غريب في العراق

البارت -3-

لحد مااجه اليوم الي خابرني عمو وكلي بعد اسبوع لسفرك ولازم تمر عليه عندي هواي اشياء وياك قبل لتسافر اني كلت لاهلي اريد اخلص دراسه بتركيا وهمه مامانعو رحت للمكتب يم عمو نجاتي دخلت هو جان منتظرني اصلا سلمت عليه وكعدت انطاني جواز السفر واوراق خاصه
-نجاتي :اسمع ابني اكو شخص اني اعرفه هو تاجر عراقيي راح انطيك اسمه واكله عنك  من توصل هوه راح يكمش لافته مكتوب بيهه اسمك واسمه بلمطار  هو راح يجيبك للبيت الي اجرته الك وراح يدليك على الاماكن الي ممكن تحتاجهه قريبه منك وتدفعون الفلوس لصاحب البيت وغيره واشتريلك خط مناك حتى تفعل خطك (سيمكرت ) واي شي ثاني تحتاجه كله هو ماراح يقصر وياك وبعد كم يوم من ترتاح اخذه وروح قدم على الجامعه واندل مكانهه اني كتله اجر البيت بمكان قريب واكيد هو هيج
-زين عمو انت منين تعرف هذا الشخص
-ابني هذا تاجر نتعامل وياه على مود البضاعه وحتى يعرف يحجي لغات يعني عادي
-اي عمو بس العراق مايستاردون هواي اشياء منه
-صح بس اكو اشياء قليله ياخذونهه منا
-زين عمو اني هواي اشياء مامفتههمهه هناك
-ولا اني مفتهمهه اكيد هو احمد راح يفهمك انت اسأله مو تضل ساكت وهو يشرحلك
-زين اذا هيج راح اروح اني
-ليش مستعجل بعد هواي امور اسمع ابني لا تكول اني اجنبي ابد لان احنه مانعرف شلون راح يكون تصرفهم وياك ومانظمنهم كوللهم اني عراقي جنت مغترب بغير دوله
-زين والعميد اكيد راح يعرف
-اني رتبت كلشي ويه العميد ووصيته مايحجي -زين اذا بعد ماكو شي اني اروح واشكرك معروفك ماراح انساه طول حياتي
-ولو انت تدلل اني والشباب راح نجي وياك للمطار ونودعك
خلص الاسبوع واجه يوم سفري رحت اني واهلي للمطار وامي طول الطريق تكولي كل مره تسافر انت بس مااعرف ليش هاي السفره مخوفتني اني هديتهه كلتلهه يمكن لان وحدي او راح ابقهه هواي ضليت اهدي بيهه بس هيه ماهدت وضلت خايفه قلب والده بعد واني اكذب اذا كلت ماخايف ومرتاح جنت كلش خايف وشي زاعجني اذا اتأخرت اكثر ممكن الغي السفر كله اباوع لاصدقائي مخنوكين بس ميكدرون يحجون ويباوعولي كأنما اخر مره يشوفوني اما بابا عادي مامهتم لان باعتبار رايح لتركيا وعمو كلساع يتقرب عليه ويحفزني لو يكلي انت سبع لتخاف هاي قصتك انت راح تكتبها حتى مااتراجع لان حس بيه خفت المهم ودعت اهلي بس من حضنت ماما كلش خافت عليه وحضنتني كانما تودعني بدون لحظه لقاء بعد ودعت اصدقائي مخنوكين وودعوني واحسهم يردون يحفظون كلشي بيه لان بعد ماراح يشوفوني بس من ودعت عمو حفزني مثل العاده كلي صح راح تتأخر ونشتاقلك بس ترجعلنه حامل قضيه شعب وغير هيج لا ترجع سمعت نداء الطياره رحت صعدت واقلعت الطياره وصلت الساعه 10:00pmلتركيا رحت اجرت غرفه بلفندق نمت بيهه ووقتت التليفون لان طيارتي لبغداد ب3:00Amطبعا مانمت الليل كله مع العلم جنت كلش تعبان لان افكار تاخذني وافكار ترجعني شي افكر بكلام عمو وشي افكر بنظرات امي وشي بكذبتي عليهم وشي كلام اصدقائي ونظراتهم شي اكول ياريت ماخاطي هاي الخطوه وشي اكول لا اني راح اسوي شي هواي تخاف منه راح ابين شي طول