تحدت الطوفان الجزء الثاني

الفصل الثاني

الحلقة (2) ( تحدت الطوفان2 ) تحدي الطوفان
بقلم :- أسماء أبوشادي
__________________________________
استغفر الله العظيم رب العرش العظيم
سبحان الله وبحمده سبحان الله العظيم

شوفني بقلبك قبل عنيك
شوف فيا كل حاجة بخبيها عن عيون الناس
وحس بقلبي وضعفي
واوعاك تغرك قوتي وقسوتي على اللي مني
دا حاجز بس عشان ماحدش فيهم يشوف كسرتي
عارفة أنهم أهلي واحبابي
لكن معذرةً حبيبي أنا عمري ماكنت ضعيفة ادامهم
صدقني انا بضحك قصادهم لكن جوايا حاجات كتير ماينفعش أظهرها
و زي ما كان حبك في يوم جوايا وماينفعش اظهره
لازم كمان تفضل أحزاني جوايا وبعيدة عنهم
هقولك كل حاجة ومش هخبي عنك حاجة
بس اوعى في يوم تاخد اللي قولته ضدي
صدقني وقتها انا هنتهي

سيلين لسه قاعدة على سجادة الصلاة وأسر ادامها. رجعت بضهرها وسندت على الحيطة.

سيلين بخفوت / هحكيلك كل حاجة . برغم اني عاهدت نفسي ماحدش يعرف ضعفي اللي عيشته لكن هقولك.
ضعفي بدأ بكسرك لقلبي يوم الحفلة. دي كانت أول ضربة ليا مايغرش كل الكلام اللي قولتهولك وقتها. بس فعلا انا اتوجعت منك اوي لأني كنت بحبك اوي

أسر بحزن / أسف مليون أسف هفضل طول عمري ندمان على كل كلمة قولتهالك وقتها

سيلين / ملايين الأسف وندمك مش هيغيروا حاجة وماتقلقش. كلامك وقتها كان يعتبر نقطة في بحر

انا طول عمري عايشة بالنسبة للناس حياتي سهلة. أفضل حياة الكل يتمناها

بس مايعرفوش انى طول عمري بحلم بحياة عادية
بسيطة في بيت صغير مع الانسان اللي احبه ويحبني
من صغري وانا دايما مع بابا. يسافر هو اسافر انا. عمره يوم مابعد عني لو راح شغله بكون معاه ههههههههههههه حتى لما أخرج من المدرسة السواق كان يوديني له في الشركة. مش يروحني على البيت و وقت امتحاناتي مابيسافرش لأنه مش هيقدر يسافر لوحده ويسيبني حتى لما كبرت كذا مرة أحاول اني اروح رحلة مع الجامعة. كان ممنوع. ولا حتى خروج مع الصحاب لوقت طويل ولا سفر
حياتي كانت بتقتصر على الشغل والدراسة. علمني كل حاجة. وعرفني على اصدقائه وكان يقولي سيبي لنفسك في كل بلد صديق لأنك اكيد هيجي يوم وتحتاجيه
انا اكتر واحدة في اخواتي قضت وقت معاه
كان صاحبي وصديقي قبل ما يكون ابويا
كان مثلي الأعلى بالحياة
كنت بشوف في عيونه فرحة كبيرة لما اعمل حاجة حلوة ولا احل مشكلة ويشوف ذكائي فيها
ولا لما يشوف قوتي في المواقف وهيبتي ادام الناس كان بيختار معايا لبسي ويقولي أن المظهر شئ أساسي وبيعطي خلفية للادامك عن شخصيتك

أما ماما. سناء. كنت بشوف في عنيها فرحة بيا برضوه
لكن مش فرحة طبيعية
كانت فرحة مختلفة فيها حاجة ناقصة. فيها شئ مختلف وكأنها فرحة مكسورة. صحيح فرحة حقيقية مش مزيفة لكن مصحوبة بالألم
غير الفرحة اللي بشوفها في عيونها لأحمد أو محمود
يمكن حتى محمد كانت نظرتها له أحسن من نظرتها ليا ممكن ماتكونش فيها نفس المشاعر والقوة لكن على الأقل مافيهمش ألم ولا كسرة
أما صافي. كنت بشوف في عينيها نظرة كره. أو عتاب على حاجة انا اصلا مش عرفاها
كنت بقول يمكن علشان بنت طليقها لكن ما محمود وأحمد اخواتي ليه مش بتبصلهم زيي. وكنت بقول يمكن علشان هي أطلقت بعد ولادتي أو في وقت ما انا اتولدت زي ما بيقولوا