لمن سوسو طلعت من حسنية كان جاها اتصال من ابوالهول وكان نفسو قايم وقال ليها : شكروتا كان في كولومبيا ولقوهو ناس المكافحه وزاغ منهم بس انضرب في رجلو بطلقة واسع هو معاي في البيت وتعالي لي سريع وهو بنزف ومابنقدر نوديهو المستشفي لانو بقولو دايرين اورنيك 8 واحتمال يشكو فينا ...
طوالي سوسو استأذنت من حسنية وطلعت من الكوافير ومشت البيت عندها صندوق ازعافات اولية ومشت علي ناس ابو الهول ..
*(طبعا سوسن او زي مابقولو ليها سوسو كانت شغاله سسترة في مستشفي وخلت الشغل )
بعد ماوصلت بيت ابوالهول لقتهم كلهم قاعدين في غرفه موكرة لي جوة وشكروتا مضروب في رجلو وبكورك من الالم وشكلو نزف دم كتير ، ولي حظو انو الطلقة جات سلاخية وقامت سوسو نظفت ليهو الجرح وادتو مضاد حيوي وبقي احسن شوية وقالت ليهم لازم ياخد راحه ومايطلع اي حتة وبجيهو بعد بكره للغيار وتاني ممكن يجيني في الكوافير لباقي الغيارات وقبلت علي شكروتا وقالت ليهو : طلعت جرسه شديد ياشكروتا وطوالي طلعت منهم لانو ابوالهول قاعد في البيت عزابي وعشان الجيران مايشكو ويلاحظو حاجه
معلومه*(ابوالهول عمرو40سنه وكان قاعد مع امو وزوجتو وهو متشاكل معاهم ليهو 10 سنه وماعارف عنهم اي حاجه وكان عندو ولد عمرو 10 سنه قبل ماينفصل من زوجتو وابوالهول اكبر واحد في اصحابو ناس شكروتا ونبله ومسمنو الخال عشان هو اكبر واحد فيهم )
طبعا بعد سوسو طلعت من ناس ابوالهول شكروتا سأل ابوالهول قال ليهو البت دي ظريفة ودمها خفيف وانا عجبتني ..
نبله : ههههه انت عينك الطايرة دي وانت عيان مابتخليها واي بت تشوفها تقول عجبتني كدي لمن تبقي كويس اول حاجه تاني المقابضة ملحوقة ..
نبله وصاحبو صبحي طلعو وخلو شكروتا قاعد مع ابوالهول في البيت لانو محتاج رعاية ولحدي مايبقي كويس ...
في الداخلية :
حسنية كانت في موعد غرامي مع واحد من حبايبها الكتار وجات داخله بالليل متأخرة ولقت الداخلية مقفوله ومافي طريقة تدخل والساعة كانت ماشة لي واحدةبالليل واحتارت تعمل شنو والمشكلة الكبيرة انو علاقتها مع المشرفة حقت الداخلية كعبة ومتدهورة لانو حسنية يومي بتجي متأخرة وطوالي عامله حجه معاها وقبل شهر اتشاكلت معاها وحسنية كانت مخروشة خرشة من امها وقامت ضربت المشرفة لحدي ماودوها المستشفي ولحدي ما اتدخل سيد الداخلية وحل المشكله وعملو انزار لحسنية انو لو عملت اي مشكله تاني بطردوها من الداخلية والغريبة انو الناس بقولو هي عندها علاقة مع صاحب الداخلية وكان داير يتزوجها بس حصل خلاف بيناتهم ...
نرجع نشوف حسنية عملت شنو :قامت اتصلت علي سوسو وبعد كم تلفون ردت وحكت ليها انو لقت الداخلية قافله ودايرة تبيت عندها ؟
نله :تبيتي معاي 😡😡😡 المهم بعد مسافه كدا ..قالت : خير تعالي لي
ووصفت ليها البيت ..
ولمن وصلت وهي داخله علي البيت شافت ولد شاب طالع من بيت سوسو.....!!
ماذا يفعل في بيت سوسو في هذا الوقت المتأخر ؟
وماهي علاقتة بسوسو ؟
هذا ماسوف نعرفه في الحلقة القادمة .....
يتبع.....