عمرنه مغشوشين بيه عن العراق راح ابين العراق مكان بيهه هواي اشياء غير الموت والدم وبقيت بهاي افكاري لحد ماسمعت المنبه دك شلت جنطتي وطلعت اتوجهت للمطار وصعدت للطياره وعرفت ان خلص بعد كم ساعه اصير بلعراق يمكن احقق حلمي ويمكن اعيش بخوف ويمكن اكسر الخوف ويمكن اموت وماارجع لاهلي ويكون فعلا وداع امي هو الاخير الي هبطت الطياره بمطار بغداد الدولي الساعه 12:00pmوره مانزلت بشويه سمعت صوت الاذان هذا الاذن جان بشكل قليل نسمعه هناك بس هنا ممكن نسمعه دائما ظليت اباوع على الافتات الي شايلينهه الناس ومكتوب عليهه اسماء باوعت لكيت احمد رحتله
-السلام عليكم اني جان (طبعا تكلمت بلعربي)
-وعليكم السلام ورحمة الله وبركاته اهلا جان الحمد لله على سلامتك
-ماعرفت شرد على كل هل الكلام كتله شكرا
-جان انت تعرف تتكلم عربي
-نعم اعرف
-والله زين هل الشي راح يسهل عليك وجودك هنا
رحنه اجرنه تكسي
-احمد لا تخبر السايق انا ليس عربي ولا تتكلم معي  حتى لا يعرف
-اوكي مثل متريد
-صعدنه بلتكسي وضل طول الطريق احمد والسايق يحجون سوه بهواي امور بس اني بالي مو يمهم طبعا ماخايف بعد ماشفت احمد شلون متساهل وكلامه حلو وياي وبعد ماخطيت اول خطواتي بلعراق مااعرف ليش راح الخوف فجاءه بقت بس الفرحه ضليت ابوع من الجامه مال السياره على بغداد اماكن حلوه صح بيهه اخطاء ومو مرتبه كلش بس حلوه احمد طلب من السايق يشغللنه اغنيه السايق شغل (عندي وطن ضليت بس اشتاق اله ) لحسام الرسام طبعا اني بذيج اللحظه ماكنت اعرف هاي الاغنيه بلرغم هواي سمعت اغاني بس هاي ماسمعتهه ولا حتى اعرف منو مغنيه بس حبيتهه اول ماسمعتهه واستمتعت بسماعهه ويه مااباوع على الطريق وصلنه للمنطقه الي بيهه البيت احمد دفع للسايق الكروه لان اني فلوسي بعدني مامصرفهن عراقي
-احمد :شنو رئيك نصلي بلجامع قبل لنروح للبيت
-اوكي
دخلنه للجامع صلينه وطلعنه اخذاني احمد للبيت جان قريب من الجامع حبيت هل الشي بيه اما البيت جان صغير وبسيط مو مثل البيوت الجنت متعود عليهه بس زين يمشي حال وطبعا مأثث افتريت بلبيت كله
-احمد :ترتاح هسه وتبدل ملابسك وترتبهن واجيك العصر نكمل شغلنه
-لا نكمل عملنا الان ونخلص
طلعنه من البيت رحنه لابو الصيرفه صرفت فلوسي وبقن الي بلكارت كلي احمد هنا الكارت مايشتغل بشكل واسع خليهن بلبنك ويمته ماتريد تسحبهن رحنه للبنك خليناهن وفتحتلي حساب ورحنه لصاحب البيت دفعناله ايجار البيت وتعرفت عليه وبعدين اشتريت خط وتحاسبت ويه احمد على الاثاث وهواي اشياء طبعا كل الاشياء الجانبيه ماقبل ياخذ فلوسهن مثل الكروه واتعابه اتوسلت بيه بس ماقبل كال انت ضيفنه هسه صدوك جذب تحجي اخليك فوك راسي وهل الشي كلش حبيته بيه لان هل الكلام وهل التصرف ماشايفه ولا بحياتي كلهه بعدين اخذني لمطعم قريب بلمنطقه كلي انت اكيد جوعان صالك هواي ماماكل كتله اي والله دخلنه المطعم وحجزنه طاوله
-انتو الاجانب اغلبكم نباتيين بس لا انت منهم
-لالا عادي هههه
-ها اي والله طمتني بس تعرف مااعرف شطلب وشضوكك اليوم
راح حجه ويه الكرصون ورجع كعد يمي
-ماذا طلبت
-خليهه مفاجئه هسه تشوف
