مها قفلت الباب وملصت عبايتها وجاتني ..
كانت لابسة بجامة قصيرة بي تحت ... جات قعدت جنبي وقالت لي ما داير حاجة؟؟…
انا : ااي داير اشرب شيشة..
مها : ههههه بايخ .. خلي الهظار وقوم ..
انا : اقوم امشي يعني .. تمام
مها : انت دمك بارد كدا مالك .. هسي في زول قاعدة معاهو مزة ومقفول عليهم باب غرفة براهم ويمشي يخليها ؟؟
انا : عادي يا بت حتي ولو مقفول علينا باب حمام انا لو ماعايز اعمل حاجة ما بعملها والشغلة قناعات ...
مها : ولا انا ما عاجباك ؟؟
انا : ما حكاية ما عاجباني لكن انا متزوج وما عندي ليكي حاجة ..
مها : نفسي اصدقك والله ..
انا : اصلا كتير ما حيصدقو كلامي دا وممكن يعتبروني زول مريض او ما كويس لكن عادي صدقي يا ستي… صحي انتي ليه بتعملي كدا وانتي زولة حلوة وكتير بيتمنوكي ليه ما تتزوجي ؟؟
مها بقت تبكي وختت راسها في رجليني .. ياخ حننتني البت دي .. قلت ليها : هسي مالك بتبكي ؟؟
مها : تعرف يا عادل والله انا ما زولة كعبة و زي ما انت توقع ...والله انا زولة كويسة ..
انا : طيب ليه بتسوي كدا وتضيعي نفسك ؟؟
مها : ااااااه يا عادل لو تعرف الجواي .. انا شايلة هموم ومشاكل الدنيا دي كلها في راسي…
انا : لا حول ولا قوة الا بالله مشاكل شنو يا بت كمان ؟؟
مها بقت تبكي زيادة .. المهم طبطبت عليها وقلت ليها معليش وربنا يفرج عليك ويهديك يا مها…
مها : انا محطمة ومكسورة…
انا : المحطمك شنو يا بت ؟؟
يلا مها حكت لي عن امها والحاجات البتعملها .. والكلام القالو لي حسن داك كلو طلع صاح..
مها بحزن : تعرف يا عادل انا لو كنت بت ما كويسة وبقيت زي امي كان ما بشتغل ولا بتعب ..لكن والله انا شغالة عشان اصرف علي نفسي بالحلال وامي ما قاعدة اشيل منها ولا جنيه ..
انا : استغفر الله العظيم ..طيب قاعدة معاها وبتاكلو سوا كيف ؟؟
مها : بس عشان امي وما داير اعقها كدا ربنا بحاسبني لكن حاجاتي بشتريهم براي و اكلي بعملو براي من قروشي وهي بتاكل معاي لكن حاجة جابتها هي انا ما باكلها....
انا : وليه انحرفتي وبقيتي تشربي شيشة وتمشي مع شيري و و و… .
مها : شيري دي صحبتي من ايام الجامعة واي حاجة بتعملها انا عارفاها..بس هي بت طيبة والله ومسكينة وعايشة نفسيات ..
مها : وانتي تابعتيها وبقيتي زيها..
مها : تصدق يا عادل غير الشيشة تاني ما قاعدة اعمل حاجة كعبة .. وتصدق كمان مافي راجل لمسني للآن..
انا : ههههه دا حنك منك ولا شنو؟ ..
مها : والله ماحنك و مافي راجل لمسني.. وانا الشيشة والحاجات البسيطة البعملها دي بحاول افرق بيها عن نفسي… يا عادل والله انا ما كعبة ..
انا : طيب والحركات القاعدة تسويها لي دي دايراني افهم شنو؟؟
مها : بالجد انا حبيتك ..وكنت دايرة اوقك وتتزوجني بالحلال؟؟
انا : اتزوجك كيف وانا متزوج و ماهيتي يا الله يا الله بتكفيني انا وزوجتي وتاني اجيب لي هم .!!!
مها : انت اتزوجني وانا ما دايرة منك حاجة والبيت بأجرو انا بس دايرة راجل يسترني والله اتقدمو لي ناس كتااار بس شايفاك انت المناسب لي ..
