امغيمه روحي!!
كاظم
الليله بس الساتر الله مدري شيجيب القدر!!!
إمن العصر رَفت اعيوني وانعصر كلبي عَصر
امغيمه روحي ابغيمه سوده والوضع ما مستقر!
والسمه البعيوني حمره ساعه وتنكط جَمر!!
الليله من دون الليالي اختلفت ابهذا الأمر!
الليله أحس روحي حمامه ويفتر اعليهه الشمر
خالفت كل الليالي وصعبه احسنهه اشكثر!
رَت أنوم عيني كوه وما نفعني كل عذر!!
وأحس حتى الزمن واكف والهوء كلش فتر!
شنهي صاير يعلم الله مَدري شسمع يا خبر!
أحس روحي ابغابه وحشه وخاليه من البشر
اشراح نسئلمن يروحي وانكسف حتى الكُمر!
ابليلة الوحشه الكئيبه اشضاملي بيها الدهر!
الليله يا حيرة اظنوني دكت انذار الخطر!!!
كون احط كلبي ابجمرته هسه وبجاري النهر
حتى أخلصه من لهيبه ومن ونينه المستمر!
ليله مشئومه إوتخوف وين من هاليله أفر!
وأنه بايد كوه واكف وانتظر يمته انكسر!!
تسحل ابروحي الثواني هاثكلهه من تمر!!
ولن يرن هاتف اجاني هسه وبوقت الفجر!
صوت روح الروح اسمعه بأول احجايه اعتذر
لأن مو وقت اتصاله ايسولف ابنبرة قهر!!
كتله سولف ونسه كلشي شنهي عندك يا خبر!
كال خايف ما أشوفك واهلي ناويين السفر!
ما بقت ساعه ونهاجر واعرف ايطول الهجر
أحس بيه اتقسميت وكل كتر طاح ابكتر!!!
وأحس ما اشوف انعميت وما بقه ابعيني نظر
يوم كال امودعك اني اشتاقلي وشوف الصور
كتله من ترجع أمانه ابسرعه مر لا تنتظر!
على قبري راح تقرأ الك كاتبلك شعر!!!
امودع ابالله حبيبي وبعد شلي ابهل عمر!!!
وبالسلامه اتزور قبري وبيدك اتكض القبر
الشاعر كاظم الاماره
