في القسم :
شكروتا ودوهو القسم وفتحوليهو بلاغ ازي جسيم وطلعو للعسكري اورنيك 8 وودوهو المستشفي وبتاع الركشة فتحو ليهو بلاغ ازعاج عام ورسلو الركشة للمرور وحجزوها معاهم ، ولمن دايرين يدخلو شكروتا الحراسة قالو ليهو طلع اي حاجه عندك وطلع السديري واداهو العسكري عشان يفتشو ودخل يدو في الجيب وقرب يقرص من كترة الحاجات والحبوب والبنقو ولقوهو شايل معاهو 15 راس بنقو وقطاعة وورق برنسيس وعشرة شرايط ترامدول والعسكري طوالي ساقو للضابط ووراهو المعروضات اللقوها عندو وطوالي روسو ليهو (اضافة بلاغ للقديم) بلاغ15/أ اتجار وختو البنقو والحبوب معروضات
ودخلوهو الحراسة ....
الداخلية :
ريم بعد سوسو ترضتها مشت الداخلية وشالت التلفون عشان تتصل علي هيثم واترددت مسافة وفي الاخير اتصلت عليهو:
هيثم : الو ...
ريم : اهلين كيف ما اكون ازعجتك ...
هيثم : ازعاج انا متظر تلفونك دا من الصباح واتأخرتي علي كتير بس كنت متأكد منك حاترجعي لي ..
ريم : والخلاك متأكد شنو انو حاراجع ليك ....
هيثم : انتي عارفة وانا عارف ومافي داعي اوريك ...
ريم : لا انا جادة معاك ...
هيثم : الكلام بالتلفون مابجي وعشان كدا اجهزي واعملي لي رنه وبكون معاك ...
ريم : تمام يلا باي ....
نبله :
جاهو تلفون من رقم غريب ولقاهو شكروتا وحكي ليهو الحاصل وقال ايهو تعال لي في القسم وداير لي محامي و...و......وماتطول انا منتظرك....وماعندي زول غيرك.....
نبله قال ليهو شكروتا منو ماعرفتك ...الو الو ....الشبكة كعبة وقغل الخط .....
ونبله قعد يضحك ههههههه اخر الزمن شكروتا قال عايز محامي ...الابقي في رجاي ....
وبعد كم دقيقة اتصل عليو ابوالهول وشاكلو ونبزو زين وقال ليهو لازم تجي علي نمشى القسم وفي الاخير دا كان صاحبك في يوم من الايام ...
نبله : انا ماماشى والداير تعملو اعملو وماعندي بيهو اي علاقة ولابعرفك انت ذاتو وتاني ماتتصل علي في تلفوني دا وقفل الخط
صبحي :
عرف انو شكروتا قبضوهو وشال ليهو حاجات ومشى ليهو في الحراسة وقابلو وسلم عليهو واتونس معاهو وشكروتا قال ليهو ماعرفتك انت منو:
صبحي : انا صبحي صاحبكم ..
شكروتا: اومالك اتغيرت كدا وربيت دقت الحاصل شنو؟
صبحي : انا ربنا هداني وخليت المخدرات واسع شغال مرشد وو...وحكا ليهو كل قصتو ونصحو انو يكون دا اخر عهدو مع المخدرات ويتوب...
شكروتا : انت ياصبحي طلعت احسن من اصحابي الروح بالروح وجزاك الله خير ماقصرت وربنا يهدي الجميع ....
وصبحي طلع من شكروتا مبسوط وقال اكيد حايجي يوم وشكروتا يتوب .....
كافتريا امواج :
هيثم وريم وصلو وريم مما جات مدنقرة وماقادرة تعاين في وش هيثومي وما اتكلمت نهائي....
هيثومي : ماممكن معاك ياريم ياخي بطلي الخجل وقولي حاجه ...
ريم : معليش الموفق صعب واول مرة اطلع مع ولد غريب مني وبراي ودي المرة التانية في حياتي اتونس مع ولد واصلا الهموم العلي خلتني اعمل كدا واخش في دوامه وربنا يجاري الكان السبب
هيثم : ياريم انا لمن عزمتك هنا عندي موضوع وعايز اطرحو ليك وتاني ليك الخيار ...
