زيـنـــــة

الجزء العشرون

روايه زينة ،،،،،، بقلم اسماء سليمان

الجزء العشرون

زينة وهيا بتحاول تمنع دموعها المحبوسه : حتي لو مفيش امجد – انا بردوا مش ليك يا دكتور – حتي لو مخلصتش الماجستير وانا قلتها قبل ما تفكر تهددني بيه – بعد اذنك

زينة مقدرتش تقعد في الكليه حسه انها مخنوقه ومش قادرة تاخد نفسها - فضلت تمشي في الشارع مش عارفة رايحة فين ولا جايه منين وفي الاخر روحت علي البيت

زينة دخلت اوضتها ومتغدتش مع اهلها - سرحانه بتفتكر كل كلمه سمعتها ومش مركزة وكل اللي بيسالها مالك - تقول مفيش ودخلت تنام معرفتش تنام - وبعد وقت طويل تقريبا منتصف الليل قررت تتكلم مع صاحبها واخوها وصديقها الوحيد عشق زينة

خرجت من اوضتها ولحسن الحظ  لقت نور اوضه زين منور ،خبطت ودخلت لقيته بيذاكر

زينة : فاضي

زين : مشغول جدا عندي امتحان مهم بكرة

زينة : خلاص ذاكر احسن مش مشكله

زين حس انها متغيره : بس افضي نفسي ليكي مخصوص يا زنزون

زينة : مش مشكلة ذاكر علي شان امتحانك

زين : انا كنت هريح شويه من المذاكرة واعمل شاي ، اعملي الشاي واحكيلي مالك واحنا بنشرب

زينة عملت شاي لزين وليها نسكافيه وطلعوا البلكونه مكانهم المفضل للرغي والكلام وحكت له علي كل حوار اسر وكل الكلام اللي سمعته علي موبايله

زين : انا مقدرش اقولك تعملي ايه بس هسالك كام سؤال يمكن يوضح لينا الصورة - اولا انت ايه رائك في اسر دا

زينة : ذباله

زين : طيب هو سمعك الحوار لحد ما التليفون فصل لوحده ولا هو اللي فصله بعد جزء معين

زينة (بتحاول تفتكر) : لا هو اللي فصله

زين : مش يمكن فيه بقيه كلام مش حابب انك تسمعيه

زينة : ويمكن لا

زين : كون انه مسجل لامجد يبقي هو كان ناوي يوقعه في الفخ دا

زينة : كسبت انا ايه من كلامك دا

زين : طيب امجد من النوع اللي بيحب الفلوس او من خلال معاملتك معاه تحسي انه هو واطي

زينة : ما تحترم نفسك ايه واطي دا انا اختك الكبيرة

زين : ماشي يا ست الكبيرة ، تحسي انه مادي حقير  حلوة دي واحسن من واطي هههه

زينة : مقدرش احكم بشكل كويس لان الفترة اللي عرفته فيها مش كفايه – بس انا معتقدتش انه مادي

زين : هتعملي ايه

زينة : عارف انا تقريبا فهمت انت عايز توصلني لحد فين ، اسر ذباله ومش بثق فيه يمكن يكون دا مقلب منه علي شان يبعدني عن امجد - وامجد انا لسه معرفتوش بشكل كبير ويمكن اظلمه