الدكتور طلع من غرفة العمليات وقال ليهم انا ماعارف اقول ليكم شنو بس ربنا اراد انو اخوكم هلال يفقد رجلو وربنا يعوضو وحاليا لازم نخليهو في العناية المركزة لحدي مايبقي كويس .
هنا جماعتك كلهم مصدومين وماقادرين يتكلمو وسوسو بقت تجوط وتكورك في الدكتور انتو عملتو لاخوي شنو ونحنا جبناهو نصيح وهيثم مما سمع الكلام دا وقع في الارض وطلع عندو انخفاض حاد وادوهو دربات .
نبله وشكروتا محتارين من المنظر دا وبقو يتفرجو بس.
بعد ثلاثة اسابيع :
ابوالهول طلعو من المستشفي وخرجوهو البيت وهيثومي بقي طوالي ملازم مع ابو الهول وحتي اشتري ليهو كرسي متحرك هدية وبقو اصحاب شديد ، والفترة دي كلها اثرت في ابوالهول وبقي ضعيف شديد والغريبة انو زوجة ابوالهول واهلو واخوانو عرفو الحصل ليهو وماجوهو نهائي لانو متقاطعين ليهم فترة طويله من قبل 20 سنة وسبب المقاطعة هو
قبل عشرين سنه : ابوالهول اتزوج بت عمو وانجبت منو ولد وكانو قاعدين في البلد وبعد الزواج اختلف مع اخوانو في الميراث حق ابوهم وشال نصيبو ونصيب امو ورحل الخرطوم مع امو وزوجتو وولدو ومع مرور الايام دخل في عالم المخدرات عن طريق احد اصحابو اتعرف عليهو في الخرطوم وبدأ في الاستنزاف الحقيقي والضياع وزوجتو وامو عرفو الحاصل وحالو يبعدوهو عن طريق المخدرات بس بدون فائدة وحتي اتدخلو الاهل واخوانو عشان يبعد من المخدرات بس بدون فايدة وفي الاخير وبعد كمل قروش الورثة وقروش امو اختلف معاها وطلق زوجتو طلاق تلاته وطردهم من البيت ورجعو البلد والوقت داك ولدو كان عمرو سنتين بس ومن الزمن داك ماشاف ولدو ولازوجتو ولاحتي فكر انو يزور امو او اخوانو وانقطعت علاقتهم نهائي ...
الداخلية :
ريم ومها بزاكرو في الغرفه ومندمجين شديد وصاحبتنا حسنية وراوية قاعدين فوق في السطوح بتونسو مع بعض :
راوية : اليومين ديل شايفاك مبسوطه شديد.
حسنية : هههههه كيف مااكون مبسوطه وانا ساكنه معاك ومع اجدع صحبات .
رواية : ههههه عشان كدا انا قلت ليك شايفاك مبسوطه ومامن عاداتك تكونو مبتسمة وضاحكه وماصارة وشك .
حسنية : اها انتي القراية ماشه معاك كيف اوعي تلحقيني وتربتي كتير ..
راوية : في الحقيقة اموري ملخبطه وماقارية كويس وقدر مااجي اقراء يمسكني صداع شديد وازهج من القراية وماعارفه اعمل شنو وشكلي حا اربت السنه دي زي ماقلتي .
حسنية : انا عندي ليك حل وبخليك تركزي في القراية كويس والصداع بروح بسرعه....
راوية : ياسلام عليك اها شنو الحل ياستي.
حسنية : هاك الحبه دي ابلعيها دي مضاد حيوي وبودر ليك الصداع وبخليك تركزي في القراية .
راوية شالت الحبه وبلعتها طوالي وبعد ربع ساعه خشت في عالم تاني وهو عالم المخدرات وقالت لي حسنية اديني حبه تانية وشكلها الحبه نفعت معاي .
غايتو بالغتي ياحسنية تدخلي صحبتك في عالم المخدرات.
كولمبيا :
قريب من منطقة كولمبيا يجلس نبله وبشرب في جبنته الصباحية المعتادة وبعد ربع ساعه اتصل عليهو المعلم وقال ليهو البضاعة جات ووصف ليهو محل جوة كولمبيا ينتظر فيهو ونبله مشى طوالي وبقي منتظر وبعد مسافه جا واحد سايق موتر ولابس خوسة وسلمو البضاعة وشال منو القروش وطلع طوالي انبرم.....
نبله طلع طوالي واتصل علي باقي الشباب واحد واحد وقال ليهم ابشرو البضاعه جات والكمية مناسبة وفيها كل المطلوب.
الحله:
طبعا زي مامتابعين معانا انو كنا متوقعين ام ريم تعمل حاجه لمن لقت زوجها عرس عليها وشكلها ناوية علي شر كبير وهي رحلت بيت امها وفي يوم اتصلت علي سعاد زوجه ميرغني الجديدة :
سعاد: الو
ام ريم: .......
يلا نخليكم للحلقة الجاية نشوف ام ريم دايرة شنو من سعاد ضرتها .....
يتبع.....
