السَّعادةُ الدَّائمة ، لَن تَصنع يوماً مُميزاً فِي حياتي.!
تَحزن لِتفرح ، تَبكي لِتضحك ، تتألم لِتُشفى.
و تَضعفُ لِتَقوى.
- غيم
...
[ مَاضِي بَعيد ]
فهد: أعتذر منك استاذ صهيب ، متعب رسب بـأربع مواد وما نجح الا بالبدنية والعلوم.
صهيب: لا حول ولا قوة الا بالله ، طيب والحل .! يعيد السنة.!
فهد: لا طبعاً راح يختبر فترة ثانية واذا نجح يقدر يروح اول ثانوي
صهيب: مشكور استاذ فهد
فهد: ولو هذا واجبي
طلع صهيب وقعد يناظر متعب الي كان قاعد لحاله ويشوف الباقين مبسوطين بتخرجهم ونجاحهم .. حتى مسوين لهم حفلة خاصة.
كل واحد معاه ابوه يهنيه ويفرح معاه ، الا هو..
ضم رجوله وحط راسه على ركبته ، هو حتى ما يعرف وش شعوره الحين .. يشتاق لأبوه وهو ما حس معاه بهاللحظة ابد.؟
بدأ يبكي بصمت ومحد كان يشوفه يبكي الا رائد و شهآب كونهم صاروا اصحابه ، ورغم هالشي خلوه يبكي براحته.
تقدم صهيب وهو شايل نتيجة متعب وجلس جنب متعب الي باقي يبكي ، تأمل الي حوله كيف لابسين لبس التخرج ويسولفون مع بعض.
صهيب: لا تنسى انه فيه حفل ثاني ، تقدر تنجح وتروح له تنبسط مثلهم.
متعب: هذي مو مشكلتي.
صهيب: اخطاءك واجد يا متعب ، لازم تصححها عشان تنفتح لك ابواب السعادة.
متعب بكل ضيق وحقد: هو ما صحح اخطاء ، ظل يستمر فيها مو مهتم اذا انا اعاني اول لا اذا امي تعاني او لا حتى اذا محمد يعاني ولا لا ، ما يهتم بتصحيح اخطاءه .. ولأنه له سلطة وحرية طلب مننا احنا نتحمل نتيجة اخطاءه بدون ما يحس بأي ذنب .! ضربني بالسوط الين نزفت ، رسم وشم على جسمي لين فقدت الوعي من الالم ، حرقني بموية حاره ، شال ظفري من جلدي .. كله عشان يرتاح عشان يثبت انه له سلطة علي وان اي خطأ هو يسوييه لازم انا اتحمله زي العبد عنده..
متعب رفع صوته وسط صياحه: اكرهه ، اكرهه ، اكرهه .. تركني اخذ مخدرات عرض جسمي للبيع و حبسني بقفص زي الكلب ..
متعب: فوق كل هذا البشر عديمين رحمة ، لقبوني بالقاتل وصاروا يفرون مني كأني ملعون.. مو فاهمين ولا مهتمين قد ايش انا اعاني قبل ما يموت قد أيش بكيت وتعذبت لين صرت جسم بدون روح .. والحين صاروا يتهامسون اني فاشل ، حتى المعلمين كانوا يضحكون لأني رسبت .. اكره البشر اكره اهلي اكره ابوي ، اتمنى كلهم يموتون ويذوقون نفس الالم الي انا اذوقه.
تنهد صهيب وقعد يناظر نتيجة متعب.
صهيب: الحين انت معوض ، عندك اصحاب وعندك بيت واهل ، عندك فرصة تثبت لهم انك عكس كذا .. لا تخليهم يتحكمون فيك بسبب كلام طلع من لسانهم.! البشر دايم كلامهم يقتصر على الحديث .. لو ربطت لسانهم صارت الدنيا سعيدة وبخير .. بس فيه حكمة يا متعب ، لا تخلي كلام الناس يهدمك حتى لو كان جارح مثل مخالب الصقر .. خلك مؤمن وفاهم ان كلامهم ما بيغير نتيجة سواء مدحوك او لا .. انت الوحيد الي تقدر تصنع سعادتك قوتك وذكائك.
