غريب في العراق

البارت - 11-

رحنه للمختبر صرنه اني وايهاب وفاطمه ونور بنفس الكروب ضلينه نشتغل عود كلنه سوه بس ايهاب ميخلينه وخاصتا نور يكللهه انتي فاهيه تخربينهه وهيه تكلله اي نشوفك يلذكي وضلوا بس يتعاركون اخر شي صدوك فشلت تجربتنه وتجربت القاعه كلهه صح شكد ترزلنه من الاستاذ من وره ايهاب طلعنه وضلت نور بس تشمت بيه واني اكله تستاهلهه ضلو بس يتناكرون النهار كله علاقتهم كلهه عرك واني وفاطمه متصافين ودائما اخابرهه ونحجي وندردش حسيت اني اتعلقت بيهه مثل الشباب اما بلبيت فدائما يرجع ايهاب ويانه وبليل يله يروح لهله ومرات يبات يمنه بحجه يقره وهيه الصفاره تركع الاوراق كلهه الي استلمناهه راسبين ولا واحد بينه ناجح وفاطمه ونور درجاتهن تسبق درجه الديتول  ويضوجن وايهاب متخبل منهن يكلهن اني راسب وفرحان ان ماماخذ صفر وانت كالباتها مناحه شكو طبعا احنه نبقه لو نطلع نتونس ونفرفر اربعته ماخلينه مكان ببغداد حلو ماشفناه رحنه لشارع المتنبي وشفت الثقافه بيه وتونست واشترينه كتب وصورنه ورحنه لمتنزهات ولمطاعم ولاشهر الناس بيه حتى شربنه عصير من عصير شيخ حجي زباله افيش صدوك عصير يعني مابقه ببغداد مكان مازرته ومن نكعد بلبيت نطلع فلم اجنبي وطبعا اني كلهن شايفهن اضل احرك الاحداث وهمه مايقبلون يضلون بس يحجون يعني شسوي وهمه يتوقعون توقعات يخربون بيهه ام الفلم مااكدر اسكت واني شايفهن كلهن
بواحد من الايام جان عدنه تطبيق حي انروح لموقع ونطبق بيه اجرولنه سياره جبيره ورحنه للموقع اول بدايه اشتغلنه وتعبنه وجانت حاره بعدين من كملنه واحد من الولد بقاعتنه فتح تصوير كال راح ابثه على اليوتيوب بده يسئلنه وكل اجوبتنه تحشيش على الهندسه والشغل واقل الدرجات والزواج والفلوس بعدين سئلنه سؤال قبل يوم واحد ماخذينه ضل كل واحد يجاوب بكيفه ابد مو شي علمي خوب ايهاب وعلي ابدعوا ويكولون يله هوه هسه الي يشوفه ضروري مهندس ويفهم ان حجينه كله جذب وبغير يوم قررنه نسوي عزيمه بلجامعه احنه بس جبنه الموافقه من العماده والطبخ على البنات الله الطبخ يخبل ماكو طبخه ماطابخاتهه تحتار شتاكل
-ايهاب : اني اكثر شي حبيتهه هاي الدولمه كلش طيبه عاشت ايد السوتهه
-نور : تسلم هاي اني سويتهه
-ايهاب : بس مشعوطه مدري حامضه مدري ماصخه بيهه طعم مو طيب مخربهه
-نور :اي صدكتك والله عجبتك ولحست الجدر بس انته متحب تمدحني
ومره قرر امير ممثل الشعبه نروح سفره للجزيره السياحيه جاب سياره وكذا ورحنه بلسياره كله عياط واغاني وونسه مالهه مثيل وبالالعاب لعبنه جماعي يعني هواي من عدنه يصعدون بنفس العبه صعدنه سفينه وعلي كلب الدنيه بلصريخ وكل لعبه نلعبهه يخبصنه طلع كلش يخاف وايهاب يكله خاب شمالك حتى البنات ماسون سوايتك بذن كلهن الطلعات والسفرات والونسه  خلصن ايام كلش حلوه من حياتي فد يوم كاعدين بلبيت ويه الشباب جان جمعه ونسمع صوت عياط طلعنه لكيناه جايبين تابوت على سياره ملفوف بعلم وطلعن النسوان تصرخ وولد جيرانه بعده شاب احنه