صراع الذئاب (الجزء الأول)«مكتملة»

# الحلقة السابعة

                              ٧

_ تصعد نعمات الدرج وتحمل ع رأسها صينية طعام يكسوها غطاء متدلي من جوانبها .... خلفها الحاج فتحي يلتقط أنفاسه ... وصل كليهما أمام شقة عبدالله

_ حبكت يا نعمات نزورهم ع الصبح كده ... ده الفرح خلصان ع نص الليل وهم عرسان هتلاقيهم يدوب نايمين الفجر ... قالها الحاج فتحي

نعمات وهي تنزل الصينية من فوق رأسها قالت : صبح ولا ضهر هتفرق ف أي ... الحق عليا صاحيه من النجمه عشان أحضرلهم فطار يقويهم

عقد حاجبيه بضيق وقال : إحنا يدوب نسلم عليهم وننزل ع طول أنتي فاهمه ؟؟

نعمات : طبعا يا أخويا نطمن عليهم ونطمن ع بنتك ونتاكل ع الله

فتحي : لما نشوف .... قالها ثم ضغط ع زر الجرس وهو يتحمحم وقال : يارب ياستر

_ وبالداخل في الردهة يتمدد عبدالله ع الأريكة يحتضن الوسادة ويتمتم بكلمات غير مسموعة ويبدو أنه يري حلم ما

وبداخل غرفة النوم مازالت بثوب الزفاف ونائمة ع وجهها ... أنتبه مسمعيها إلي صوت الجرس المزعج فنهضت مسرعه وفتحت الباب التي أوصدته منذ البارحة ...

نعمات بالخارج : بت يا شيماء ... ياعبدالله ... أفتحوا

فتحي : ماتصتبري يا وليه متصربعه ع أي

_ بالداخل خرجت إلي الردهة تبحث عنه وجدته يغط ف ثبات عميق والغطاء منزلق من ع جسده ... أقتربت بهدوء وهي تتأمل وجهه الذي يبدو كالحمل الوديع وهو نائم ... أبتسمت عندما تذكرت ليلة الأمس وهو يأخذ وسادة وغطاء ليمكث في الردهة بعدما قامت بتهديده ... وضعت يدها ع خصلات شعره ثم وجنته وهي تهمس له : عبدالله ... أصحي يا عبدالله

تقلب ليصبح ف مواجهتها وظن أنه ف حلم فأمسك يدها ويقبلها ويقول بصوت ناعس : بحبك يا شوشو

أخذت تلكزه ف كتفه وقالت : أوم يخربيتك أبويا ومراته ع الباب ... أوم وشيل المخده والكوفرته دي

بدأ يفتح أهدابه لتنكمش عينيه من ضوء الشمس الذي تسلل من الشرفة ... نهض بجذعه وظل ينظر من حوله وقال : بتصحيني ليه مش كفاية تطرديني من الأوضة وضيعتي عليا أجمل ليلة ف العمر

أقتربت منه وقالت بصوت منخفض وتجز ع أسنانها وتمسك بتلابيب قميصه القطني : مش وقته الكلام ده ... أوم أحسنلك أفتحلهم عقبال ما أغير ... وحسك عينك تقولهم ع الي حصل إمبارح ... قالتها ثم ألتقطت الوساده والغطاء وذهبت إلي الغرفة

زفر بحنق وقال : الي حصل إمبارح !!! هو حصل حاجة أصلا ... ماشي يابنت عشماوي

مازال قرع الجرس يصدح ...

نهض وهو يعدل من هندامه ويرجع خصلات شعره إلي الخلف بيده وقال : حاضر يالي بتخبط ... مش واقفين لكو ع الباب يعني