙄..
خجل من كلامها وابتسم ...لا خويه وينه ووين القاهره ...
بعد الغدى ودع اخته واولادهاو
وصله ابو سامر للمحطه حتى يركب قطار بغداد..شكره قاسم على ضيافته وطلب منه يدورله على بستان بمنطقتهم للبيع لكن بدون علم كريمه ...
وصل قاسم قريب نص اليل لبيته نزل اغراضه وقرر الصبح يروح على زوجته ويجيبها وينطيهم صوغاتهم من البصره...
بعد صلاة الصبح دخل خلى بيض سلك وخلى القوري حتى يسوي ريوك ..تالي تذكر انو ماعنده خبز ..شرب الجاي وعاف البيض بالجدر ولبس ملابسه وطلع للمخزن ..سلم على صديق ودزه يجيبلهم ريوك وقوري جاي ونطاه حصته من سفرة البصره وتشكره صديق وتحمدله بالسلامه ...مشى اليوم مثل كل الايام تحميل ومراجعه للحسابات الى ان صار الظهر راح لبيت عمه ابو سميره حتى ياخذ زوجته ...
دك الباب طلعله الحجي ابوها الي كان هسه راجع من شغله للبيت وسلم عليه ودخله صاح على سميره الي اجتي بسرعه من سمعت صوت قاسم بالباب يلا بويه حطولنا الغدى ...
جاوبه قاسم .دايم عمي بس تدري تعبان مومال اكعد مريت انطيك صوغتكم واخذ سموره لبيتها ..
ركضت لملمت اغراضها وكانت امها مخيطتلها كم نفنوف خلتهن وياهن وطلعت فرحانه بشوفة قاسم ...
وصلوا لبيتهم دخلت تصب الغدى الي جابته من اهلها وقاسم هم موصي على كباب شافت البيض مسلوك وقوري جاي بالمطبخ ..سألت قاسم ...قاسم شوكت رجعت من السفر ...
البارحه ورى نص اليل ...عود ردت اسوي ريوك ملكيت خبز تالي بقن البيضات مثل متشوفين 😄😄...
يااااا شعندك سوالف لو جايني من وصلت جان سويتلك احلى ريوك عيوني انته ..
سموره انتي عزيزتي تدرين شكثر اشتاقيتلج هناك تندمت لان ماخذتج وياي ..
اني هم اشتاقيتلك عبالك مضيعه روحي بدونك 😙 ...
مشت احوالهم عاديه مثل كل يوم لكن قاسم كثرة صفناته ويه نفسه يراجع بيها كلام ورود خانم وبدأ يقارن بينها وبين سميره الي كانت لاشئ بالنسبه لتعليم وثقافة ورود وتلقائيتها بالكلام حتى بطريقة شربها للشاي ...
لاحظت سميره هذا الشي على قاسم وبادرته بالسؤال ...اكول قاسم ماسولفتلي شلونها البصره حلوه محلوه ؟؟
باباتي هي ولايه مثلها مثل بغداد اسواق ومناطق سكنيه بس هي بساتينها حلوه وبيها الميناء وشط العرب تشوفيين اشكال الوادم بي ...
ياا زين لو صارت سفرتك مره لخ اروح وياك .
صار شعدنه غير سموره الحلوه ..
بهاي الحظه دك عليهم صديق الباب طلعله قاسم ..
عمي هاي رساله من البصره جابها ابو محمود يكول مستعجله وخابر ابو سامر ضروري ...
ياساتر يالله ..صار ابني اني جاي وراك للمخزن ...
رجع للبيت غير ملابسه وطلع من غير ميجاوب يميره الي بقت بحيرتها وتتسائل شكو بيها البرقيه ويخابرهم ضروري ...
وصل قاسم للمخزن وخابر ابو سامر ..
قاسم ......الو بيك شلونك خير طمني عليك ..
ابو سامر .....هلا قاسم افندي يابه مابينه شي انت مو ردت بستان قريب علينه ..لو غيرت رايك ؟؟
قاسم ..لا شلون اغيره بعدني بشرني لكيت ؟؟
ابو سامر....اي موجود نص بستان ورى بستان الباشا جيراني حلو ونخل محمل وحمضيات وبي بيت زغير يكفيكم ...وسعره مناسب ...شدكول تجي تشوفه ..
قاسم ......ذا هيج لازم اجي اتفق ويه الجماعه وانطي عربون واني يومين ونازل للبصره ...
رجع قاسم للبيت باليل وتلكته زوجته والحيره على وجهها خيرك قاسم شبيهم الجماعه ...طمني ..
قاسم .....لا ماكو شي اطمني جنت موصي ابو سامر على بضاعه وهسه واصله للميناء يوميين واروح استلمها ...
همراح تعوفني لوحدي 😌
يابويه شلون بيه ...عيوني غير شغلي هيج لو عليه اقفل الباب واكعدلج بالبيت ياعيوني انتي سموره ..