ريم : موضوع شنو ؟
هيثم : بدون مقدمات انا من اول يوم قابلتك فيهو جنب باب الجامعة اعجبت بيك وحبيتك من اول نظرة ومن اليوم داك اموري اتلخبتط وكل يوم بشوف صورتك قدامي ، وانا قلت احسن اصارحك اول حاجه واشوف ردك شنو ؟؟؟
ريم : سكتت مسافه طويله وقالت ليهو :
تخيل انا عندي نفس الشعور وفي نفس الزمن حتي لمن سلمتك عليك حسيت كاني ضربتني كهربه ورجعت سريع وحتا صاحباتي لاحظو لي بس كتمت حبك جواي وحاولت ابعد وانسى الحصل بس انت اتقربت مني وصارحتني، بس المشكله الكبيرة في استحاله ارتباطنا ببعض ....
هيثم : يعني انا لو ماقلت ليك انا بحبك ماكان قلتي انتي ...
ريم : امال يعني دايرني اتصل عليك واقول ليك بحبك ....
هيثم : وخلاص طالما بنحب بعض لازم نتقرب اكتر ونرتبط رسمي ...
ريم : اسع انا بقول في شنو ...في كم سبب بخلينا مانرتبط مع بعض واحسن تعرف من اسع عشان ماتغير رايك بعدين وتنط مني ....
اول شي الوضع الاجتماعي والمادي وامي محكوم عليها بالاعدام واهلك مابوافقو ،وتاني ودا الاهم انا عندي مشكله كبيرة وهي انو بقيت مدمنه مخدرات والسبب سوسو ولقت فرصه في المشاكل المريت بيها ، وتاني القول قولك واحسن اكون صريحه معاك من اسع ....
هيثم : الموضوع الاول انا ابوي لحدي اللحظه دي مابعرفو ولاشغتو وبعرف انو هو كان تاجر مخدرات واتشاكل مع امي واخوانو وطردهم من البيت ، والموضوع التاني انا برضو مدمن والسبب برضو سوسو والحياة الكنت عايشها وكنت مفتكر انو اي حاجه ممكن اشتريها بالقروش ، وخيشت في عالم المخدرات ....
وعشان كدا انا من يدك دي لي دي ونفتح صفحه جديدة ونبدا خطوة خطوة لحدي مانطلع من الجحيم دا ....
ريم : انا موافقة ومن بكره نبدا واول حاجه نتعالج من الادمان ....
هيثم : تمام انا بعرف واحد اسمو صبحي كان صاحب ناس ابوالهول اللهو اخو سوسو واسع تاب وبقي شغال مصلح اجتماعي وانا عارف المحل الشغال فيهو ونمشى ليهو بكرة ، وبخصوص الوالدة انا بعرف محامي كبير ومشهور نصلو بكرة ونحكي ليهو القصه كلها قبل مافترة الاستئناف تنتهي ....
ريم : ربنا بخليك لي ياهيثومي ومايحرمني منك ...
تاني يوم ريم وهيثم مشو المحامي وحكو ليهو كل التفاصيل ووافق يستلم القضية وقال لهيثم انا حاسي انو حانكسب القضية دي ويلا نمشى نقدم الاستئناف طوالي....
ومنها مشو لي صبحي وسلمو عليهو وحكو ليهو كل التفاصيل وقال ليهم اوا شى نبدا نتعالج من الادمان ويلا نمشى مستشفي الادريسى وطلعو طوالي وريم اتصلت علي مها وقالت ليها تعالي لي ضروري ، وهي كلمت هيثم وصبحي عشان تتعالج برضو وهي صاحبتها الروح بالروح ....
في المستشفي صبحي جاهو تلفون من القسم وقالو ليهو في واحد مقبوض في القسم بخمسين راس بنقو اسمو عثمان موسي هلال و...
هيثم من اسمع الاسم دا كورك وقال ليهم الاسم دا اسم ابوي ....
وطوالي جرو جلهم القسم .......
يتبع ....
