غريب في العراق

البارت - 10-

رجعنه للبيت واجه ويانه ايهاب اتغدينه وكملنه طلعنه للسوك اشترينه بلي ورجعنه شكلناه وبقينه نلعب كلساع اثنين من العصر لحد الساعه ب1:00 احنه مستمرين نلعب وايهاب اهله خبصوه بالاتصالات كلساع يكللهم هسه اجي شويه واطلع ومرتين كاللهم بالطريق اني  وجذب منامر وصلت الوحده طلع واحنه هم تسلينه ماحسينه بلوقت لعب وتحدي وشقه وعياط كلبنه البيت كلاب طبعا احنه جانت غايتنه نقره سوه مو نلعب حتى ايهاب اجه ويانه حتى نقره اول ماوصلنه قبل لا نكمش الكتاب كال ايهاب مال بلي هسه واحنه ماجذبناه رحنه واشترينه وبعد استمرينه وايهاب من يخابرونه اهله يكوللهم جاي نقره واحنه الملازم ماشايفينهه رحنه نمنه بسرعه ميتين تعب علساس جنه نكرب ماجن جنه نلعب وقت علي التليفون واجه الصبح كعدنه من السبعه لحد السبعه ونص يكعدنه واحنه مانكعد كلساع شويه كعدنه رحنه للجامعه ايهاب ماكو انتظرناه ماكو خابرته رد عليه ومبين نايم
-الوو وينك انته
-بيش الساعه هسه
-ب8راح نمتحن وينك
-اهووو اخذتني نومه يله جاي
سديته منه دخلنه للقاعه بين الحجي والهوسه والتحضيرات اخذت من الوقت نص ساعه اجينه نبلش الامتحان دخل ايهاب
-صباح الخير ادخل
-وين جنت
-والله اخذتني نومه
-بيش الساعه نمت
-امممم يمكن بلثنتين
-هااا عاد بلثنتين جنت تقره لو غير شي
-والله دكتوره الصراحه جنت العب بلي ويه الشباب
-هااا يله ادخل
-علي : بصوت ناصي :طاح حضك ايهاب فضحتنه
-ايهاب : شباب ورقه بلا زحمه
انطته نور ورقه
-قلم قلم ماعندج
-هاي شطلعت لا ماعندي
-اي نسيت انتي عندج بس معلومات حاشيتهن بعقلج
-عاد مو جايه هيج لا معلومات ولا حتى قلم
-شباب شباب قلم
انطاه سيروان قلم
-مقطاطه شباب منو عنده
-الدكتوره : هاي شطلعت ايهاب جاي هيج كلشما جايب
-اي والله دكتوره
-ديله جاوبوا
-ايهاب : دكتوره اتفظلي الورقه
-هاي شنو ايهاب يعني هم متاخر وهم كلشما جايب وهم متجاوب
-دكتوره ماقاري
-بس هذا امتحان شهري جرب بلكت تذكر شي وتجاوب
-لا دكتوره
-متأكد تره راح ترسب
-اي دكتوره متأكد
طلع ايهاب واحنه امتحنه وطلعنه
-هاا جاوبتوا
-جان : والله شويه غش وشويه رد جاوبنه
-شفت اني مو كتلك نجاحك عليه وهاي انته نجحت واني راح ارسب
-علي : عادي تتعوض
خلص الريست
-سيروان : يله
- ايهاب : تردون انتو فوتوا اني ماعاجبني اليوم
-سيروان : واني هم مااحظر
بقينه كاعدين حجي وشقه وسوالف الكوفي تفرغ ويجون جدد واحنه مستمرين وخبصناهه بعياطنه وعركنه شويه واجت فاطمه ونور
-فاطمه : ليش ماحاضرين المحاضره
-ايهاب : والله شلكيتينه سجاجين نهاركله منخلي محاضره مانحضرهه
-نور :تره الي يحضرون مو بس السجاجين
-ايهاب : اووو معلومه جديده
-نور :صدوك شلونكم بالامتحان
