وكيف أهرب منه إنه قدري هل يملك النهر تغييراً لمجراه للكاتبة/ بوح.الصمت

الجزء الثالث والثلاثون

البارت 33

وصل فهد وطلع للغرفة على طول فتح الباب وهو يشوف جود ضامه نفسها تبكي والصور والرسائل المقطعه حوالينها عرف الصور من الصندوق عرف ان جود شافت صوره مع رغد والرسائل الي كانت بينهم قرب منها فهد ونزل لمستواها ومسح على شعرها بكل حنيه وهمس: جود حبيبتي 
جود بعدت ايده عنها وهي على وضعيتها 
فهد: جود رفعي راسك خليني اعرف اكلمك خليني افهمك 
جود رفعت راسها وكان وجهها وعيونها محمرين وكانت تبكي مثل الأطفال حضنها فهد ودفته ووقفت
فهد وقف : جود سمعيني هالصور قديمه مالها أي اهميه عندي اذا كانت موجوده لاني نسيت اطلعها واتخلص منها كل هالصور وهالرسائل وكل الكلام الي فيها صار ماضي انتي الحين كل شي بحياتي رغد صارت ماضي وبعدين هي تزوجت الله يوفقها مع زوجها وانتي الحين كل شي بحياتي انتي زوجتي وحبيبتي 
جود كانت مضايقه وحاسه نفسها مخنوقه مو عارفه تصدقه ولا تكذبه تحس ان فكرها مشتت صارت تبكي بضيق حضنها وهو يمسح على ظهرها وشعرها بحنيه
فهد: حرام هالعيون تبكي وبعدين يا جود ما كنت ادري انك تغاري لهالدرجه حتى من الصور والماضي 
جود بعدت عنه وتوجهت لدرج الكومدينا وطلعت دفتر صغير الي متعوده تكتب فيه وجلست على طرف السرير وهي تكتب قرب منها فهد وجلس جنبها كانت كاتبه: انا خسرت كل شي بحياتي كل شي احبه اهلي امي وابوي واخوي واختي خسرتهم دفعه وحده وخسرت صوتي الي راح بروحتهم مو مستعده اخسر ناس بعد كل الي احبهم يخلوني ويتركوني حتى صديقاتي بالدار انشغلوا بحياتهم والحين نادر ما يكلموني احس اني وحيده انتوا الاهل الي طلعتولي بعد سنين تعب ما اقدر أقول اني اقدر ابعد واخليك لان مستحيل اقدر انت صرت كل شي بحياتي دخلت فحياتي وغيرت كل شي فيها اذا تركتك او تركت هالمكان وين بروح عمي علقني فيكم قبل ما يروح ورسم لي حياة بعد ما كنت تايهه من دون اهل ولا عزوة انتوا صرتوا عزوتي
فهد مسك ايدها وشال الدفتر والقلم عنها حضن وجهها بكفوفه وطالعها بنظرات كلها حب : جود ابيك تفهمي زين الكلام الي بقوله لك انا صحيح فالبدايه كنت مو متقبل فكرة زواجي منك للسبب الي انتي تعرفيه وما احب اعيد وازيد فالموضوع كل الي ابي أقوله ان انتي غيرتي كل حياتي وخليتيني انسى رغد وانسى كل شي يتعلق فيها انا الحين احبك انتي وبس رغم اني شفت نفورك مني وتهربك مني وما سمحتيلي اقرب منك ولا المسك واحترمت هالشي ولا حبيت اغصبك على شي حبيت انك تبادليني نفس الشعور وخليتك على راحتك وانا مثل ما قلتلك انا اهلك وناسك وعزوتك انتي حبيبتي وطفلتي ودلوعتي 
ابتسمت جود من بين دموعها على كلامه لها اول مره تسمع هالكلام 
فهد قام وتوجه للصندوق وشاله وفرغه كله ورمى كل شي فيه
.......................
