زيـنـــــة

الجزء الثامن

روايه زينة ،،،،،، بقلم اسماء سليمان

الجزء الثامن

في المستشفي امجد لسه في العمليات ومحدش لسه طمنهم عليه - حسن سكت عن الكلام لان تليفونه رن - رد سريعا ورجع كمل كلامه لزينة

حسن : احنا وقفنا فين

زينة : لما امجد بدا يجهز نفسه علي شان يجي يخطبني وكمان حتي مبصش علي صورتي ، طيب يا امجد بس لما تطلع بالسلامه

حسن : هههه- فعلا جمع المعلومات اللي عايزها عن المهندس امجد محمد - وشافه طبعا من بعيد علي شان يشوف لو فيه حاجة مميزة في شكله او في مشيته ، وزار مكان سكنه ومكان شغله الجديد

زينة : يعني كل كلام امجد عن بيته وشغله وسفرة للامارات والشركة الهندسية في مصر ، كل دا صحيح بس يخص شخص تاني اللي هو البشمهندس امجد محمد

حسن : طبعا احنا مخابرات كل التفاصيل حتي الصغيرة لازم تكون تحت الاعتبار ، وامجد علي الرغم من عدم اقتناعة بدوره بس نفذه ببراعة ، وقال اكيد العروسه واهلها هيسالوا علي العريس ، فلازم العريس يكون غير معروف بحجة محدش يشك فيها

زينة : والمهندس الحقيقي

حسن : امجد كان وضعه تحت المراقبه ومش بيغيب عن عينه لربما يحصل حاجة معاه ، كل حاجة كانت مرسومه كويس جدا ، وفعلا تاني يوم بعد الخطوبه كان المهندس امجد الحقيقي استلم شغله زي ما امجد قال ليكي بالظبط وعمل نفسه بعدها مشغول جدا بحجة الشغل لو تفتكري

زينة : ايوه فاكرة ، وبعدين

حسن : امجد كلم الحاج احمد واتفقتوا علي يوم الخميس بعد المغرب للتعارف وامجد كان عندكم لوحده في اول مرة ، في الوقت دا انا ومصطفي وطارق كنا في المكتب منتظرين نتيجة اول لقاء (فلاش بالك )

في مكتب يبدوا عليه الفخامه والرسمية والهدوء والتوتر يسود بين الحاضرين طارق ومصطفي وحسن

طارق سمير المصري طويل عريض المنكبين بطل مصر في الكارتيه ورفع الاثقال دخل المخابرات بالوسطة لمركز ابوه (عضو مجلس النواب ووزير سابق بالاضافه الي مشاركته في اسهم بعض الشركات المهمه بالبلد ، بيغير من امجد لانه ذكي ومحترف وكمان تجاهل امجد ليه ضاعف الغيرة والكراهيه من طارق لامجد

مصطفي محمود الالفي متوسط الطويل ورفيع جدا واسمر البشرة والشعر ، طيب القلب ولكن بيحب يكون في صف الكسبان - من وجهة نظره ان طارق بمركزة هو ووالده هيساندوه جامد في حياته

حسن: اقعدوا بقه ركبيتوني العصبي - يخرب بيت التوتر بقالكم ساعة رايحين جايين رايجين جايين شكلي هخسر الجيم بسببكم

طارق : حسن مش انا اولي بزينة من امجد

حسن : ليه بقه ان شاء الله