راحت تحضر العشى وهو دخل يحسب فلوسه ويحضرهن لشراء البستان بدون مايخبر سميره بشي ...لان هو تفكيره انه هذا شغله وفلوسه ماداعي تدخل او تعرف شي مايخصها 🙄.
وفعلا رجع للبصره بدون مياخذها مثل ما وعدهاوهي راحت عد اهلها ....وصل لمكتب البيك وكمل اجراءات التسجيل وصار البستان ملك لقاسم بعدها اخذه البيك وياه البيت ....كان يتمنى يشوف ورود بيت كريمه او حتى يسمع اخبارها ...بعد العشى سأل كريمه عن المؤسسه ومنها يعرف اخبار ورود ...جاوبته كريمه ...حددنا المكان واشترينا بيت باقي على الصبغ وترميم ورود خانم سافرت لمصر تشتري اللوازم الباقيه وتتعرف اكثر على طبيعة شغلهم هناك حتى تكون بدايتنا صحيحه ...
تحسر قاسم من عرف بيها مسافره ...
قاسم ....بالخير ياخويه واي شي تحتاجون اني وياكم ...يا الله اني من رخصتكم اروح انام حتى الحك قطار الصبح ...تصبحون على خير ..
كريمه ...هاي شنو ياخويه ...موتبقى يومين ...
قاسم.... ما اكدر اضل شغلي هناك معطل ...
وان شاء الله صرنا جيران بعد راح تملون مني ....
ابو سامر ...هاي شلون كلام قاسم افندي البصره كلها الك ياخويه ..
قاسم ...مشكور ابو سامر ماقصرت خيرك سابق ..
وصل للمحطه الفجر وركب القطار الي راجع البغداد ...وصل وقت الظهر وطلع اخذ زوجته ورجع للبيت فتح الباب ودخل لغرفته وقفل الباب هي بقت مستغربه شنو يضم بكنتوره وميريدها تعرف بي فقررت تسأله العصر ...كعد من النوم وقرر يبقى بالبيت للراحه من تعب السفر سوت سميره جاي وجابتله استكان وكعدت ..
سميره ....اكول ابو محمد مو واعدتني تاخذني وياك للسفر ..
قاسم ...ياسموره صارت السفره مستعجله مرة الجايه الا اخذج ويايه ..
سميره.....شنو تشتري من البصره ...
قاسم....كل شي بيها تمر بقوليات فواكه احملهن بالقطار واوزعهن على تجار بغداد ...
سميره ....هاي التجاره هلكد تحتاج فلوس شفتك اخذت مبلغ جبير وياك ...
هنا ثارت عصبيته عليها وصرخ بيها متدخل كاللها ...
قاسم.....شنو صايره تجسسين عليه سموره خاتون
سميره ...لا لا ...موهيج بس ردت اعرف شغلك ياعيني..
عافها وطلع وهي مكدرت تحصل منه كلمة تريح بالها ...
فد يوم طلع قاسم عزيمه بيت صديقه وصلت برقيه ورساله دزها ابو محمود بإيد ابنه لبيت قاسم وتمكنت سميره من فتحها لانها ورقه مطويه .. حاولت تقراها معرفت لانها ماتقرء فتحت الباب وصاحت واحد من الولد الزغار .....قرالها الرساله جان مكتوب بيها .
..قاسم افندي بعد التحيه يرجى حضورك للبصره لتسجيل البستان بالطابو ولحظورك حفل افتتاح المؤسسه باعتبارك احد المساهمين بها ...
اخذت الرساله وسدت الباب وهي تحاول تحفظ ما قراه الولد حتى تكدر تستفسر من قاسم لو رجع ..
المغرب بعد الصلاه رجع للبيت سلمته الرساله الي تفاجأ بيها شلون وصلت للبيت كالتله ...حجي ابو محمود دزها بيد ابنه ...اخذها وكعد يقراها والفرح مبين على وجهه كاللها حضري جنطتي عندي سفره للبصره ...
ترى انت وعدتني تاخذني وياك ...ردت عليه سميره بنعومه حتى يلين قلبه عليها
صار سموره واني عند وعدي وحتى محضرلج مفاجأه هناك شتريدين بعد ... .
راحت طايره من الفرح بوسته من خده شوكت نسافر اليله ..🙄
يابويه هيج تريدين بهل ليل نسافر 😅
الصبح نطلع غبشه نلحك بالقطار لو وحدي جان هسه طلعت للبصره لكن باليل القطار ما مأمون بي حراميه وعصابات وطريق مو سهل وانتي ويايه دكومي حضرينه شي خفيف ناكله حتى نروح ننطي خبر لهلج بسفرتنا ...
طلعوا لبيت اهلها وودعتهم وهي كلها شوق ولهفه للسفره ..
وصلوا البصره قريب العصر وقرر قاسم ميروح لبيت اخته اخذها للفندق حتى يرتاحون وباليل يرحون لبيت كريمه ...طلعوا للشط وشافت البصره وجمالها واخذها لمطعم بي البشوات والبيكوات حتى يتعشون ...سحبت ايد قاسم وحاجته بهمس ...