بمركز الشرطة 
الشرطي1: سيدي تم القاء القبض على المدعو عامر وهو متعاطي كميه كبيره من المخدرات وحصلنا عنده مبلغ كبير ومجوهرات والحين هو فالحجز 
الشرطي2: بعد ما يرجع لوعيه تجيبوه لي نشوف اخرتها معاه هالعامر مشاكله ما تخلص ابد 
غسان كان بالمستشفى جالس مع مهرة مثل كل يوم يجلس معها ويكلمها كأنها معه وتسمعه طلع بعدها بيرجع البيت يرتاح 
رن موبايله استغرب من الرقم وعلى طول رد تغير وجهه وتعابير وجهه للعصبية وتحرك على طول بعد ما خلص من مكالمته 
وصل لمركز الشرطة ودخل عند الضابط الي كلمه 
الضابط: اهلا اخ غسان تفضل
غسان ووجهه مبين عليه تعابير العصبيه: وينه ابي اشوفه
الضابط: بفهمك اول كل شي 
غسان: آسف تفضل 
غسان كان على اعصابه وده يشوف هالشخص الي سوا بزوجته وحبيبته هالشي 
الضابط: هذا الشخص احنا كنا نطارده من زمان هو مدمن مخدرات ومهرب وهرب كم مره من السجن واخر مرة هرب هي هذي قبل ما يسوي الي سوا احنا مسكناه وكان عنده فلوس وكميه من الذهب وعلى حسب كلامه ان في حرمه تواصلت معه وقالتله يسوي هالشي بزوجتك وبتعطيه اجر مقابل هالخدمة ومن حسن حظ زوجتك الي الي دزته على زوجتك عطته ماي نار عشان يشوهها لكن هو خاف وما سواها 
غسان وعيونه صارت حمرا ويهز رجله من العصبيه: ما قالكم من هالحرمة 
الضابط: لا يقول ما عمره شافها والرقم الي عنده حاولنا نتصل عليه مغلق وما قدرنا نوصله 
غسان: بشوفه 
الضابط: طيب 
نادى الضابط على الشرطي الي برا وخبره يجيب عامر ..لما جا عامر ووقف قدام غسان قام غسان وهو مندفع وصار يضربه بكل قوته 
غسان: يا كلب يا حقير انت حرام تعيش 
الضابط قام وحاول يبعده عنه ونادى الي خارج عشان يساعدوه ويفكوا غسان عن عامر 
حاولوا يبعدوا غسان لكن كان ماسكة بكل قوته : حيوان قولي من الي قالك تسوي فيها هالشي هي شو سوت فيكم 
دفوه بكل قوتهم عنه وطاح على الكرسي 
الضابط: طلعوا عامر رجعوه للحجز
الضابط بعصبيه: تعرف ان الشي الي سويته غلط وان ممكن احجزك على الشي الي سويته 
غسان: اهم شي بردت حرتي فيه مع ان والله كان خاطري اذبحه
الضابط: كلامك هذا بيوديك لمكان انت ما اظن تحب تروحله فأحسن شي تخلينا نتصرف ولا تحاول تقرب منه والحين بتوقع على تعهد انك ما تتعرضله 
........................
