تحدت الطوفان الجزء الثاني

الفصل الخامس

الحلقة(5)( تحدت الطوفان2 :-تحدي الطوفان) بقلم:- أسماء أبوشادي
___________________________________

اللهم إني أسألك العفو والعافية في ديني ودنياي وأهلي وذريتي
سبحانك جل علاك وتقدست اسمائك يا من لا إله إلا أنت استغفرك وأتوب أليك انى كنت من الظالمين

أخي
يا احب آليا من كل الكون
أنت السند الذي خلقه الله ليسندني
لا تقسى عليا أخي فهذا شئ لا يحتمل أخي
وإن قسيت لا تخف انا أبدا لن أغضب منك
قد أحزن وأبكي وابعد بعض الوقت ولكن انت أخي شقيقي لا مجال للخصام الطويل
إن ابتعدت يوم أو شهر أو سنة
فلن يدوم بعادي
أنتم اخوتي فلا توجد على ظهر الأرض قوة قادرة على ابعادنا وانفصالنا أبدا

محمود بعد كلامه مع سيلين
ركب عربيته ومشي بيها وهو بيفكر في كل كلامها
وبيفكر اد ايه هو أناني فعلا مافكرش فيها وقتها لا فكر في العيلة وسمعتها ومصلحتها ونسي أن اخته عرفت حاجات توجع هو يا راجل صعب يتحملها
هو كان خايف عليها فعلا ومستوعب ان دي صدمة ليها. لكن كان لازم يكون جنبها حتى لو هي رفضت
كان لازم يسيب الدنيا كلها والشغل وكل حاجة ويكون مع اخته
اللي برغم صغر سنها وأنها اصغرهم إلا انها دايما بتحس بالكل وهي الوحيدة اللي بتفهمه من نظرة عينيه بدون ما يتكلم حتى

محمود ماحسش بنفسه غير وعربيته بتتصدم بعربية تانية ادامه من كتر سرعته. وهو ماكنش رابط الحزام
دماغه اتخبطت في الدريكسيون وانجرحت وهو من اثر الخبطة فقد الوعي

@@@@@@@@@@@@@@@@@

أسر وسيلين ركبوا العربية وفي طريقهم للمستشفى
أسر بيسوق بسرعة وسيلين قلقانة على اخوها وبتلوم نفسها أنها السبب في اللي حصل وأسر بيحاول يهديها واخيرا وصلوا ادام المستشفى بس قبل ما سيلين تنزل بسرعة أسر مسك ايديها وشدها عليه

سيلين بدموع / سيبني يا أسر

أسر مسح دموعها بحنية / ممكن تهدي وكفاية دموع بقى. محمود كويس والله رامي اكدلي أنه أصابته سطحية
وانتي مش السبب في اللي حصله دا قضاء وقدر

سيلين/ لا يا أسر انا السبب
انا السبب. قولتله كلام كتير ضايقه وجرحه انا زعلته يا أسر انا السبب

آسر / يا حبيبتي أهدي والله ده نصيبه
وبعدين انا عايزك قوية كدة اوعي تظهري ضعفك ادام حد. نسيتي انتي قولتيلي ايه
( مع اني البنت بس اتعودت اكون سند ليهم )
لما يشوفوكي دلوقتي بالحالة دي هيحسوا بأيه

سيلين/ ما انت شوفتني بحالة أسوأ من دي

أسر برومانسية / انا بس اللي مسموح ليا اشوفك كدة إنما غيري ممنوع
انا متجوز سيلين القوية اللي مافيش حاجة تكسرها ابدا

سيلين/ دا اخويا يا اسر أخويا ولو في حاجة في الدنيا ممكن تكسرني بعد اللي حصلي فهي أن حد في اخواتي يجراله حاجة