نبله جاهو اتصال من الرآس الكبير وقال ليهو البضاعة قربت علي الخرطوم والمساء بحصلو ومرفوعه في لوري واداهو رقم السواق وقال ليهو اتصل عليهو وقول ليهو انا المرسلين لي شوالات الدخن الاربعة والبضاعة بتلقاها جوة الشوالات وانت استلمها ووديها الحته الفلانية ووصف ليهو البيت وقال ليهو انا بتايع معاك لحدي ماتستلم ...
حسنية :
مشت الجامعة وقابلت مهند وادتو قطرة وبدرة وكم حقنة عشان يوزهم للطلبة المعاهو وديل بدوها للطلبه العندهم ملاحق وبدخلو عليهم بالفهم دا وانو القطرة بتخلي الطالب يزاكر ويستوعب كويس و...و.....
وحسنية طلعت مشت الداخلية ولقت راوية بتجر في سجارة ومسطوله سطله جد وقعدت تجر معاها وبعد ربع ساعة ناس المكافحه كبسو عليم في الداخلية بامر تفتيش وقبضو حسنية وراوية وهم بشربو في السجارة ومعاهم بت تانية مصدر تبع المكافحه ولمن فتشو الغرفة لقو كمية من الحبوب والمخدرات جوة الدواليب والكمية الكبيرة في دولاب ريم ومها وهم كانو مافشين في القسم مع هيثم ،وطوالي ناس المحافحه رفعو حسنية وراوية في الدورية وبالمعروضات وودوهم القسم ...
هيثم لمن وصل القسم كان مصدوم وعايز يشوف ابوهو لاول مرة في حياتو ومايشوفو الا في الحراسة غايتو مصايب ومحن عجيبة ، ودخلو علي الضابط المناوب وسألوهو في واحد مقبوض معاهم اسمو عثمان موسي هلال :
الضابط : ايوة بالحيل دا موش ابكرنك الكراعو مقطوعة الجابوهو امس
هيثم : كراوعو مقطوعة!!!
صبحي : اسمو عثمان موسى هلال ؟؟؟
الضابط : ايوة نفس الاسم ودا قبضوهو امس بخمسين راس بنقو جوة الجمعية حقت اصحاب الاعاقة ودا زول مرضان مابخاف الله وربنا ابتلاهو بالاعاقة وشغال ببيع المخدرات .
هيثم : معليش ياجنابو ممكن نقابلو ونسلم عليهو ؟؟؟
الضابط : مافي طريقة الزيارة عندها مواعيد وهو لسع ما اتحرو معاهو وفي متهمين تانين لسع ما اتقبضو والمتهم ارشد عليهم ولازم نقبضم اول حاجه وبعد داك نخليكم تشوفوهو وامشو وتعالو بعدين العصر بكونو شالو اقوالو وبنسمح ليك تقابلو...
يلا اتخارجو ماتعملو لينا جوطه وزحمه في القسم .
وهيثم وصبحي وريم حاولو يحنسو الضابط عشان يشوفو الزول اللهو ابو هيثم بس الضابط رفض وطلعو من القسم عشان يجو العصر يقابلو ابو هيثم لاول مرة.
في القسم التاني :
حسنية وراوية فتحو ليهم بلاغات 15/أ مؤثرات عقلية وحسنية شافت مهند بتاع الجامعه مقبوض ومعاهو ولدين وبتين ...
وديل هم الحرقو حسنية وهم قبضوهم جوة الجامعه ولمن عصرو مهند عشان يعرفو الزول الشال منو القطرة اعترف ووصف ليهم حسنية وقنطروها طوالي.
دحدوح :
في نفس اليوم الطالع فيهو من السجن واثناء مابعمل في اجراءت الخروج لقو عندو خمس شرايط بندور ومعاها قروش كتيرة وطوالي الضابط شكا في الموضوع وفتح شريط ولقي حبوب الترامدول وطوالي رجعو ودخلوهو لمدير السجن وبسببو عملو تفتيش مفاجئ للسجن وابادو كل حبوب البندول وقبضو كمية كبيرة من الحبوب وعملو لدحدوح تحقيق واعترف ليهم بكل التفاصيل ووراهم كيف يتحصل علي الحبوب وبدخلها السجن كيف وطريقة التوزيع بتم كيف.
وعملو خطاب للقسم المختص وساقو بحرس وفي القسم فتحو ليهو 15/أ ادوية وسموم وختو الحبوب والقروش معروضات ونزلو جمال متهم تاني في البلاغ وبقو بفتشو فيهو .....
