قعدت في الكرسي حقي وانا مرتبك وهي لاحظت لي ، ف اول مرة القى بت تتعامل معاي بالجراءة دي .
انا : خير ان شاء الله دايرة حاجة؟
مها : قلت اقعد اتونس معاك شوية واتعرف عليك ..
انا: دا ما وكتو والشغل اهم من الونسة هسي قومي امشي شوفي شغلك وبعد الشغل ممكن نتكلم.
المهم قلت اتخارج منها لانها بالطريقة دي حتجيب لي مشاكل والبت شكلها قاصداني وانا مافاضي ليها..
مها قامت وشكلها اتضايقت من كلامي ولمن وصلت باب المكتب عاينت لي انا دنقرت عملت نفسي مشغول بي حاجة يلا هي طلعت ومشت شغلها ..
حسيت بالذنب تجاه نون قمت شلت تلفوني اتصلت علي نون ..
نون : الو..
انا: هلا بالغلا الشوق ليك يا ست الريد..
نون: هههه كتير يا سيدي مالك في شنو اتصلت علي ؟؟
انا : يعني الا يكون في حاجة عشان اتصل علي مرتي واسمع صوتها.!!!
نون: لا لا لكن ما من عوايدك تتصل علي وانت في الشغل..
انا : عشان الصباح ما صبحت عليك و خلاص تاني كل يوم بتصل عليك عشان ما تستغربي..
نون : تمام والليلة تعال بدري عشان عندي ليك مفاجأة.
انا: مفاجأة شنو يا بت ؟؟
نون : قلنا مفاجأة يعني ما تستعجل ..
انا : طيب يا روحي دايرة حاجة اجيبا ليك وانا راجع ؟؟
نون : سلامتك بس يا سيدي..
انا : تسلمي .. يلا لي بعدين..
نون : يلا باي..
انا : باي نق تربيع…
قفلت التلفون وجريت نفس طوييييل بقيت اتخيل في المفاجأة بتاعت نون ، قلت ما اسبق الحوادث وخليها لي بعدين ..
اها لاحظت في شاشة المراقبة كل المهندسين والعمال بقو شغالين كويس وفي انضباط ، قلت الناس ديل الا يكون في زول مرقبهم عشان يشتغلو بضمير ولا شنو!!.
قعدت شوية وطلعت مشيت علي المدير دخلت سلمت عليهو ،
المدير : كيف الشغل وكيف العمال ؟؟
انا: تمام شغالين مية مية وان شاء الله نحاول نزيد الانتاج ونوزع في مناطق تانية غير المناطق ال بنوزع فيها حاليا..
المدير: خير يا زول بس همتك معانا وخلينا نشوف تغيير وتقدم للمصنع.
انا: ان شاء الله وربنا يسهل.
المدير: بالمناسبة بكرة الجمعة تجي انت ونون لانو امها قالت عازماكم..
انا : تمام.. يلا انا استاذن عشان امشي اشوف شغلي .
المدير : كويس اتفضل..
طلعت من مكتب المدير ومشيت علي قسم التعبئة والتغليف لقيت مها قاعدة في كرسي وشغالة تدردش في تلفونها. بقت تعاين لي ما اشتغلت بيها ، مشيت لفيت علي العمال شفت لي بت من الشغالات في التعبئة شكلها تعبانة وعيانة لكن رغم ذلك شغالة . وصلت عندها لقيت وشها شاحب وعيونها صفرة ..
انا : سلام .
اسمها (ملاذ) ردت لي بصوت مبحوح : وعليكم السلام ورحمة الله وبركاته.
انا: خير يا اخت مالك شكلك عيانة؟
ملاذ : ايوا
انا : طيب ليه ما اخدتي اذن ومشيتي البيت؟؟
ملاذ : كلمت مها بس ما صدقتني وقالت لي لو غبتي بخصم عليك .
انا : خلاص تعالي معاي.
سقتها وجينا لي مها ..
انا: مها ملاذ دي مش قالت ليك عيانة ليه ما اديتيها اذن وخليتيها تمشي بيتهم ؟؟
مها : دي ما عيانة ولا اي حاجة بتستهبل ساي .
انا : بتستهبل شنو دي من شكلها عيانة ، يعني ما شايفة وشها الشاحب وعيونها الصفر ديل ؟؟
مها : دي حركات منها بس اسألني منها انا بعرفها كويس ..
انا : حركات شنو يعني الا تموت ليكم هنا حتان تصدقي انها عيانة ..
مها : خلاص اديها اذن وانت المسؤول..
انا : اااي انتي ما عندك شغغلة و انا المسؤول .
قلت لي ملاذ : خلاص يا ملاذ امشي بيتكم ولمن تبقي كويسة تعالي الشغل .
ملاذ بانكسار : كدا بيخصمو مني وانا محتاجة للقروش والله خليني اشتغل ما مشكلة بتحمل ..
