يقف نبله امام احد الاشجار في كولومبيا ومنتظر الدعم والمدد من الرآس الكبير واثناء ماهو واقف جاهو اتصال من الرآس وقال ليهو ابقي مارق البلد مكركبه واتخارج طوالي ولحدي ما اتصل عليك تاني ...
نبله : لكين عندي التزامات كتيرة ومستلم قروش مقدم وخايف اخش فيها ..
الراس: التزام شنو و كلام فاضي انا اقول ليك البلد كاتمه والا انت دايرهم يقبضو عليك زي صاحبك ممدوح ،اسع اطلع سريع الناس ديل داخلين علي كولومبيا ولو شافوك بشتبهو فيك.
نبله : خير مافي مشكله انا اسع متخارج طوالي .
واثناء ماهو طالع شاف عربية المكافحه داخله وطوالي خشى في زقاق واتخارج جري ولانو لو وقفوهو ولقو عندو قروش بتجرجرو معاهو وبفتحو ليهو بلاغ اشتباه ....
سجن الهداء :
طبعا صاحبنا ممدوح (دحدوح)مركب مكنة الشيكات علي ناس السجن وانو هو زول مهم وعندو شركات والوضع دا خلاهو يستفيد ويرطب في السجن ،وجاهو الصول ودالباشا وقال ليهو عندك زيارة ومشي لقاهم ديل ناس شكروتا وابوالهول ونبله وشايلين معاهم اكل وهديمات وملاية مشرطه ولمن شافهم اتخلع وقال ليهم انا ما وريتكم لمن تجوني زيارة تجو لابسين كويس وتجيبو لي هدوم سمحه ....
نبله : ياخي الحسنه فينا البنجيك زيارة ولو ما العشرة البيناتنا ما كان جيناك اصلا وكمان عايز تتفلسف فينا ...
دحدوح: يانبله انتو اصحابي وانا عملت كدا عشان ناس السجن ما يكشفو امري واسع انا مستفيد وقدرت ابيع جوة السجن وعملت زباين ...
شكروتا : متين قدرت تعمل كدا وماصعبة جوة السجن
دحدوح: في الحقيقة صعبة بس اخوك معلم ومفتح وزول بقدر يقبضني مافي ...
ابوالهول: وبتدخل البضاعه كيف ؟
دحدوح : اسع مابقدر اوريكم بس عايز منكم خدمه ؟
نبله : خير نحنا جاهزين
دحدوح: داير منكم توفرو لي بضاعة حبوب وعندي زول بستلم منكم وبسلمكم القروش طوالي ...
نبله : بس كدا
دحدوح: ايوة بس
نبله: خلاص لمن تهدا الاوضاع شوية لانو اليومين ديل ناس المكافحه مفرفرين وتحركاتهم كتيرة والسوق واقف عديل كدا ...
دحدوح: مامشكله بصبر تب بس ماتتأخرو علي..
شكروتا: ماتورينا الرصه شنو ونكون في محل زولك دا ...
دحدوح: ماتستعجلو وبتعرفو اصبرو لي وبتستفيدو كلكم تمام.
نبله: بس اعمل حسابك.
دحدوح : ههههه افو تاني مابندقس واحلي شغل تشتغل جوة محل الحكومه
قبل مايخلص دحدوح كلامو جا الصول ودالباشا وقال ليهم الزيارة انتهت وقبل علي دحدوح وقال ليهو الحكومه مالا عندك فيها راي
دحدوح : افو في زول بقدر يتكلم في الحكومه واهو ماكلين وشاربين في بيت الحكومه
الصول مااقتنع بكلامو بس عمل رايح ورجع دحدوح للعنابر وناس نبله اتخارجو .....
الداخلية :
زي مامتابعين انو ريم نزلت في غرفة مع ثلاثة بنات (راوية ،حسنية،مها)
واتعرفت عيلهم واندمجت معاهم سريع وبقو اصحاب و مها طلعت بتقرا معاها في نفس الكلية وحسنية و راوية بقرو كلية تانية وفي السنة التانية ،المهم انو ريم ومها بقو صاحبات شديد وبمشو الجامعه مع بعض وبرجعو سوا وراوية وحسنية اصحاب من زمان ،
طبعا حسنية عندها دريبات وتلفوناتا كتيرة وجنها صحبه مع الاولاد وفي الداخلية بالليل بتتكلم بالتلفون صباحي وحتي ونستها كلها كعبة وريم كانت مامرتاحه لتصرفات حسنية وبقت تتجنب الونسه معاها ولمن تجي الداخلية بتعمل فيها نايمه او عندها قراية عشان ماتتونس معاها .
يوم الجمعه الصباح ريم ومها وراوية كانو بفطرو وحسنية كالعادة نايمة وبتصحي الساعه ا ظهر و تلفون حسنية كان بضرب كتير وحسنية ماصحت وقامت مها شالت التلفون وردت :
مها: الو
صوت بت : انتي وين ياهبله شكلك نايمه قومي التقوم قيامتك.
مها: معليش يااخت حسنية نايمه لسعه .
البت الفي التلفون: انت منو ؟
مها: انا مها صاحبتا ..
البت: نان الشلاقة ليك شنو وبتردي علي تلفونات الناس غايتو محن عجيبة...
مها: معليش يا اخت بس التلفون ضرب كتير وقمت رديت بس ومعليش انا متأسفه ..
البت: انتي عامله لي ظريفه كمان ،المخلوقه دي لمن تقوم خليها ترجع لي ضروري شديد .
مها: اقول ليها منو ؟
البت : وانتي مالك ومال اسمي هي بتعرف براها
خلاص قولي ليها سوسو بتاعت الكوفير.....🤔🙄
الاسم دا انا ماغريب علي انتو عرفتوها دي منو ...
يلا للحلقة الجاية نوريكم دي منو وعلاقتها بحسنية شنو ودايرة منها شنو....
يتبع.....