المساء :
هيثم وريم رجعو القسم والضابط اداهم زيارة ولمن مشو محل الزيارة هيثم مما شاف ابوهو وقع علي الارض وابوهو طلع ابو الهول .
ودخلو هيثم المكتب وادوهو موية وبقا كويس وطوالي رجع عاشان يتكلم مع ابوهو بس المشكله انو ابوالهول قال للعساكر انو هيثم دا هو الزول الاشتريت منو البقو ومعاهو واحد تاني اسمو نبيل .
والعساكر طوالي ماصدقو قبضو علي هيثم ودخلوهو الحراسة .
ريم وصبحي ومها حاولو يتكلمو مع الضابط وقال ليهم البلاغ دا تبع المخدرات ومابقدر افيدكم باي حاجه الا تمشو ليهم في محلهم واثناء ماهم طالعين قابلوهم ناس المكافحه وقبضو ريم ومها وودوهم القسم القابضين فيهو ناس حسنية وراوية ونزلوهم في البلاغ ودخلوهم الحراسة .
المحكمه قبلت الاستئناف المقدم من محامي ريم ورجعو البلاغ لمحكمة الموضوع لمزيد من التحري والادله والشهود .
والمحامي مشى لام ريم في السجن واتكلم معاها وحكت ليهو كل التفاصيل وطوالي سافر الحله وقعد فيها يومين ورجع واتصل علي صبحي وقال ليهو انا لقيت ادله جديدة وان شاء الله تكون في صالح ام ريم واتصلت علي هيثم وتلفونو مقفول وريم برضو الحاصل عليهم شنو .
صبحي اسع كنت عايز اتصل عليك وحكي ليهو كل التفاصيل عن هيثم وريم ولحدي ماقبضوهم والمحامي مشا عليهم وقابلهم وقدم طلبات ضمانات لهيثم وريم ومها والنيابة طلعت ريم وهيثم ومها بالضمان العادي .
في الحراسة :
هيثم قبل مايطلع بالضمانة مشى علي ابوهو وقعد جنبو وقال ليهو لي عملت كدا وتكذب فيني انا متين جبت ليك المخدرات ودي الحسنه العملتها فيك ود جزاي والمثل بقول الحسنة في المنعول زي الشرا في القندول ...
وانا اوريك الشى الانت ماعارفو انا اسمي : هيثم عثمان موسى هلال
هنا ابوالهول جاهو تشنج وودوهو المستشفي وجاتو حاله نفسية وبقي بتكلم براهو وحجزوهو في التجاني الماحي للعلاج.
سوسو :
بعد عرفت انو ناس الشرطة قبضو علي هيثم وحسنية اختفت من الانظار وخلت الكوافير وماعارفين كبرتها لي وين .....
نبله:
منتظر في المحاصيل وعشان يستلم شوالات الدخن الفيها البضاعة ومتفق مع بتاع بكسى عشان يرحل الشوالات للمحل الوصفو ليهو الرآس
ولمن اللوري وصل نبله استلم الشوالات وفي نفس اللحظة ناس المكافحه كبسو ...ثابت... ثابت ...
وقبضو علي نبله وسيد اللوري والعتاله المعاهو وفتشو الشوالات ولقو جواها 1500راس بنقو ديل خلاص كتمت فيهم وبودوهم التوج طوالي ....
وبعد التحري معاهم وصلو لرقم تلفون الرآس الكبير وحددو محلو باللوكيشن وطلع في نفس القرية الساكنه فيها ريم وطلعو تيم عشان يقبضو عليهو ....
ولمن وصلو تم القبض علي الرآس الكبير وهو حاج ميرغني ابو ريم ...
وجابوهو معاهم الخرطوم وبعد اسبوع كامل اعترف بانو هوصاحب البضاعة وجاهم اتصال من الحله من جارة ام ريم الشهدت ضدها في المحكمه وقدمت اعترافات مهمة وقالت ميرغني زارع البنقو في الحله وليهو فترة طويله وناس المكافحه رسلو تيم كامل وابادو البتقو المزروع .
بعد اكثر من شهر :
شكروتا :
حكم عليهو بخمس سنه سجن وغرامه 7000 ج
دحدوح :
حكم عليهو بسنتين سجن وغرامه 5000ج
جمال :
اتخارج مما سمع انو قبضو صاحبو دحدوح وبقولو سافر الجنوب ....
