لمن حسنية شافت ولد طالع سريع من بيت سوسو ودخلت وسلمت عليها:
سوسو: اهلين وردت السلام ببرود
حسنية: معليش شكلي خربت ليك برنامجك ...
سوسو: هو بقي علي الخراب بس انتي فوتي مني شغل من امو اسع كان طلعت من الزبون علي الاقل بحسابات كويسة
حسنية : مامشكله الجايات اكتر من الرايحات
سوسو: دا زبون مابتفوت ولو حكيت ليك قصتو مابتصدقيني ...!!
حسنية : شوقتيني احكي لي سريع....؟
سوسو: بحكي ليك بس اول حاجه اخدي راحتك واتعشي وبعد داك اوريك قصتو من الالف الي الياء ...
نخيليهم شوية ونشوف اخبار دحدوح شنو :
طبعا دحدوح وهو قاعد في السجن في الفترة الاولي اتعرف علي واحد اسمو (جمال) تاجر مشهور وعندو محلات ودكاكين وعندو صيدليات وبقي يتعامل بالشيكات الطايرة وانضرب ضرب بالتقيل وفلس ولحدي ما دخل السجن وكان مطالب مليارات الجنيهات وقام باع كل املاكو ومحلاتو عشان يطلع وسدد المبلغ وفضل ليهو بس البيت الساكن فيهو وكان باني صيدلية في جزء من البيت وعندو فيها باقي ادوية قاعدة ...
المهم في الموضوع انو دحدوح وجمال بقو اصحاب شديد وطلعو ساكنين في حي واحد ومع الونسة دحدوح حكي لي جمال قصه حياتو وانو مقبوض في مخدرات وبقو فرد للدين ودحدوح استفاد طبعا من قعادو مع ناس الشيكات وبقي ونستو كلها قروش وشيكات وتظهير ...
وجمال بعد دفع الشيكات افرجو عنو وقبل مايطلع بيوم نادي دحدوح وقال ليهو عندي معاك موضوع :
دحدوح : خير انا جاهز
جمال: اول حاجه الموضوع دا يبقي سر بيني وبينك ومافي مخلوق يعرف عنو حاجه؟
دحدوح: ابشر انا كاتم الاسرار احكي وسرك في بير ؟؟؟
جمال: انا شغل المخدرات خشي لي في راسي وعايز اشتغل معاك في الحبوب
دحدوح : انت جادي !!
جمال: ايوة جادي
دحدوح : خلاص لمن تطلع انا بسلمك لي اصحابي وتتفق معاهم ويدوك الانت عايزو ...
جمال: اصحاب شنو انا داير اشتغل معاك انت....
دحدوح : انا !!! كيف يعني مافهمت؟؟
جمال: اوريك الرصه كلها :
اول حاجه انا عديت في السجن دا فترة طويله واتعلمت فكرة من واحد كان محكوم معانا وهو كان بدخل البنقو في السجن وبسحنو وبعبيهو في اكياس وبلخبتو بي كول عشان ريحتو ماتظهر وبدخلو السجن باعتبارو كول وانا بس غيرت الفكرة وهي كالاتي: انا عندي صيدلية في البيت وفيها ادوية كتيرة وانت قلت لي الحبوب بقت متوفرة وعشان كدا انا دايرك توفر لي الحبوب الخرشة وانا بقوم بغير الصناديق والشرايط بحقت بندور او حبوب تانية ،،وكدا ممكن نبيعها في اي حته وكمان نجيب ليك نصيبك في السجن تبيعو بمعرفتك وتستفيد وكلنا نستفيد...
دحدوح: 🤔🤔 مستغرب في كلام جمال وقال: لكين لقيتك ياجمال ابو الشفتنه ذاتا انا موافق ومن باكر نبدا طوالي ...
جمال: اتفقنا وانا بكرة طالع وبعدي لي اسبوع راحه وبتصل عليك عشان نبدا الشغل ...
دحدوح : ابشر يامعلم انا جاهز تب بس انا ماعندي تلفون عندي شريحه بس؟؟؟
جمال : هاك خلي معاك التلفون دا وفيهو رقمي وانا بتصل عليك وانت اضرب لي جماعتك وجهز لي البضاعة ....
دحدوح : تمام اندفقنا تب
جمال : تمام بس ماتنسي السرية ثم السرية واعمل حسابك مايقبضوك ..
دحدوح : افو انا عشرين سنه وانا شغال في المخدرات مابحتاج وصية
جمال: ههههه الخبرة العشرين دي برضو جابتك السجن.
الحله :
طبعا لو متابعين ومتزكرين كويس في الحلقة التانية وقبل ماريم وامها يسافرو الخرطوم ام ريم اتشاكلت مع زوجها وطلبت منو الطلاق وهو رفض وقال ليها من تجي راجعه بتلقي مفاجاءة سارة
وهي سافرت مع ريم وسجلت ليها ورجعت الحله ولمن وصلت البيت وفتحت الباب لقت...
وكانت المفاجاءة .....
يلا نخليكم للحلقة الجاية وفكرو معانا في المفاجاءة دي شنو ......
يتبع....
