تحدت الطوفان الجزء الثاني

الفصل الثالث

الحلقة (3) ( تحدت الطوفان 2:- تحدي الطوفان) بقلم :- أسماء أبوشادي
_________________________________
ربي سبحانك لا إله إلا أنت استغفرك وأتوب أليك اني كنت من الظالمين
ربي اغفر لي ذنبي ويسر لي امري واكفني بحلالك عن حرامك

هقولك عاللي فيا و انت أسمعني
هشكي وأقول على كل اللي وجعني
وحكيلك واقولك ازاي أقرب ما ليا باعني
أصل قدوتي ومثلي الأعلى كان هو أول ماخدعني
صحيح هو مات لكن سابني للدنيا بعده تكسرني وتهزمني

سيلين في حضن آسر وهو ضامم راسها على صدره وهي استكانت للمسلاته على راسها وحضنه ليها واتشبثت في جامد وبدأت تحكي عن لقائها ب أمها اللي ولدتها

سيلين / قفلت معاه بسرعة وجريت اغير هدومي واداري إثر دموعي عايزة اروحلها بسرعة. وكنت بفكر هقولها ايه وهي هتقولي ايه
هتقولي أن بابا اخدني منها ورفض أنها تشوفني ولا هتقولي غصب عنها. ولا هتقولي سامحيني. ولا مش هتتكلم وهتاخدني في حضنها علطول
طيب انا رد فعلي هيكون ايه و وقتها سألت نفسي سؤال مهم اوى
يا ترى حضنها هيبقى زي حضن ماما سناء ولا مختلف
حضن سناء جميل اوى وبنسى فيه الدنيا كلها وهمومي واديني طلعت مش بنتها طيب دي بقى حضنها هيبقى له طعم مختلف. اكيد
( وابتسمت بألم )
روحتلهم الاوتيل واتصلت بعدنان طلب مني اطلعلهم الجناح. وطلعت
وقفت ادام الباب وانا مترددة و بحاول اتماسك وارسم على وشي القوة لكن كل ده اتبخر أول ماعدنان فتح الباب ولقيته بيبص في الأرض وبيهرب بعينيه مني
دخلت لقيتها قاعدة بكل راحة ولا كأنها ملكة وقاعدة على عرش مش باين عليها أي تأثر خالص ولا حزن ولا حتى مرض تحسها كدة جبروت
وقفت ادامها وانا حاسة كأنى عريانة وكل الكلام اللي كنت بحضره علشان اقوله نسيته ودموعي بدأت تحرقني في عينيا وعايزة تنزل. وببص في عنيها بدور على أي حاجة عشان افهمها لكن مالقتش وهي بتبصلي برضوه وبتقرأ عنيا زي ما انا بحاول اعمل لكن في فرق كبير جدا صحيح احنا شبه بعض جدا وكأني نسخة منها لكن الفرق شاسع

سيلين القوية بقت زي طفلة تايها و وحيدة ادام واحدة جبروت بالشكل ده

فلاش بااااااااااااااااااااااااااااااااك

طال الصمت والموقف مهيب وماحدش اتكلم

سيلين بخفوت / انتي سيلا عدنان قاسم أمي

سيلا بجمود وهي بتشاور على كرسي ادامها / اقعدي

سيلين قعدت بدون ماتتكلم تاني

سيلا / أيوة انا سيلا عدنان قاسم لكن انا مش أمك

سيلين / ازاي. انا عملت تحاليل واتاكدت وعرفت الحقيقة كلها

سيلا / أي انا ولدتك وجبتك من بطني لكن انا ماعندي ولاد ولا بنات وانتي مانك بنتي

سيلين بصدمة / أ انتي انتي. انتي