-ايهاب : ادري انتن ماعدجن موضوع غير شكال الامتحان وشحجت المحاضره شنو
-فاطمه : يعني شنحجي
-اي شي بس مو دراسه
-نور :ليش انتو جايين للجامعه شتسوون
-ايهاب : نتسلى
-نور :هااا تتسلون
-علي : لك شبيك فشلتهه جان لازم تكللهه جايين ندرس حتى هيه تكلك والي تسوونه دراسه
-ايهاب : لا اني حجيت الصراحه
كعدن نور وفاطمه ويانه واستمرينه نتشاقه وايهاب عافانه كلنه كلب على نور ظلو بس يتناكرون وهيه هم موقليله ترد ردود تشيله من كاعه
كمل اليوم ورجعنه للبيت وايهاب هم ويانه خابرت اصدقائي وفتحت وياهم كاميره وعرفتهم على الشباب همه هم يعرفون يحجون عربي لان احنه درسناهه سوه حجو وياهم حسيت جورج وسيرج وكوركت مزعوجين على عكس ايهاب وعلي وسيروان يتشاقون ويحششون ضلو يحجون بعدين ضليت اني احجي وياهم وحدي بالالماني  كلولي هاا نسيتنه صاروا عندك اصدقاء جدد كتللهم انتو معزتكم هم كبيره بكلبي بس اني لازم اتعود هنا واني مو كلتلكم تعالو وياي انتو الماقبلتوا ضليت احجي وياهم شويه وسدوه حسيتهم انزعجوا بس هذا الواقع بعد شويه وكال ايهاب تطلعون
-علي : وين
-بما ان انتم كلكم محافظات وهذا اجنبي وكذا خل افركم ببغداد
بدلنه وطلعنه تقريبا الساعه ب7بدت الدنيا تليل ودانه لشارع ابو نؤاس شارع حلوو تحس الحياة كلهه بيه بلرغم من كلشي يصير ببغداد الناس تحب تعيش وتطلع وتتونس اني هذا الي شفته بلشارع ظلينه نتونس ونتشاقه واشترينه لفات واكلناهن واحنه نفتر واحنه جاي نمشي شفنه ولد شاب جاي يضربون بيه 3ولد ومدمينه اني مااهتميت ومشيت بطريقي لان شي خاص بيهم واحنه مانعرف عصابات همه لو شنو يمكن نتورط لو اتدخلنه بس واني جاي افكر مالاحضت الا ان شفت الشباب هاجمين عليهم وضلو يتضاربون ويه الولد والولد تعبان مابيه يكوم ضلو يتضاربون فاني اضطريت اتدخل احنه صرنه اربعه وهمه تلاثه والولد استجمع قواه شويه واخذ عوده جانت يمه وضربهم فهمه ماكدرولنه هربوا ويصيحون راح نندمكم
-ايهاب : منو ذولي شيردون منك
-فلوس
-علي : فلوسيش
-سيروان : شباب مو وقتهه هسه خل ناخذه للبيت يغتاح ونفهم منو
تجيناله وكام وصلنه للشارع اجرنه تكسي وابو التكسي كلش عصب من كناله لكيناه يدكون عليه ضل ينعل بيهم ويحجي عليهم كأنما الشغله بيه بعدين من وصلنه دفعله علي الكروه ماقبل ياخذ كال انتو سويتو فدشي حلوو تستاهلون بس احنه ماقبلنه ايهاب كله انته رجال على باب الله عائلتك متانيه رزقك والله يكثر من امثالك ومن هل الكلام نزلنه ودخلناه للبيت اني جنت ضايج من هل الشي لان همه يمكن عصابه واحنه مو كدهم وحتى الشغله مانعرفهه وهمه توعدولنه بس بعد الشباب شسويلهم
-ايهاب : جان هو  يلبس نفس مقاسك يمكن انطيه من ملابسك خل يسبح ويبدل ويرتاح رحت جبتله ملابس وطب سبح سيروان راح يجيب اكل من المطعم وعلي بده يرتب بلبيت
