زيـنـــــة

الجزء الثاني

روايه زينة  ،،،،،، بقلم اسماء سليمان

الجزء الثاني

قامت زينة بالنظر علي باب غرفة العمليات تنتظر خروج مجنو حبيبها ، وقامت بالاستنادة علي الحائط ليحميها من الوقوع او ليساندها علي التحمل او لكي يطبطب عليها او كل دا مع بعضه ، وهنا رجعت بالذاكرة الي 3 اشهر ماضية حيث حياتها العادية قبل ما تتعرف علي امجد وتشوفه

فلاش باك من 3 شهور

يوم الاحد في تمام الساعة السابعة صباحا تم فتح التليفزيون علي صباح الخير يا مصر وكانت السيدة ام كلثوم تشدو يا صباح الخير يا اللي معانا الكروان غني وصحانا  ، والام ( أمينه ) تنادي زينة  : انت يا بت الفطار جاهز

زينة  وهيا تتقلب في السرير وشعرها الاسود الطويل يغطي وجهها : عملت الشاي بلبن ولا لسه انام شويه

أمينه : شاي بلبن انت هتنفطمي امتي ، قومي عملته هتتاخري علي الشغل

زينة  (26 سنة ) فتاه علي قدر من الجمال خمريه البشرة وعيونها بنيه تميل الي الخضار الفاتح ، من اسرة متوسطة الحال وتعمل معيدة بكلية العلوم وقاربت علي انهاء رسالة الماجستير

زينة  : ايه الجمال دا صباح الفل يا قمر ، يالهوووووي علي حظك الحلو يا حاج سالم

أمينه : بطلي بكش يله قومي صلي وتعالي افطري

زينة : الحمد لله صليت الفجر حاضر

أمينه : ربنا يفتح عليكي ويرزقك بابن الحلال اللي يستاهلك

زينة  : يارب بقي والنبي انا جبت اخري

أمينه : وطي صوتك هتفضحينا الناس هتقول عليكي ايه

زينة  : ههههههههههههه عايزة اتجوز

صوت ياتي من الخلف ( زين اخو زين طالب  في كلية الحقوق ) ما احنا مش هنفطر النهاردة ، يله ورانا كلية ، واتجمعت العيله للفطار الاب الحاج سالم (علي المعاش) والام أمينه (ربه منزل) وزينة  وزين ، زينة  راحت الي شغلها بكليه العلوم وزين الي كلية الحقوق

زينة  (دخلت المكتب ) :- صباح الخير يا دكاترة عم صابر النسكافية بتاعي لو سمحت

عم صابر (عامل بوفيه ) : عيوني

زينة  : شكرا وتسلم عيونك

في منتصف اليوم هاتف زينة  بيرن ويظهر علي الشاشة زيزو (زين اخوها )

زينة  : الووو

زين : ايوه بقولك في حوار كدا نسيت اقوله امبارح

زينة  : يا واد دلعني قولي كلمة حلوة الاول قولي يا موزة اي حاجة ، أعمل اي منظر هنحرف والله

زين : هتنحرفي علي الساعة كام وانا اجي انحرف معاكي

زينة : في اخ يقول لاخته اجي انحرف معاكي