نعرفه صعد فوك السياره ويصرخ اخويه عرفت ان الي توفه اخوه الي راح يجاهد اني اول مااجيت للعراق هوه متطوع بس جنت اشوفه ينزل بلاجازات ولد كلش خلوق وخدوم نفس اهله كلش كلهم خوش ناس وينحطون على الجرح ماتعرف بهل المشهد شنو يكسرك ابوه للشهيد من يباوع ليوم ابنه قبل يومه وهوه يصرخ والوكت متعبه مابيه حيل حتى يبجي تحس هذا الرجال الهيبه مكسور وتايه من بعد ابنه شي كلش صعب من تشوف اب يوكف يم تابوت ابنه تحسه مكسور لو اليقهر اكثر اخوه الي يحضن بلتابوت وكل صرخه يصرخهه اقوه من الثانيه وطالعه من اعماق كلبه يحاول يطلع الحزن بس هوه بعد مايطلع بعد ماغابت شمعه البيت انكسر ركن من البيت شكد ماضحكو وفرحوا اكو شي ناقص هو جان وياهم بفد يوم يتذكرونه ويتمنونه وياهم وحتى فرحهم يتحول حزن ودموع من بعده لو اليقهر اكثر امه الي تهلهل وتصيح ابني جابوه شهيد اني ام الشهيد مفتخره بس دموعهه تجري وخنانكتهه العبره مااعرفهه تبجي وتنوح وتصرخ لو تهلهل لو اصدقاءه الي وياه البلجبهه الي شافوه يموت كدامهم وشافوا امه واهله وكسرتهم ويدرون راح يجي يوم يصير نفس الشي بعائلتهم والمصيبه الكبرى اذا متزوج وعنده اطفال ومرته يبقيهه ارمله وراه واطفاله يتامه لو اباوع لاصدقاءه بلمنطقه الي خسروا صديق مايتعوض وماينسي ومايدرون يواسون اهله لو يواسون روحهم كل هل الصور شفتهه كدامي اتمنيت اني اروح واحضن ابوه وابجي واصرخ وياه حسيت نفسي حملت هم سنين فوك ضهري وره هل المشهد الشفته نصبو الفاتحه واحنه وياهم ضلينه كاعدين بلفاتحه يومين والقهر ياكلني اكل احس اني فقدت شخص عزيز عليه من اشوف ادموع ابوه لو اخوه لو حجيهم اليحجونه الي يكطع الكلب اخوه يكله اشتاقيتلك تنزل بس يومين بشهر تزيح عني هم اسنين هسه وين رحت وزيدت همي تعال ارجع اخذني وياك مالي واهس العيشه من بعدك من وره هاي الفاتحه وهل المشهد عرفت ان شعب العراق قوي اغلب بيوت العراق بيهه شهداء هسه وناقصتهم فرحتهم كله ويفرحون ويضحكون ويعيشون ويحتفلون ويحاولون ينسون او يبينون للعالم ماعدهم هموم بس من ندخل لداخل قلبهم تلكه هم جبال متحمله صدوك فاقوا صبر ايوب حسيت نفسي ضعيف كلش كدامهم يعني من انته متوفيلك اعز الناس الك وتكوم بلفاتحه وتشتغل ووراهه تعيش وتحاول تضحك وماجن عليك هم ومحد يدري الي بكلبك شنو هاي مو قوه واني وره هل الموقف احس مالي واهس بلحياة اني عرفت العراق ومناطقه الحلوه عرفت شبابه وحجيهم الحلوه وشيوخه وبختهم وغيرت العراقيين وبناته وسترهن وشرفهن وغيرتهن بس ماعرفت العراق بحزنه وهسه بديت اشوف ذره من حزنه واشتركه بيهه

بارت بدايته مفرح ونهايته محزنه هوه هذا العراق ماكو فرحع بيه دامت حتى اعيادنه وايام فرحنه كلهه تحولت لذكريات محزنه ايام الاسبوع كلهه انعدت داميه بلرغم من هذا انحب انعيش الحياة ومايئسنه منهه لو غيرنه حان ماتحملوا بس الله مان على العراق بلصبر ونعمه النسيان والامل بلرغم من كلشي انكول تفرج ياعراق

أتمنى لكم قراءة ممتعه
الكاتبه : سيبال علي