تحدت الطوفان الجزء الثاني

الفصل التاسع

الحلقة(9)( تحدت الطوفان ٢؛ تحدي الطوفان) بقلم:- أسماء أبوشادي
______________________________________

اللهم سخر لنا من حظوظ الدنيا ما لا عين رأت و لا إذن سمعت ولا خطر على قلب بشر
اللهم اسعدنا ثم اسعدنا ثم اسعدنا حتى تبلغ سعادتنا عنان السماء

اللهم تقبل دعائنا

سيلين واقفة بتشرب سجاير وحالتها حالة وبتفكر في كل اللي حصل من بداية علاقتها ب اسر لحد اللحظة دي وكل ما توصل لفكرة أنها غلطت وكان لازم تراعي وجوده
ترجع وتقول انه استضعفها واتعامل معاها بعنف غير مبرر وأن هي دي حياتها وهي ماغلطتش

واللي زاد حالها أنها أظهرت ضعفها ادامه وحكيتله كل حاجة وفي دماغها أنه استغل ضعفها مش اكتر وعايز يتحكم في حياتها

( و بما ان هي من عيلة تاج الدين ومن صفة العيلة دي الغرور والكبرياء طبعا رفضت انها تكون كدة وخصوصا ان علاقتها بآسر مش طبيعية وأنه متجوزها بطريقة هي لحد دلوقتي مش متقبلاها

سيلين بقيت على حالها تفكر وتفكر وتفكر
بتشوف غلطت في ايه وهو كمان غلط في ايه ولو هي غلطت دا يعطيه الحق انه يعاملها بالطريقة دي

@@@@@@@@@@@@@@@@@@@

أسر بعد ما سيلين مشيت لام نفسه وانبها
سيلين غلطت بس هو كان لازم يفهمها غلطها و يوضحلها كل اللي بيضايقه لكن بأسلوب أفضل من ده

ومستغرب نفسه هو ازاي قدر يقسا عليها بالشكل ده خصوصا أنه عارف حالتها الفترة اللي فاتت كانت ازاي
وكمان الضحكة اللي غابت من وشها رجعتلها ليه بقى هو متضايق
مش كان عايز كدة من الأول
إنها ترجع للعيلة وأخواتها وتضحك وتفرح وتبقى محور حياة الكل
طيب ليه دلوقتي مش قابل الفكرة دي يمكن علشان هو عايزها له لوحده أو هو اتعود يكون لوحده دايما وبأرتباطه من سيلين هيقرب من العيلة تاني علشانها
( تاني ) هو اصلا ماكنش قريب قبل كدة علشان يقول هقرب تاني هو طول عمره بعيد. عايش حياته ودنيته كأنه لوحده بيزورهم اوك بيحضر المناسبات اوك. لكن زيه زى اى ضيف يمكن فارس و نها قريبين للعيلة أكثر منه
ااااااااه فارس
فارس اللي بعد ماهو طلع نام مراته خرجت بعد نص الليل علشان يتكلموا لوحدهم في الجنينة
هو ازاي قدر يقف في اليوم ده بدون ما ينزل يقتل فارس. يمكن علشان واثق في صاحبه والاهم واثق في مراته
بس مهما كانت الثقة كبيرة ما ينفعش ده يحصل
ولو كان بيحصل قبل كدة فخلاص دلوقتي هي مراته في عصمته ممنوع تتصرف بالطريقة دي تاني
مستحيل يسمح ل حبه وعشقه ودلعه ليها أنهم يأثروا على افعالها وحفظ كرامته

أسر بعد تفكير طويل قرر انه يروح لسيلين ويفهمها ويشرحلها كل اللي بيفكر فيه لكن بأسلوب مناسب

@@@@@@@@@@@@@@@@@@@@@@@@

أسر وصل بيت سيلين وشافها واقفة في الجنينة وسرحانة قرب منها
واندهش أو اتصدم لما لقاها بتشرب سجاير
هو كان نسي أنها بتشربها لأنه ماشفهاش بتشرب من ساعة ما شافها قبل كدة