سوسو: كدي قوم نمشي والبحصل يحصل
وطلعو المستشفي مع هيثومي وسوسو عرفتو علي ابوالهول اخوها الكضب كضب وبعد وصلو دخلو الحوادث وعملو ليهو اسعافات اولية ودكتور الحوادث قال ليهم جيبو الاورنيك وقال ليهم الزول دا عمل الحادث متين وكيف وهو شارب مخدرات لانو ظاهر من خلال الفحص الاولي ولازم تجيبو الاورنيك ونعمل ليهو فحوصات كامله وعشان نحولو لي الاخصائي للعملية ...
وابوالهول عاين لي سوسو وسوسو طلعت طوالي عشان تجيب الاورنيك ومشت محل الارانيك وفي الممر لقت تبيان كانت شغاله معاها زمان قبل ماتخلي الشغل وورتا الحاصل وانو لازم تساعدهم في الموضوع دا وتبيان قالت ليهم موش دكتور الحوادث دا انا بعرفو كويس دا بكلمه سمحه وضحكه راسو بجي وخلو لي الموضوع دا علي وانا بكمل الباقي ومابسأل عن الاورنيك ولا الفحص وبحولكم العملية طوالي...
المهم تبيان مشت لي الدكتور وحنكت معاهو بكلمتين سمحات وطوالي قال ليهم جيبو العلاجات دي من الصيدلية والصباح الاخصائي بجي عشان العملية وجهزو الدم والاجراءات كلها سريع سريع.
الصباح دخلوهو العملية وبعد خمس دقائق طلع المخدر وقال ليهم زولكم دا بشرب مخدرات والا شنو البنج ابي يمشى فيهو والعملية دي لازم نعملها سريع والوقت مافي صالحنا
وسوسو قالت ليهو بري اخوي هلال دا عمرو مابلع حبوب وزول ملتزم ومن الجامع وللبيت بس بتكون المشكله منكم انتو كدي جربو تاني .
اخصائي التخدير: نجرب شنو انا متأكد وكمان اديناهو حقنتين وماعملن ليهو حاجه .
سوسو : جرب تلاتة ممكن تظبط معاكم .
الاخصائي : هو شنو اتنين وتلاتة هو لعب دا تخدير ومسؤلية انتي بتتحملي النتيجة لو حصلت مضاعفات .
سوسو : بري مابتحمل انتو الدكاترة ودا شغلكم بتعرفوهو براكم .
وفي اللحظة دي جو ناس نبله وشكروتا مخلوعين يادوب عرفو بالحصل وزعلانين لانهم مافي زول وراهم بالحادث .
والدكتور جاهم تاني وقال ليهم العملية لازم نعملها ودايرين توقيع تاني عشان التخدير ولازم زول يوقع علي الإقرار عشان نقدر نزيد الجرعه ونعمل العملية .
وجماعتك بقو ملخبطين لانو خايفين من المسؤلية والغدر مامعروف ولانو مافي زول قريب ابوالهول وبقو يطلعو ويمرقو والدكتور منتظر التوقيع .
وهيثم قال لي سوسو انتي وين اهلكم ماشايف زول معاكم ...
سوسو : كلهم برة الخرطوم ...
هيثم : خلاص وقعي انتي علي الاقرار....
سوسو : انا خايفه عليو وهو اخوي والوحيد.
هنا ناس شكروتا بعاينو لي سوسو محتارين فيها ومن كلامها وماعارفين الولد اللقطه دا منو وعلاقتو بسوسو شنو ..؟؟؟؟
سوسو : ياهيثومي انتا بقيت واحد مننا وعشان خاطري وقع علي الاقرار وعشان اخوي يعمل العملية .
هيثم في البداية اتلبش وبعد مسافه وافق ووقع الاقرار والدكتور دخل عشان يزيدو المخدر ويعملو العملية .
الجامعه :
ريم ومها طلعو من الداخلية للجامعه والايام دي مدروشين لانو الامتحانات قربت فضل ليها اسبوعين ومشو طوالي للقاعة عندهم محاضرة مراجعات مهمة وبعد طلعو من المحاضرة لقو حسنية قاعد في بنش ومعاها ولد حنكوش مفلفل شعرو وسلمو عليهم وقعدو يتونسو مع بعض وعرفتهم علي الولد (مهند دفعتها في الكلية)ودردشو مع بعض وفي الونسة مهند بقي مركز شديد مع مها وبعاين ليها لمن مها اتضايقت منو ومن نظراتو وطوالي جرت ووسوست لي ريم وقالت ليها الولد دا كرهني ويشيل ويعاين لي شديد احسن نطلع منهم .
طوالي ريم قالت لي حسنية عن ازنكم نحنا ماشين المكتبة ناخد لينا ساعه ساعتين .
حسنية : ماتقعدو شوية اشربو الجينه انتو خجلتو من هنودي .
مها : مافي خحل بس الامتحانات على الابواب ...
مهند : لا لا لا لازم تشربو القهوة انا كدا بزعل منكم بليييييس ...
مها اتنفخت شديد وطوالي جرت ريم ومشو طوالي .
سوسو قبلت علي مهند :
انت مالك بتعاين لي مها شديد كدا الحكاية شنو ؟؟
مهند : بصراحه عجبتني وخدورية روعه ....!!!
حسنية : خدرة ناعمه وصوت حنين البريدو ماهو هين .....
يلا انا ماشة وزي ماوريتك ابلع حبه صباح وحبه مساء بس وبتلقي نفسك مرتاح ومالك الدنياء ولو كملن اتصل علي بجيب ليك الكمية الدايرها بس اوعك تدي اي زول من الحبوب دي .
مهند : اسمها شنو الحبوب دي وممكن امشى اي صيدلية يدونى منها.
حسنية : لا اوعك انت بس لو عايز انا بجيب ليك في محلك ومافي مخلوق يعرف انا اديتك الحبوب دي تمام اتفقنا.
مهند : تمام هاك القروش وحسنية طلعت وشالت التلفون عشان تتصل علي سوسو تشوف اخبارها شنو ولانو المدد كمل .
المستشفي :
الدكتور طلع من غرفه العمليات ومدنقر ووشو صاري والجماعة كلهم جرو عليهو اها العملية نجحت...؟؟؟؟؟
الدكتور: انا ماعارف اقول ليكم شنو بس ..
يتبع.....