انا : وعصام ؟؟؟
مها : عصام انا ما حبيتو كنت بضيع بيهو زمن بس…
انا : احسن ليكي عصام والله زول كويس ودايرك ..لاني ما بقدر اتزوجك كفاية علي المسؤولية ال انا شايلها ..
مها : انا بجيبك لو بي شيخ ابكر بجيبك…
انا : هههه انا ود فقراء يا بت ما بتقدري علي…
مها : انت قاعد وانا قاعدة ونشوف ..
يلا هي قالت الكلام دا وكانت جادة لكن انا ما اشتغلت بيها كتير ... ..بس المهم اكتشفت انو مها زولة طيبانة بالجد ..رغم انو امها انسانة سيئة.. بس هي دواخلها نضيفة والحاجات البتعملها دي عشان تفك عن نفسها .. ..
اها طلعنا من الغرفة مشينا ولعنا الشيشة وشربنا حجر ..وقاعدين نتونس كدا ..حسن طلع من الغرفة مستعجل و قال لي ..قوم ارح سريع…قلت ليهو وين يا معلم .. قال لي ارح ارح بعدين بوريك…المهم طلعت معاهو وما عارف الحاصل شنو… في الطريق قال لي اسمع الشغل تم وعرفت كل حاجة والمعلم الكبير...
انا : ومالك طلعت سريع وخليت شيري في الغرفة ..ما قلت بيبيتو …
حسن : بيبيتو شا يا مان خلاص الشغل تم .. تاني ما عندي ليها حاجة.. ....
المهم افترقنا واي زول مشى في اتجاه ...
وصلت البيت زي الساعة 12 بالليل ورقدت في السرير ....جات رسالة من عثمان (مساء الخير) … ياخ قلت عثمان صاحي لحدي الزمن دا عندو شنو.. المهم رميت التلفون… .واتذكرت نون الليلة مافي.. فقدت ضحكتها وابتسامتها ووجناتها الجميلة…قلت اتصل عليها… تاني غيرت راي ..
بعد شويث جاني اتصال من مها ..
مها : وين مشيتو مالكم اتأخرتو ..
انا : انا غايتو في البيت لكن معتز ما عارفو مشى وين ..
مها : اخس عليك ليه مشيت يا عادل ..مش قلنا بايتين سوا ؟؟
انا : هههه بيتي مع شيري وونسو بعض…
مها : وحسن مشى وين وقافل تلفونو مالو لانو شيري اتصلت عليهو ؟؟
انا : ما عارفو لكن انا اتفارقت معاهو من قبيل ..
مها : طيب باي نتلاقى بكرة في المصنع…وقفلت..
اها عدت الايام وانا اصلو ما اتصلت بي نون ولا هي اتصلت علي ..واي واحد فينا عامل تقيل وراجي التاني يتصل عليهو ....
في يوم قاعد في المكتب كدا جاني اتصال من عثمان… .
انا : الو عثمان كيف..
..: معاك سعاد كيف انت ومالك مختفي ما قاعد تجينا ..
انا : والله مشغول بس .. عثمان وبناتك كيف؟؟
سعاد : كويسين الحمد لله ..اسمعني لازم تجيني في البيت ضروري والموضوع حياة او موت..
انا : خير يا سعاد في شنو.. عثمان تعب تاني.؟؟
سعاد : عثمان نصيح ما عندو عوجة… بس ضروري جدا بعد تطلع من شغلك لازم تجي الييت.. وانا منستنياك..
انا : خلاص تمام ..
قبل ما اقفل منها دخلت علي مكالمة من نون… فرحت وقلت اخيرا اتنازلت عن كبريائها وضربت لي ... ورديت ..الوو
ردت علي امها وقالت : عادل الحقنا ماشين علي المستشفي نون وقعت اغمى عليها… ..
.
.
( مرات بنكابر ونتخذ قرارات ممكن تتسبب لينا في مشاكل او قد تنهي حياتنا )
نتابع ونشوف…
.
.
#يتبــــــع