نبله :
حكم عليهو 15 سنه سجن وغرامه 20.000 ج.
حسنية :
حكموها 4 سنة سجن وغرامه 4000ج ...
راوية :
حكموها سنتين وغرامه 3000ج....
هيثم ومها وريم :
حكمو عليهم بثلاثة شهور وغرامه 1000ج لكل واحد
سوسو :
هربت وماعارفين تجاها علي وين وبقولو انو بقت قوادة في احدي الدول وبتبيع مخدرات وشغاله تمام وامورها سكسبيتا ...
ابوالهول :
جن رسمي وطلعوهو وحاليا لافي في الشوارع وبلقط في القوارير والاكياس....
الرآس الكبير ميرغني :
طبعا هو اكبر واحد في المروجين واتعلم المخدرات من ابوهو وكانو بزرعو البنقو في المزرعة حقتهم والحبوب بجيبوها بالتهريب، وفي اعترافاتو امام المحكمه :
اعترف انو هو القتل زوجتو سعاد والسبب انو هي عرفت انو بتاجر في المخدرات وبزرعها وعشان كدا قتلا واتهم زوجتو الاولي ام ريم لانو هي برضو عرفت انو بتاجر في البنقو وعمل كدا عشان يتخلص منهم الاثنين وهو هدد ام ريم لو اتكلمت حايقتل ريم ويقتلها هي زاتا وجارتو الشهدت ليهو ابتزاها واقراها انو حايتزوجها وهو سفار الخرطوم في نفس اليوم القتل فيهو سعاد بالصبغه في الاكل وفي نفس اليوم ام ريم كانت معزومه عندهم.......
المحكمه حكمت علي ميرغني بالاعدام شنقا حتي الموت .......
ام ريم :
طلعوها من السجن بعد اعترافات ميرغني ورفضت ترجع الحله نهائي ....
بعد ستة شهور :
صبحي اتزوج مها وطلعت بالصدفة قريبتو باللفة ولمن مشو البلد لقو زوجتو القالو استشهدت في ليبيا قاعدة وهي كانت حامل وحاليا الولد كبر وعمر 3 سنة وحكو ليهو القصة وكانو في الانعاش فترة طويله ونسيبتو اتوفت في التفجير ولمن جو السودان فتشو عليهو وفقدو الامل وفرشو عليهو والولد سموهو صبحي علي اسم ابوهو وزوجتو رفضت الزواج بعدو لحدي الان ....
والفرحه بقت فرحتين فرحه عرسو من مها وفرحه رجعتو لاهلو ومها اصرت علي صبحي انو يرجع زوجتو القديمة واتزوجها وسكنو الاتنين في بيت واحد ومبسوطين ....
ريم وهيثم :
اتزوجو واستقرو في احدي شقق هيثم وسكنو أم ريم واختها في الشقة المجاورة ليها طوالي ، وامو واخوانو جو من السعودية وعرفو الحصل ليهو وعلاقتو اتصلحت مع زوح امو (ابوهو المربيهو )وفتحو عيادة مجانية لعلاج الادمان وابوهو زوج امو خلا السعودية واستقر في السودان ومسك المستشفي وسموها المستشفي الخيري لعلاج الادمان وشغلو معاهم مها وصبحي ، وجابو ابو الهول اول مريض يتعالج في المستشفي ....
وبكدا نزيل الستار عن احداث رواية تجار المخدرات الجزء الاول وحاولنا نوضح للناس مشاكل المخدرات وانواعها ومسبباتها وطرق انتشارها بين المجتمعات واوساط الشباب والعواقب الوخيمة ....
ومن المنبر هذا بنقدم نصيحه عامه :
الاب :خلي بالك من اولادك وبناتك وحزراكم من الطلاق وتفكييك الاسرة
الام : التربية ماقروش والقروش ماكل شى وخليك قريبة من اولادك وخليك صديقة ليهم في كل شى ...
الابناء والبنات : حافظو علي شبابكم من الدمار والهلاك واياكم واياكم واصدقاء السوء واختارو الصديق الجيد وتمسكو بدينكم وحافظو علي الصلاة والصيام والقيام ....
نتمني ان نكون وفقنا ونلنا رضائكم ....
وما التوفيق الا من عند الله.
ونشكركم علي حسن المتابعة .
ولكم الشكر .
الي اللقاء في الجزء الثاني من رواية تجار المخدرات
بقلم : عوض ابوعلام