ام فهد بفرحه: مبروك حبيبي ر اشد مبروك جواهر 
جواهر: الله يبارك فيك خالتي 
راشد: لما عرفت جواهر انها حامل قالت لازم انتي اول وحده تعرفي
ريم والفرحه مو واسعتها : الي سمعته صحيح
ام فهد: صحيح صحيح
ريم: وأخيرا بصير عمه فديتني 
الكل يضحك على ريم وحماسها 
ريم: أخيرا بيجي عندنا بيبي نلعب فيه 
راشد: نعم نعم شو تلعبي فيههو لعبة شو 
ريم: انت خلك على جانب ومن الحين اقولكم انا بسميه ولا اسميها 
ام فهد: شو شوي على عمرك 
ريم: بروح ابشر جود وفهد 
وركضت لفوق 
راشد: هالبنت مستحيل تعقل مهما كبرت انا بطلع بروح الشركة فهد قالي اسبقه 
طلع راشد ووراه جواهر 
راشد: يالله حبيبتي انا بروح اذا احتجتي أي شي لا تستحي ارسليلي 
جواهر: ان شاءالله حبيبي 
باسها على خدها وراح وجواهر رجعت لداخل 
ريم دخلت على فهد وجود من غير ما تستأذن من الحماس 
ريم: انا جيت 
فهد: بسم الله انتي من وين طلعتي وبعدين ما تعرفي تستأذني قبل لا تدخلي 
ريم: لا تعكر مزاجي فهود الحين
فهد: فهود بعينك اصغر عيالك انا 
ريم جست جنب جود 
ريم: جيت ابشركم ببشارة حلوة 
فهد: قولي ها هشو عندك 
جود كانت تسمعلها باهتمام 
ريم: بيصير عندنا نونو جواهر حامل 
فهد: ما شاءالله يستاهل رشود
جود فرحت بالخبر 
ريم سحبت جود من ايدها : قومي خلينا ننزل عند جواهر 
فهد: لحظه جود غيري ملابسك قبل لا تنزلي لا تنزلي بهاللبس 
ريم: يا عيني يا عيني عالحب والغيره 
فهد: قلبي ويهك انتي 
ريم: لا بنتظر جود
جود ضحكت على ريم واشرتلها ان دقايق وتغير وتطلعلها 
نزلا عند ام فهد وجواهر وفهد طلع من الباب الخلفي عشان جواهر موجوده بالصاله
جود باركت لجواهر عالحمل
ام فهد: عقبالكم حبيبتي جود 
جود نزلت راسها بحيا 
ام فهد بنفسها( فهد وجود صارلهم مدة متزوجين وما صار حمل معقولة الي فبالي يكون صح انا لازم اكلم فهد )
ريم: يمه وين سرحتي 
ام فهد: معكم 
.........................
رفا كانت جالسه مع رغد وسارة بغرفتهم
رغد: تقطع قلبي على مهرة مسكينه ما تستاهل 
رفا: هيه والله ما تستاهل 
رغد: الا وين حنان ما اشوفها 
سارة: كل يوم تطلع من الصبح وتطلع اخر الليل كم مرة اصادفها 
رفا: هالانسانه عديمة إحساس والله تقهر 
رغد: وغسان عادي عنده
رفا: غسان حبيبي والله هالايام ما نشوفه حتى الدوام اخذ اجازه من الصبح لليل وهو مع مهرة وحنان اخر اهتمامه 
رغد: الله يعينهم ويشفيها 
سارة: تعرفوا فاليوم الي حصلوا فيه مهرة وانتوا بالمستشفى كانت راجعه من خارج وكاشخه من خاطر وتغني ومبسوطه 
رغد: اكيد لانها تكره مهرة 
را: والله انا شاكة ان هي السفاحه الي سوت هالشي بمهرة
رغد وسارة ضحكوا على رفا وهي تقول سفاحه 
رفا: وانا صادقه 
............
حنان كانت بغرفتها تتكلم تلفون
حنان: حبيبي اليوم ما اقدر اطلع أخاف يشكوا فيني كل يوم اطلع 
رائد: يهون عليك زعلي وبعدين محضرلك مفاجأة 
حنان: مفاجأة شو 
رائد: تعالي وبتعرفي 
حنان جالها فضول تعرف شو المفاجأة: اممم طيب حبيبي باي 
رائد ابتسم بخبث بعد ما قفل من عند حنان : خلينا نتسلى شوي غبيه 
...............
سعود كان فالمطار ينتظر السايق بيروح قصره يرتاح ويريح نفسه بعد سفره كانت متعبه وبعد الصفقة الي ربحها بامريكا وصل وطلع لغرفته وانسدح على السرير بتعب غمض عيونه ونام من التعب بعد 5 ساعات صحى من النوم واتصل بالشخص الي اتفق معه عشان يجيبل جود 
سعود: اليوم باليل تكون البنت عندي 
...
