ام ريم شالت التلفون واتصلت علي ضرتها الجديدة سعاد :
سعاد: الو معاي منو
ام ريم: معاك ضرتك وصحبتك ام ريم .
سعاد : مرحب بيك خير في حاجه ؟؟؟
ام ريم : دا كلام شنو ياسعاد نحنا عشرة عمر معقوله تتغيري بالبساطه دي.
سعاد :انا مشغوله بعمل في الغداء لميرغني حبيبي .
ام ريم : بالمناسبة انا مازعلانه في انك صاحبتي الوحيدة وانك عرستي راجلي ودا بحصل عادي في الزمن العلينا دا وانا عشان اثبت ليك انا بكرة عازمه نفسي غداء معاكم وكلمي ميرغني وبجيب غداي معاي تمام .
سعاد طبعا محتارة شديد
وقالت ليها خلاص انا مابقدر الا اشاور ميرغني حبيبي .
ام ريم : مامشكله كلميهو وانا كدا كدا بجي عليكم
سعاد : فقلت الخط ومشت علي ميرغني وحكت ليهو الحاصل كلو .
ميرغني : المرة دي ناوية علي شر بس انا بعرف اوقفها عند حدها اضربي ليها خليها تجي بكرة وانا بتصرف معاها.
سعاد اتصلت علي ام ريم وقالت ليها كلمت ميرغني وقال تعالي بكرة اتغدي معانا .
ام ريم : تمام بجيكم بدري عشان اتونس معاكي وانا مشتاقة ليك كتير.
وقفلت الخط
ههههه بكرة تشوفو عمايل .
سوسو:
رجعت الكوافير ومواصله بيع المخدرات تمام بعد استلمت البضاعه من نبله والامور ماشة معاها سمنه علي عسل وقررت تشتري عربية توسان واتصلت علي هيثومي ولقتو قاعد مع ابوالهول وبقى مروج كبير وابو الهول علمو شغل المخدرات وقالت ليهو يجيها في الكوافير عندها بضاعه جديدة لنج واول مرة تنزل السوق ....
شكروتا:
اتسلم حصتو وشغال ببيع في الاسواق للشماسه وستات الشاي وبتفق مع الزباين وبسلمهم البضاعه كل يوم بطريقة جديدة ومختلفه عشان مافي زول يشك فيهو وخصوصا ناس المكافحه والمباحث طوالي حايمين وبتلقاهم في اي حته.
وهو كل مرة بغير شغلو مرة يشتغل كمسنجي ومرات كمساري وبالليل بستغل شحاد وفي ايام الاعياد ببيع كريمات
يعني شكروتا امورو دسيسة للدين وماشه معاهو سكسبيتا والدنيا مرنقه معاهو......
نبله :
اخونا نبله هو المعلم وهو البستلم البضاعة من الرآس الكبير وكان معاهو ابوالهول بعد الحادث بتاعو نبله بقي شغال براهو ونبله ماببيع قطاعي هو تاجر جمله مثلا في الحبوب ببيع بالكرتونه فاعلي والبنقو ببيع خمس راس ماعلي وبشتري البرنسيس بالباكو من المورد واغلبية البضاعه بتدخل بالتهريب ونبله بستلم من الرأس ششنه ششنه وبكونو متفقين علي التسليم ومحلاتو وبكون علي فترات عشان البضاعه بتكون كتيرة وعشان لو اتقبضو يتقبضو بكمية بسيطة ....
الرأس الكبير :
طبعا الكنق الكبير في المخدرات هو الرأس وهو البستورد وبدخل البضاعه وعندو علاقات مع اجانب ومتسوردين من الدول المجاورة ومافي زول بعرف عنو تفاصيل كتيرة غير انو هو الرأس الكبير وحتي ناس نبله وابوالهول ماحصل يوم من الايام شافوهو وكل شغلهم معاهو بالتلفونات ومرات برسل ليهم رسائل بس وهو بتصل عليهم عندو تلفون ثريا عشان ناس الشرطه مايقدرو يراقبو ولحدي اسع مابعرفو عنو اي معلومه وحتى ناس المكافحه ماقادرين يصلو ليهو ...
والرآس في غيرو كتار بنقس الصفات وشغالين شغل عجيب وملو البلد بالمخدرات وبقت امر واقع مافيهو مفر ومن الصعوبه تتكافح لانو المخدرات مشروع استيطاني يهودي وامريكي لتدمير البلاد الاسلامية ...
دحدوح :
طبعا دحدوح مركلس في السجن ومتواصل مع جمال ونبله وكان منتظر المدد عشان يبدا الشغل مع جمال لانو فلس وبقي علي الحديدة ولمن نبله استلم البضاعه اتصل علي دحدوح عشان يوري جمال ويقابلو ويشيل نصببو .
ودحدوح رسل لي نبله رقم جمال عشان يقابلو .
جمال :
قابل نبله واستلم منو باكو وسلمو القروش ومشى البيت ودخل الصيدلية حقتو وشال كمية من الحبوب حقت الصداع والاتهابات وطلع الحبوب كلها بدون مايخرب القصطيرة ودخل الحبوب المخدرة في محلها ولصقها بطريقة عبقرية ومافي اي زول بشك في الحبوب وحتي الخواجات الصنعوها زاتهم لو شافوها مابجيبو خبر ...
وتاني يوم بقي ببيع وعمل زباين ومشي لدحدوح في السجن وزارو واتونس معاهو ولمن انتهت الزيارة جا العسكري عشان يرجع دحدوح اخونا جمال اداهو كيس فيهو دوا بعوض والحبوب حقت البندور ومعاها خمسين جنيه وكم جريدة وادها العسكري وقال ليهو الحاجات ديل حقت دحدوح دخلن معاك وماتنسى العمود فيهو ملاح بامية كارب والعمود بجيهو المرة الجاية والعسكري فتش الحاجات والعمود ودخل دحدوح وجمال اتخارج طوالي وهو مبسوط انو الخطه نجحت ......
ودحدوح دخل مع العسكري وبدا يبيع في البندور الحبه الواحدة بخمسين جنية غايتو جنس طمع .....
الداخلية :
ريم ومها وراوية جو من الامتحان وحسنية ما امتحنت معاهم لانو مربتة وهي ماجات الداخلية لانو بتطلع من الجامعه مع الحرس لانو بتبيع في الجامعه في المساء وحتي صاحبت حرس الجامعه عشان مايشكو فيها وغاشاهم انو هي مساعد تدريس ولمن تجي داخله الجامعه يتكبكبو من السماحه ويسلمو عليها اتفضلي يااستاذة كيفك يااستاذة غايتو السماحه بتخلي البيت تبقي اي حاجه والرجال يصدقو ويكسرو في التلج....
وراوية اتصلت علي حسنية وقالت ليها انتي وين ؟؟؟؟ انا مصدعه دايرة حبه من حبوب امس وحسنية قالت ليها انا عشرة دقائق واكون معاك ياعسل.
الحله :
سعاد جهزت الغداء ومنتظرين ام ريم وماعارفين هي ناوية علي شنو ولاحتي عمنا ميرغني محضر ليها شنو ......
يلا للحلقة الجاية نشوف الحصل شنو ......
يتبع......
