ريم وخالتها لمن رجعو البيت لقو البت الصغيرة قاعدة جنب حبوبتها وبتبكي وقالت ليهم حبوبه من قبيل ابت تفتح ...
وريم وخالتها حاولو يصحوها بس بدون فايدة وطوالي كوركو لي سيدالدكان الجنبهم وجاهم ومعاهو كم نفر ولمن شافوها قالو ليهم البركه فيكم الحاجه متوفية ليها قريب الساعتين وربنا يتقبلها ويلزمكم الصبر....
وصحباتنا انقدن كواريك ..
ام ريم ناس القسم طلعوها بحرس حضرت العزاء ورجعوها بعد رفع الفراش
ونتيجة التشريح ظهرت وسبب الوفاة هو التسمم ووجدت الشرطه بقايا طعام في غرفة المجني عليها وتم اخد عينات وبعد الفحص تبين ان بها مواد سامه ادت الي وفاة المجني عليها .
السجن :
دحدوح شغال تمام وبقي مشهور في السجن وجمال كل فترة بجيهو زيارة في السجن وبدخل ليهو الحبوب في صناديق حبوب البنول المبدله .
وجمال الشغل فتح معاهو وكبر الشغل ووسعو واتعرف علي واحد اكبر مزور في البلد ودا بزور القروش وبجيب ليهو قصطير حبوب بندور وهمية وبلصقو جواها الحبوب المخدرة وبدخلوها السوق وفي نفس اليوم بتتباع .
ابوالهول :
اتصل علي هيثم وقال ليهو تعال لي في البيت ضروري .
وهيثم فات ليهو ولقاهو مهموم وامورجو جايطه وقال ليهو الليله مالك الحاصل عليك شنو .
ابوالهول : زهجت من القعدة في البيت بين اربعه حيطان ومافي زول بجي علي كتير غيرك انت وحتي نبله وشكروتا اتغيرو ومابجو علي ونبله مسك الشغل كلو وبقي المعلم الكبير ومسك محلي وباعني ومابجيب لي قروش كويسة وانا عشان كد قررت انو اعتمد علي نفسي وعشان كدا لازم انزل الشغل وابدا من جديد .
هيثم : لكين ماصعبه عليك وانت حركتك صعبه ؟؟؟
ابوالهول : انا فكرت كويس وفي الاخير قررت انو امشي دار المعاقين واسجل فيهو وهناك ببدا الشغل...
هيثم : معقووووله تبيع بنقو في دار المعاقين كدا حرام الجماعه ديل مساكين....
ابوالهول : ههههه ياسلام عليك يافالح ما اصلو شغلنا دا كلو حرام في الحرام وهي بقت علي المعاقين بس وكمان ديل اكتر ناس زهجانين وبعملو اي حاجه وبالسهوله يخشو عولمه المخدرات ...
هيثم : ربنا يغفر لينا خلاص داير تمشي متين للدار.
ابوالهول : اسع طوالي ودايرك كل يوم تجيني الصباح توديني وترجعني المساء تمام ....
هيثم : كل يوم صعبة وانا مسافر السعودية عندي اجازة شهر.
ابوالهول : مامشكله لحدي ماتسافر وتاني انا بتصرف.
وهيثم ساق ابوالهول لجمعية المعاقين وسجل ليهو معاهم وطلع خلاهو قاعد وجي عليهو المساء رجعو البيت .
وفي البيت سألو اليوم مشى كيف في الدار :
هههه اسكت ساكت مما فت وخليتني صاحبت لي واحد ولقيتو زهجان من الدنيا وقال داير ينتحر ولانو اولادو جدعوهو في دار العجزة وماشغالين بيهو وهو براهو جا دار المعاقين عشان يفرق شوية واولادو شالو قروشو كلها وخلو علي الحديدة وبقو كل فترة برسلو ليهو مصاريف مع السواق ...
وانا طوالي خشيت فيهو واقنعتو ومشينا علي ركن بعيد ولفيت لي سجارة وجريت منها واديتو جر نفس وانبسط شديد وطوالي قال لي داير تاني وبعت ليهو ربع راس بالدين لحدي ما اولادو يرسلو ليهو المصاريف ويديني حقي وشلت منو متر عربون ...
يعني الامور ماشه سكسوليته....
الحله :
ناس القسم استجوبو ميرغني وفي كلامو انو سافر الخرطوم باللوري بتاعو وسعاد المرحومه كانت براها في البيت وفي الخرطوم اتصلو عليهو وقالو ليهو سعاد ماتت وطوالي رجع البلد وهو بتهم ام ريم لانو عندها مشاكل مع سعاد ومعاهو زاتو وكانت كل مرة بتجيهم في البيت وعندو شاهدة جارتهم شافت ام ريم قبل يوم الحادث مارقة من بيتهم وشايله عمود ...
والمتحري استجوب الشاهدة وقالت نفس كلام ميرغني ولقو باقي عينه من الأكل الكان في العمود في التلاجه وفحصوهو ولقو فيهو مادة مسمه وهي نفس المادة الاتسببت بموت سعاد..
وام ريم رفضت تعترف او تدافع عن نفسها وما ادت اي اقول في التحري.
ريم بعد وفاه حبوبتها واتهام امها بقتل سعاد خشت في حاله نفسية وبقت تتكلم براها وهي في البداية لمن جات من الخرطوم كانت مبسوطه وجاية عشان تستمتع بالاجازه مع امها وحبوبتها بس ربنا اراد غير ذلك...
المتحري حول البلاغ المحكمه ووجهه تهمه يالقتل العمد لام ريم وسلموها المحكمه ورحلوها السجن في الخرطوم .
ريم اجازتها فضل ليها كم يوم وقالت لي خالتها انو هي دايرة تشتغل وتخلي الجامعه وعشان تقدر تصرف علي امها في السجن وتنزل محامي عشان يدافع عن امها .
وخالتها رفضت انو ريم تخلي الجامعه وقالت ليها انتي واصلي قرايتك وانا ببيع الطعمية قدام البيت بالمساء وبالصباح بشوف لي شغله تانية وبرسل ليك مصاريف في الخرطوم وانتي اعتني بامك وقرايتك والمصاريف انا بدبرها ليك ...
وبدت تشتغل في نفس اليوم وريم شغاله معاها برمو في الطعمية قدام البيت ....
واثناء ماهم شغالين ببيعو في الطعمية جن عليم بتين ووقفو قدامهن وشالو التراب وكشحو فيهم وبقن يكوركن فيهن .
ديل مالهم معاهم ؟؟؟
ودايرين شنو منهم..؟؟
يتبع....