انا : لا لا امشي ارتاحي في بيتكم ومافي زول ح يخصم منك انا المسؤول ..
ملاذ : شكرا ليك ..
وطلعت مشت ..
قلت لي مها : خليكي متساهلة مع العمال وخلي عندك انسانية لانو ديل بني ادمين ما بهايم عشان تتعاملي معاهم بالقسوة دي .... وطلعت مشيت خليتها قبلي ما ترد علي..
دخلت مكتب عصام لقيتو قاعد سلمت عليهو رد علي بدون نفس . قلت ليهو في عاملة اسمها ملاذ كانت مريضة دي تستلم مرتبها كامل بدون خصم ..
اليوم انتهي وطلعت مشيت البيت وانا متلهف للمفاجأة بتاعت نون ، وصلت البيت سلمت علي ناس البيت لقيت نون قاعدة معاهم ومشيت غرفتي بهناك هي جات وراي قالت لي خش استحم عشان اجيب ليك الغداء.. قلت ليها وينا مفاجأتك .. قالت لي بعد الغداء بوريك…
خشيت استحميت وجيت لقيت الغداء جاهز ملاح خدرة وكسرة ونون قالت لي اتغدي انت لاني اكلت مع ناس الحجة .. قلت تمام ، دخلت يدي في الصحن واكلت لي لقمة لقيت الملاح ما ياهو ولا نفس الطعم بس عملت نايم لانو نون قاعدة تعاين لي ...اكلت لمن شبعت وهي شالت الصينية ومشت بهناك اخدت زمن وجات جابت معاي الشاي ، قالت لي اها رايك شنو في الملاح .. قلت ليها . مية مية ليه يعني السؤال دا ... ابتسمت وقالت لي انا العملتو… قلت ليها ماشاء الله بديتي تتعلمي كويس ومع مرور الايام بتبقي ست بيت .. قالت لي شهر بالكتير واكون اتعلمت الطبيخ والكسرة والعصيدة .... ضحكت وقلت ليها والله نفسي اشوفك ست بيت وآكل من يدك الطاعمة دي…
عدت الايام ونون كل يوم بتطبخ وتجيب لي وانا باكل وبكمل الاكل رغم انو بكون ما بالشكل والطعم المطلوب لكن عشان اشجعها وما داير احبطها . لكن الحمد لله بعد مرور فترة من الزمن بقت طباخة ماهرة واتعلمت الكسرة لكن العصيدة لسة بتعملها نية ……
علاقتي مع مها كانت عادية جدا بنتونس مع بعض ونضحك لكن كنت حذر جدا منها وبتعامل معاها في حدود وما داير اقرب منها اكتر ، رغم اني وريتها اني متزوج لكن كانت بتجيني في المكتب وبتعمل حركات وتغريني لكن كنت بتحاشاها وبحاول اتخارج منها بي اي طريقة ولو اطريت بمرق بخلي ليها المكتب ..
في يوم من الايام كنت قاعد بالمساء في الشيشة اتصلت علي مها رديت ليها..
انا : الوو
مها : هلا كيف تمام..
انا : بخير الحمد لله ..
مها : غريبة يعني كل يوم اتصل عليك بالمساء ما قاعد ترد علي لكن الليلة رديت .
انا : لمن بتتصلي انا بكون في البيت والليلة قاعد في النادي عشان كدا رديت ليك..
مها : بتلعب كتشينة ولا شنو ؟؟
انا : لا بشرب لي حجر شيشة وراجع البيت ..
مها بذهول : انت بتشرب شيشة ؟؟
انا : ااي بس ربنا يهديني ..
مها : طيب بكرة بعد الشغل انا عازماك عليك الله ما تشرد زي كل يوم ..
انا : عازماني شنو يا بت ؟؟
مها : انت مالك بس بكرة ما تمشي البيت انتظرني .. يلا باي .
قفلت وانا متستغرب البت دي عازماني شنو كمان ..
الصباح مشيت الشغل واليوم عدى وحاولت بقدر الامكان اتحاشى مها وكويس انو نهائي ما جاتني في المكتب…
اخر اليوم قفلت مكتبي وقلت الحمد لله مها ما جاتني وان شاء الله تكون نست انها عازماني ..
طلعت من باب المصنع شفتها ليك واقفة برا المصنع ..
مها : مالك اتاخرت انا منتظراك من قبيل ..
انا : كان عندي شغل وخلصتو.. اها خير يا مها..
مها : انت نسيت اني عازماك الليلة ولاشنو؟؟
انا : والله يا ستي ما نسيت لكن ما جاهز يعني وعندي مشوار كدا مهم ..
مها : مشوارك خلي بعدين هسي ارح معاي.
انا : لكن مااا…
مها : لكن مااا شنو !! انت خايف مني ؟؟
انا : اخاف منك كيف. .. وانا بخاف كمان .. هيع ارحكي يا بت....
.
.
.
#يتبــــــع
