القاضي في الجلسة الاخيرة اصدر حكمو علي ام ريم بالاعدام قصاصا وخير اولياء الدم بالعفو او القصاص واهل سعاد اجمعو علي القصاص ...
وبعد صدور قرار الاعدام اهل سعاد هللو وكبرو وريم صدمت وودوها المستشفي والغريبة في كل فترة الجلسات ام ريم كانت قوية وثابتة ولمن صدر الحكم زقرتت بطول حسها .
حاج ميرغني بعد الحكم بقي ملازم ريم في المستشفي وبعد بقت كويسة ساقها معاهو للبيت الاشتراهو لريم وهو عبارة عن فيله جميله جدا وريم لمن شافت البيت اتحسنت شوية وقالت لابوها لو جبت لي مال غارون مابرجع عن رايى وانت السبب في كل الحصل لامي ولو ماعرست سعاد ما كان حصلت اي حاجه ...
ميرغني : حاول يهدي ريم من الصدمه لانو الموقف صعب شديد وقال ليها مع الزمن بتعرفي انو انا عملت العلي وامك براها عملتها في نفسها واحسن تنسي الموضوع دا ، واسع اخدي راحتك والبيت دا حقك انتي والعربية البرادو البرة دي تبعك ....
ريم : انت ياابوي طالما عندك القروش دي كلها مخليني ازل نفسي واشتغل عشان الم قريشات عشان ادافع عن امي وكان مفروض تقيف معانا وانت اتهمت امي ووصلتها حبل المشنقة ومهما عملت المفروض تقيف معاها ....
ميرغني : انا بقيف مع الحق وامك قاتله وربنا بحاسبني لو ماعدلت وانا عملت البريح ضميري...
ريم : شوف انا ولا دقيقة مابقعد في البيت دا واحسن لي ارتكب جريمه او انتحر .....
وطوالي ريم طلعت من البيت وابوها جاري وراها وبكورك ليها...
صبحي :
طلع من المستشفي وخرجوهو وبقي كويس خالص وحاليا شغال مرشد اجتماعي عن المخدرات وخطورتها علي الكافه وناس المكافحه مشغلنو معاهم مصدر وشغال معاهم شغل جد واتسبب في القبض علي مجموعة كبيرة من المروجين ....
دحدوح :
فضل ليهو اسبوع ويطلع من السجن والشغل معاهو ماشى تمام والقروش جارية في يدو وبقي بتفق مع جمال انو يوفر القروش حقت البضاعة وفتح حساب في البنك وقال عايز يوسع الشغل لمن يطلع وجند ليهو كم نفر من المسجونين عشان يشتغلو معاهو لمن يطلع ورتب شنتطو وهدومو واصحابو في السجن عملو ليهو حفل شاي نظام وداع وكدا والاسبوع فضل فيهو يومين بس .....
نبله :
اتصل عليهو الرآس الكبير وقال ليهو البضاعة يتجي بعد يومين والغربية انو اول مرة يتصل عليهو من تلفون عادي وماعارفين الفهم شنو هل هو قاصد ام جات صدفه ونسى يتصل من الثريا ...
وقال ليهو المرة دي البضاعة كتيرة شديد ومكلفة معاي 2 مليار عشان كدا لازم تعمل حسابك شديد وقال ليهو دي ربحك فيها بكون دسيس وانتظر مني رنه في اي لحظه تمام وقفل منو الخط.
الداخلية :
ريم وصلت الداخلية مزعوجة شديد ولقت حسنية وراوية ومها في السطوح بتسطلو وسجارتهم طاقة .
ولمن سلمت عليهم وشالت منهم نفس ونفسين ...
وحسنية قالت لريم خلاص خشيتي العولمه انا لمن اتصلت عليك كنت عايزة احزرك من سوسو بس انت ما اشتغلتي بكلامي وقفلتي الخط في وشى عشان كدا تستاهلي الحصل ليك دا .
ريم : هي بقت علي المخدرات انا امي حكمو عليها بالاعدام لو في حاجه تانية برضو بخش فيها ،وانا عايزة انتحر واستريح من الهم الانا فيهو دا ..
حسنية والمعاها اتأثرو شديد وبقو ببكو مع ريم وبشربو في البنقو ومفتكرين انو هو دا الحل من كل الهموم والمشاكل ، ودا اعتقاد خاطي انو اي شخص تمر عليهو ظروف او مشاكل يعالجها بالادمان ....
هيثومي :
قاعد في الشقة واتصلت عليهو سوسو وقالت ليهو تعال علي في الكوافير...
ولمن وصل لقي ريم شغاله في الكوافير وسوسو ماوصلت وسلم عليها :
ريم : وعليكم السلام عايز حاجه ؟؟؟
هيثم : معقوله ياريم ليه بتسلمي علي بارد كدا انا عملت ليك شنو؟؟
ريم : معليش ياهيثم انا عندي مشاكل كتيرة وماشاعرة باي حاجه وبعتزر ليك ..
هيثم : عزرك مقبول وعندي طلب عندك ؟؟؟
ريم : اتفضل ...
هيثم : بعد تخلصي الشغل انا عازمك عشاء في امواج ..
ريم : خليها مرة تانية واسع انا ماعندي نفس لاي برنامج..
هيثم : انا كل طلبي عايز اقعد وادردش معاك وعلي راحتك متي مالقيتي وقت دا رقمي واتصلي علي فيهو انا منتظرك وماتنسي .
سوسو : جات داخله الكوفير ولقت هيثم بتكلم مع ريم وطوالي جرت ريم جوة وجاتط فيها وضربتها كف وقالت ليها حزراك من تتكلمي مع هيثم ودا خطيبي وزواجنا قريب وما اشوفك بتتونسي معاهو .
ريم : وشها ورم من الكف وشالت الكرسي وجدعتو في سوسو وجل منها ببونت بس واتشاكلو واتدمكو تمام ولحدي ماهيثم وناس الكولفير اتدخلو وحجزوهم وسوسو طردت ريم من الكوافير وقالت ليها اصبري لي لو مالحقتك امك في السجن ابقا انا ماسوسو ..
وسوسو نست الموضوع الجابت فيهو هيثم ،
وهيثم طلع طوالي بعد ريم ...
ريم في الباب طالعه وهي بتبكي وخالتها جات لاحقاها واتكلمت معاها وحكت ليها الحاصل وقالت ليها انا بتكلم مع سوسو وانتي امشى الداخلية ...
ابوالهول :
لسع مواصل شغلو في الجمعية وبقا مروج كبير وكسب زباين والشغل ماشى معاهو تمام وناس الجمعية اشترو ليهو عربية عشان يتواصل بيها من البيت وللجمعية ....
شكروتا :
قاعد في السوق ومن الصباح ماباع اي حاجه وزهجان شديد وقرر انو يمشى البحر احتمال يلقي زباين وركب ركشة وهو ماشى في الشارع ولمن وصل الاسطوب جا عسكري مرور واتكلم مع صاحب الركشة وطلب منو الترخيص وشكروتا علي الزهجه العليهو شاكل العسكري وطعنو بسكين في بطنو واتلمو الناس وساقو شكروتا وصاحب الركشة للقسم وشكروتا مخبي البنقو والحبوب في السديري حقو ....
ماذا سوف يحصل ....
وهل سوف يتم العثور علي المخدرات التي مع شكروتا....
يتبع.....