اجه الكرصون جايب صينيه كبيره وبيهه مواعين هواي نزلاهن كلهن ووياهن خبز وخضره ولبن بدى احمد يفتح المواعين لكيت اشكال الاكل بيهن يعني مو نوع واحد وكله يشهي حسيته اجه بوقته لان اني جوعان كلش وصارلي هواي ماماكل بس هم هواي طبعا الاكل سمك مسكوف ودجاج مشوي وبرياني ودولمه وكباب وفاصوليا وكبه وفلافل وهاي غير المقبلات والفواكه والزلاطه
-احمد كأن الطعام كثير
-لا لا ابد مو هواي وانت جوعان بعدين اكلنه ماينشبع متشوفنه احنه العراقيين كلنه اسمان هههههههه
-هههههه
بديت اكل ومااعرف منين ابده كمت اخذ من كل ماعون لكمه وكلهن حبيتهن وفعلا ماينشبع منهن البرياني لو الكباب لو الفلافل لو الدولمه لو السمج حتى البن كان يجنن طبعا اني ماجنت اعرف اسامي اغلب الاكلات واكو ماكلهن بلبلدان العربيه او حتى الاجنبيه بس طعمهن هنا كلش رائع اييي ياعراق اذا اول يوم بيك جننتني باكلك من ابقه بيك واستقر شاشوف ضلينه ناكل وسوالف وضحك اني واحمد ابد ماسكتنه بلرغم مانعرف بعضنه من زمان وفرق العمر واضح بس حسيته اول صديق صار اليه هنا وبالفعل شكد مااشبع الاكل طيب اكل اكثر لحد ماخلصنه كل المواعين واني تعجبت من هل الشي
-بعد يجب ابقى يوم كامل بلا طعام لكي أكل في المطاعم العراقيه وغير ذلك امرض
-هههه والله هذا اذا تحملت تبقه يوم كامل بدون متاكل
-نحن كيف انهينا كل الطعام كان كثير
-والله طلعت انت تاكل هواي
صاح احمد على الكرصون اجيت احاسبه اني مد ايده احمد على ايدي
-دير بالك انت خطارنا اليوم بعدك جديد معقوله انت تدفع ميصير
-اني ماقبلت بس هو اصر ودفعهن طلعنه من المطعم
-اوف نسيت ان اتصل بعمي لكي اطمئنه اني وصلت قال لي عندما تشتري الشريحه اتصل بي فورا
-ياااا والله نسيناه يله اتصل بيه شمنتضر
-الووو عمي شلونك (يتحدث انكلش)
-اهلا جان الحمد لله على السلامة ليش تأخرت بس لا صار شي سيء
-لا لا عمو كلشي تمام بس والله اعذرني نسيتك
-هااا نسيتني احسن ولا صاير شي بس كولي بشنو التهيت ونسيتني
-احمد اخذانه لمطعم ونزلالنه اكل يجننن والله نساني تعبي كله
-هااا ولك نسيتني على مود الاكل
-عمو مو اي اكل يجنن هذا الاكل
-بالعافيه كلي كملتو شغلكم هسه انت وين بلبيت
-لا هستونه طلعنه من المطعم بعد مااعرف شنو ببال احمد
-احمد:بعد هواي شغل
-سمعته عموو
-ايي سمعته
-جورج شلونه
-جورج نايم كلش ضاج عليك كلي من توصل اكعده تحجي وياه
-لا عوفه يرتاح اني بعدين اخابرك
-يله ماشي باي
-باي
-والان ماهي مشاريعنا
-شنو تعبت
-كلا
-اوكي لعد هسه مابقه شي عدنه بس ادليك على الاماكن الي تهمك وقريبه عليك
-اوكي
واخذني بجوله دلاني السوك والكراج والاسواق وهواي اشياء ورجعنه للبيت
-يله انت ارتاح ونام واي شي تحتاجه بس اتصل بيه واحسب نفسك ببلدك مو غريب
-شكرا تسلم
ودعته ودخلت للبيت جنت تعبان حيل ذبيت روحي على الجربايه ونمت بسرعه بعمري مانايم بهيج وقت مبكر ولا نايم بسرعه

الكاتبه سيبال علي
ملاحضه جان دارس اللغه العربيه مو لهجات لذلك هو يتكلم بالفصحه ومرات يقدم ويأخر بلكلام لان الانكليزيه تفرق عن العربي بهل الشي
مع تمنياتي لكم قراءه ممتعه