فهد وراشد بعد ما خلصوا رجعوا للبيت وجود كانت مستأذنه من فهد انها بتروح عند سناء و غيداء طلعت مع السايق ما لاحظت الشخص الي كان يتابعها اول ما وصل نزلت من السياره والسايق كان عارف متى يرجعلها خلاها وطلع ما حست غير بشخص يسحبها ويروميها داخل السياره وجود كانت ترفسه وتحاول تبعده عنها لكنه كان مثبتها واشر للسايق يحرك حطلها المخدر ونامت 
............
رغد جالسه مع فاطمه بالصاله
فاطمه: كيف رعد معك
رغد : الحمدلله زين
فاطمه: الحمدلله تعرفي رغد انا كنت شايله هم رعد ودوم افكر فيه وفمستقبله تأثر كثير لما عرف انه انا مو امه وطلب صور لامه وتغيرت شخصيت كثير بعد ما كان اجتماعي ويتكلم كثير صار انطوائي وما يطلع ولا يسولف كثير كنت خايفه عليه
رغد بنفسه(خافيمنه لا تخافي عليه هذا يخوف بلد )
دخل عليهم رعد: السلام عليكم 
رغد وفاطمة: وعليكم السلام 
رعد: عن اذنكم بطلع اريح شوي 
رغد كانت مومهتمه ومطنشتنه رغد عصب من تطنيشها 
رعد: رغد تعالي الغرفة 
رغد : عن اذنك خالتي 
فاطمة: اذنك معك حبيبتي 
طلعت رغد ودخلت الغرفة كان مو موجود سمعت الماي بالحمام عرفت انه يخذ شور تسندت بالجدار تنتظره وهي تلعب بتلفونها طلع من الحمام وهو لاف الفوطة على خصره شافها واقفه ومو منتبه له قرب منها 
رعد: وبعدين معك 
رغد رفعت راسها وكانت بترد بس غمضت عيونها ودارت بجسمها للصوب الثاني من الحيا وبهمس: ما يستحي هذا 
كان وجهها مقابل الجدار وظهره مقابل رعد .. رعد لصق فيها بحيث صدره لاصق بظهرها رغد شهقت من جرأته وحركته وتجمدت بمكانها 
قرب من اذنها وبهس: أسلوب التطنيش ما احبه ومره ثانيه اشوفك تطنشيني ما يصير خير 
رغد: وخر عني وبعدين مالك حق تتحكم فيني 
رعد زاد وقرب منها حست بتوتر 
رغد صرخت فيه: وخر عني قليل ادب ما تستحي 
مسكها من ايدها ولفها عليه : من الي ما يستحي 
رغد: خلص رعد فكني منك ومن شرك يا اخي 
رعد: طلعيلي ملابس وبعدين تعالي نشفي شعري
رغد وعينها بعينه : مو خدامتك البيت متروس خدم نادي وحده منهم تخدمك
رعد: ليش انادي خدامه وخدامتي موجوده 
رغد: قلتلك حيوان وحقير ما صدقت 
رعد نفذ صبره وعطااها كف طيحها فالارض مسكت رغد خدها وهي تمنع دموعها تنزل 
نزل رعد ومسكها من شعرها: اذا مرة ثانيه سمعت هالكلام منك اذبحك 
رغد من غير ما تطالعه وهي حاسه بألم من مسكته لشعرها: والله يا رعد لا ارد هالالم لك اضعاف 
رعد دفها وبعد عنها وتوجه للكبت وطلع ملابس ولبس وتوجه للسرير ينام 
رغد قامت وطلعت من الغرفه صادفت فاطمه بطريقها نزلت شعرها على وجهها علشان لا تلاحظ خدها المحمر 
فاطمة: رعد نام 
رغد: ايه 
فاطمة: وين بتروحي اذا تبي شي خبري الخدم يا كثرهم 
رغد: بطلع الحديقة شوي اغير جو 
فاطمة: طيب حبيبتي 
.......................
فهد كان رايح جاي فالغرفة يفكر بجود تأخرت قالتله بعد 3 ساعات ترجع والسايق ينتظرها تحت ولا طلعت وتلفونها مغلق نزل عند ريم