-جان : ليش فعلتوا هكذا
-ايهاب : شنو
-نحن لا نعرفه ولا نعرف قصته تضاربنا مع اشخاص غريبون والان نأتي به للبيت لماذا
-ايهاب : شبيك جان لا تخاف ماتجينه مشاكل من وراه
-ومن يضمن
-علي : كصروا حسكم الولد لا يسمع وانته جان شبيك شنو الوادم تكاطعت
-ايهاب : لك هوه شمعرفه بسوالفنه بابا اعتبره فد شي انساني لازم انساعده شخص محتاج للمساعده ولا تخاف الي يقدم المساعده ويساعد الله مايتركه
-اني سكتت بس بعدني خايف رجع سيروان جايب كباب ومقبلات وخبز ولبن حضرنه الاكل هو طلع كلناله تعال اكل كال لا مامشتهي الشباب اصروا عليه كالوله ميصير اجه اكل وتشكرنه هوايه وسئلنه انتو اخوان
-سيروان : لا اصدقاء
-ايهاب : احنه بجامعه وحده بس الشباب كلمن من محافضه وجان مو من العراق وهاي شقته والشباب كعدوا وياه واني هيج اجي ابقه وياهم وبليل اروح لاهلي
-هااا
-صدوك احنه حتى اسمك مانعرفه
-محمد
-علي : عاشت الاسامي
-محمد : ربي يحفظك
-علي : اي وانته سالفتك شني
- محمد:والله اني اتوسطت لولد من منطقتنه يم ذولي ذولي ياخذون ورق وياخذون عليه ارباح
-ايهاب : يعني ربه
-محمد :بس اسلامي
-ايهاب : بابا شنو هل الكلاوات الي يضحكون بيهه عليكم هو حرام منين اسلامي بعد
-محمد :والله ياخويه بعد ماادري بس المظطر كلشي يسوي هوه استوه متزوج وصارت مشاكل ويه عائلته واضطر يطلع وماعنده فلوس ومرته يم اهلهه صارلهه شهر اجه شكالي همه واني عرفته على ذولي واخذ منهم بس ماصارن عنده فلوس بدن يزيدن وهوه مايدفع وكلساع يخابروني واني اروحله وهو يكلي ماعندي اخر شي اتعارك ويايه وهمه اليوم خابروني كتلهم اني مدخلني بيه واجو وراي وصار الي صار
-علي : وانته منين تعرفهم
-اني هم ماخذ منهم فلوس قبل ورجعتهن الهم بسرعه
-ايهاب : شوف محمد باجر نروح لصاحبك ونهدده اذا ماكو نروح لاهله او جبير عشيرته يدينون بعد هيه مشكلتهم ويحلونهه وانته تخابر الجماعه تمدد المده وتعوفهه عليهم وان شاء الله تنحل
اتشكر من عدنه محمد وكال اني لازم اروح راح بعد مااخذينه عنوانه ورقمه واتفقنه وياه باجر نروح لجيرانه
-جان : ايهاب انت شلون تقول له عن سري
-يا سر هذا
-ان انا ليس عراقي
-هسه شنو يعني شفته شلون فرح وشاف الشغله عجيبه لا تخاف هوه همه اكبر من ان يفضحك
-انتو مايتأمن معكم سر
ايهاب بات يمنه خبر اهله وبقه واحنه ثاني يوم ماداومنه رحنه ل محمد ومناك رحنه للولد هددناه وخابرنه جبير العشيره واجه كعد ويانه بعدين محمد خابر الجماعه ومدد المده وطلع منهه وهمه بقوا بعد يسددون محمد هواي تشكرنه رجعنه ايهاب راح لاهله واني شفت كلام ايهاب صدوك من تساعد الله يفتحهه بوجهك وحلو ان تفك كربه مكروب كأنما الله خلانه بطريقه

اتمنى لكم قراءه ممتعه
الكاتبه : سيبال علي