شعليكم انتم رحتوا اتلومونهم!
حتى العذاب اشكد حلو البعيونهم!
خلوهم ابراحتهم
ايعذبوني!
الدمع دمعي والعيون اعيوني!
احبابي همه وما اعيش ابدونهم!
شعليكم انتم رحتو اتلومونهم!
::::::::::::::
مروا عله البيبان عافوا بابنه!
لا ما أصدك ذوله همه احبابنه!
ماعاتبينه
اتحملينه امصابنه
خافن يزعلهم ابيوم اعتابنه
بس رايد اعرف همه هسه اشلونهم!
شعليكم انتم رحتوا اتلومونهم!
:::::::::::::
الدنيا قسمه وقسمتي ابفركاهم
بس المصيبه الما كدرت انساهم!
ماظن
يجون
وناطر اتلكاهم!
هلبت يردون العقل وياهم!
شوفوا العذاب التركوا ابمجنوهم!
شعليكم انتم رحتو اتلومونهم!
كظوم
اجت راس السنه وما اريدك اتعود
ضل ابغيبتك وابعد عليه
انه ابكل سنه امحضرها الورود
واشموع الفرح وايدك بديه
ما احتاجك ابهل ليله موجود
لان مو باسمك الليله الهديه!
عايفني ابدمع يجرح بالخدود
ورايح لشماته ابهل ثنيه!
هاليوم البس احمر وانزع السود
عليمن انقهر علمو اليه!
انساك وبعد ما اردلك اردود
واحسبك انته والماكو سويه
كظوم
وجهك براءة طفل
يگتلني من يبتسم
وبهاي گلبي اعترف
من تضحك انا انسلب
مايبقى عندي عقل
مو رصعة تطلع ولك
خدك احسه انزرف
تدري انته چنك نده
مبلل عيوني شرف
وتدري انه من باوعت
العقل صابه خرف
وتدري بحلاتك كفر
خلت احساسي انحرف
وتدري انا ميت چنت
ماعندي واهس احس
ومن بادلتني القبل
والنفس باس النفس
صار بكياني بشر
والحزن عني انصرف
رديت بيه العمر
شفتك تعيد الخلق
كل بوسه ارجع سنه
يعني انته لو طولت
مايبقى مني طرف
مدري انته طعمك شنو
حيرت ذوق العسل
من ضگت ريجك ورد
والايد هيل وترف
معقول انته بشر
گمت انا اشك بالاصل
متنسية امك گطن
لو بوك وكت العرس
من حسن يوسف كرف
كلمة انته ماتنقري
وبيت انته من الشعر
بالوصف يترس غرف
يا نهر من الحسن
احساسي يمك غرگ
وبيك انه گلبي انجرف
محتاجه يمك يغط
من عذب مايك دهر
ماريده بس اغترف
صبلي نبيذك سكر
بالشفة لون العنب
والريج نكهة خرف
ادنه اشم النفس
ماباقي بيه صبر
خلصت كلش ولك
والبال ذنب اقترف
گربلي اكثر بعد
مابيك حرمة وذنب
الحرمة بين البشر
وانته بصفاتك ملك
وحته الله شكلك عرف
كظوم
اتمنا تنال عجابكم 🍎
