زيـنـــــة

الجزء الاول

روايه زينة  ،،،،،، بقلم اسماء سليمان

ابطال الرواية امجد - زينة - حسن - زين

الجزء الاول 

في تمام الساعة السادسة مساء يوم الاثنين ، علي احد الكباري المجهزة للترميم والاصلاح تسمع اصوات كثيرة متلخبطة وعياط وحركة سريعة وعساكر وظباط بتجري وسيارات امن عام وابخرة تحجب الرؤية  في المكان وجثث في جميع الاتجاهات ودم سايل علي الارض .

وبين كل دا جريح ( امجد بطل الروايه ) ملقي علي الارض ينزف من أعلي كتفه الايسر وبجوارة من يرتدي قميص وبنطلون رجالي وعلي راسة طاقية يتضح من بعيد انه رجل (زينة  بطله الروايه )

امجد ماسك في ايدها : زينه انا اسف سامحيني --

زينة  وهيا تبكي : مش وقت الكلام استريح ، وسيب ايدي علي شان اعرف اوقف النزيف

امجد بضعف  : مش مهم النزيف انا مبسوط اني هموت علي ايديكي وانت جنبني وشايف في عيونك كل الحب والخوف عليا

زينة  وهيا تحاول كتم دموعها : متقولش كدا انت هتعيش وبعدين بكرة هطلع عليك القديم والجديد وبكرة تقول زينه قالت

امجد : اسمعيني بس مفيش و----

زينة بخوف : لا في وقت وهتقوم وهنتكلم وهتحكي ليا كل حاجة ، وهتصالحني صح يا مجنو

امجد : هه بس لازم تعرفي انا عملت ليه كدا ----

حسن ( احد الظباط ) : يله يا امجد مش وقته الاسعاف وصلت هتروح المستشفي نشيل الرصاصة الاول ونطمن عليك

امجد : اصبر يا حسن ، زينه لازم تعرف ----

حسن : بعدين

امجد  بتصميم : لا دلوقتي

حسن : امجد بلاش عناد ، ولما تخرج بالسلامه ابقي احكي ليها علي كل حاجة

زينة : حبيبي خلي الكلام دا لبعدين انا في انتظارك متتاخرش عليا، وعلي ما تخرج هكون فكرت لك في عقاب مناسب وانتقم منك

امجد : اول مرة تقولي حبيبي ، بجد انا حبيبك حتي بعد اللي عملته فيكي ، انا فعلا استاهل العقاب واي عقاب هتختاريه انا موافق عليه بس بلاش تختاري انك تبعدي او تحرميني منك ، لانه كدا هيبقي انتحار مش عقاب

زينة : بكاء شديد

امجد : متبكيش علي شان خاطري ، علي فكرة انا لقيت دلع لاسمك بس المرة دي هيعجبك قوي

حسن : انت في ايه ولا ايه ، لو سمحتي يا دكتورة ابعدي علي شان الاسعاف تشيله والعربية دي هتوصلك لحد البيت انت كمان محتاجة ترتاحي

زينة  : انا هاجي معاه ومش هسيبه

حسن : مش هينفع

زينة : انا مش بستاذن يا حضرة الظابط ، وفي اللحظة دي امجد ترك ايدها