هاي وين طببتني داده قاسم سترك ربي المكان كله زلم افنديه وهاي النسوان شلون كاعدات هيج بلا حجاب بنص الوادم يااا
ضحك عليها قاسم من كل قلبه ...
بويه هذوله كبارية البصره ووجهاءها وهذني نسوانهم وصدقانهم هم هيج طبعهم اخذوا شمرت الإنكليز ماعدهم شي ميصير ...
شعلينه منهم خلي نطلب عشى حتى نلحك على بيت ابو سامر ...
بقت سميره صافنه على المطعم واجواءه الهادئه وتلم بعباتها مانتبهت الا الكرسون خلى الاكل كدامها ...بعدها طلعوا لبيت سميره وتفاجأت اكثر بالبيت والاستقبال ولبس كريمه وكلامها الي كان اخف حده عليها من المره الماضيه ...طلبت منهم يباتون يمها لكن قاسم فضل يرجع للفندق حسب ميكول اريد اونسها لسموره واسويلها شهر عسل جديد 😍 ....
رجعوا للفندق كاللها قاسم اخذج الصبح للمستشفى الانكليزي بي دكتوره يكولون نسائيه حتى نشوف وضعج ليش سقطتي وتالي عندي الج مفاجأه تعجبج ..
سميره ..صدك قاسم اني صاحيه لو نايمه ..
قاسم ....شوف.. شوف ليسمعج يكول جنتي محبوسه بالقلغ (السجن)...
سميره ...لا بس مامتعلمه دوم اني لوحدي بالبيت ياعيوني ...
قاسم ...ان شاء الله متظلين لوحدج بعد ...يلا بويه نامي عدنه كعده اصبح ...
الصبح طلعوا للمستشفى شافتها الدكتوره طلعت سليمه ماكو شي يمنع الحمل والاسقاط عرضي ونطتها حبوب ووصتها تأكل زين ..
سميره ...هاي ادويه كل يوم حبايه الصبح ولازم اكل زين ...وعلى الله ..
قاسم ...ونعم بالله ماعرفتي ليش صار الاسقاط .
سميره ..دكول عرضي يعني هيج من ضوجه لو قهره حتى كالتلي لتعاركين ويه رجلج بعد 😄....
قاسم ....داده انه معاركج جاي صوبج ...نزول عليج سموره😅..
هسه نطلع للبستان ...
سميره 😮...يابستان ...
قاسم ...مالتي شتريته بالبصره يم بستان كريمه صح زغير بس ماشاء الله عامر بالخيرات ...نعمه من الله ..
وصلت سميره وهي ممصدكه بالخبر شافته صدك جنه سبحان الله وفلاليح بي نفسهم ما طلعهم قاسم والبيت هم ينسكن بي ميحتاج شي غير اثاث وصبغ ...
سميره ...ماشاء الله تبارك الرحمان ...
بالخير قاسم افندي ...لا لا... قاسم باشا ..
قاسم.... شبالعجل سويتيني باشا 😊...
رجعوا للفندق والصبح نزلوا لبغداد ...تونست سميره بهل الايام كلش هوايه حتى لليوم تذكرها وتدمع عينها لان كانت ايام صافيه بينها وبين قاسم ....
وبالنسبه للمؤسسه اتأجل الافتتاح لان ماكامل شحن المواد ومكاين الخياطه من مصر ..صار على رجعتهم من البصره شهرين اواقل حست سميره باعراض الحمل وبقت كاتمه الموضوع عن الكل تخاف هم تخسر الطفل وتتأثر حياتها ...
هملت الموضوع تماما وبقت على العلاج يوميه حبايه...
طلع قاسم للمخزن وطلبت منه يدزلها ام سعيد وصبيحه حتى يعزلن البيت ويسون دولمه ياخذنها للزياره وياهن بالكاظميه ..
قاسم ...اني راح ادزلج صينيه كباب سوها لفات ووزعوها هناك بس ماكلتيلي لويش هل النذر والتوزيع ...
سميره.. من ازور وافك النذر باليل ارجع اخبرك عيوني 😚.
سكت قاسم وطلع ..بعده اجتي ام سعيد وصبيحه ودخلتهن سميره ...واخذت ام سعيد للغرفه ...
سميره ...خاله اريدج تبشريني انه يمكن صارلي حامل شهرين شهر ونص بس محد يعرف ....
ام سعيد ...يااا يوم المبارك يمه ان شاء الله خير ...
كشفت عليها ..وطلعت صدك حامل ...
ام سعيد ....يلا هسه لازم توفين النذر هاي انتي حامل على الخير والتمام ...
سميره ...تسلمين خاله مسواك الدولمه حاضر بالمطبخ وابو محمد راح يدز كباب ورى صلاة الظهر هم ناخذه ويانه ...خطيه عود هو ميدري بيه حامل ....
ام سعيد ...يااااا وين اكو رجال ميدري بمرته حامل ...نزول عليج سموره ..
