غريب في العراق

البارت - 4-

كعدت الصبح باوعت لساعه تليفوني 7:30Amاول مره بحياتي بلعطله  اكعد هيج وكت بس لان نمت من وكت وشبعت نوم ومع ذلك جانت نومه حلوه ابد ماحسيت على نفسي الا الصبح مااعرف لان تعبان او غير شي
كعدت بدلت ملابسي وباوعت للفراش شفته مخربط
-اووف ايام زمان صارت جنت مااهتم تجي الخدامه هيه ترتب وراي ودنكت على الجربايه رتبت الغطه والفراش وباوعت على جنطتي شفتهه بعدهي الملابس بيهه طلعت الملابس رتبتهن بلكنتور ورتبت باقي الغراض على الميز وطلعت اجه على بالي اركض بس شفت محد بيهم يركض ولا يلعب رياضه شفت كل الناس الي بده يفتح محله والي يفتح مطعمه والمره الي بسطت بلكاع تبيع كيمر والطلاب الصغار او الشباب الي رايحين للمدرسه والناس الي رايحه لوضائفهه شفتهه غريبه اني اركض وحدي رجعت للبيت فتحت الثلاجه شفتهه فارغه ولا بيهه شي فكرت اروح للمطعم بعدين اتذكرت الحجيه ام الكيمر الي بسطت يم المخبز كلت خل اخذ كيمر منهه هم ارزقهه وهم كيمرها شكله طيب رحت اول شي للمخبز طبعا جان سره ومفتوح شباكين شباك للرجال وشباك للنساء لزمت سره اتأخرت لحد ماوصل سراي كلي ابو المخبز تريد صمون لو خبز باوعت واني مااعرف منو يسمونه صمون ومنو يسمونه خبز لان اثنينهن مو نفس خبزنه المهم كتله صمون لان الاسم شويه غريب عليه كلي بيش اني جنت بعدني مامتعود على العمله زين شكله طلعت الف من جيبي بدون لا اعرفه شنو انطيته اله انطاني علاكه كامله عرفت ان اشتريت اكثر من الازم رحت للحجيه
-صباح الخير
-هله يمه هله صباح نور شنطيك جبن عرب لو كيمر عرب
-هنا حرت مره ثانيه كلتلهه كيمر كصتلي كيمر وانطتنياه بماعون كالتلي ب3ماعرفت شنطيهه طلعت المحفضه ضليت اكلب بلفلوس حاير كلتلي انطيني هاي الخمسه اني عندي صرف انطيتهه الهه بدون لا اعرف شنو الموضوع شالتلي الفين انطتني ياهن رجعت للبيت سويت لفتين واكلتهن والباقي ضميته بلثلاجه انتبهت على نفسي جاي اكل هواي بلعراق يمكن راح اسمن ولا العب رياضه بس لان اكلهم كلش طيب وما ينشبع منه طلعت بره وفتحت الواي فاي حتى اكنك واخابر اهلي واطمنهم لان اذا خابرتهم على الرصيد ينكشف اني بالعراق فتحت واي فاي طلعتلي شبكات بس مرمزات حاولت وياهن ماكو كلت خل اخابر احمد شفت الساعه طلعت ب8الوقت مو مناسب انتضرت لل9وخابرته
-صباح الخير
-صباح الانوار شلونك شاخبارك
-الحمد لله وانت
-الحمد لله بخير شكو ماكو محتاج شي
-نعم لكن يبدو اني اسبب لك ازعاج
-لا ولو شنو هل الحجي بالخدمة اني
-شكرا لكن لااعرف النت لماذا لايفتح عندي
-وين تقصد ميفتح
-في البيت وحتى في الخارج فتحت الواي فاي ولم يتصل
-هههههههههههههههه ههههههههههههههههههههههههههههه والله ضحكتني
-لكن لماذا تضحك
-حبيبي جان هسه انتو هناك يمته متفتحون واي فاي وبأي مكان تتصلون
-نعم
-ههههههه
-لماذا تضحك انا لم افهم شيء
-حبي هسه انت بلعراق ماشي احنه ماعدنه نت بكل مكان اما تجيبلك نانو وراوتر وتشده ببيتك وتكنك عليه اما تكنك شهري على الرصيد وهذا اصرفلك
-هااا الان فهمت حسنا كيف اتصل على الرصيد -هااا حبي روح لابو الرصيد كله يعبيك رصيد ابو 30ويكنكلك بيه
-ماهي اخر كلمه
-يكنكلك يعني يتصللك على كولتك
-حسنا فهمت اشكرك ومتأسف لالزعاج
-لا لا ازعاج ولا شي استغفر الله بس والله ضحكتني بشكل ههههه
-حسننا الى اللقاء
-الى اللقاء
ورحت سويت مثل مكلي بس استحيت من ابو المحل هواي لان ضل متفاجئ بيه ماكو شخص بهل الزمن مايعرف يشد رصيد ولا يكنك المهم رجعت للبيت وخابرت اهلي ضلو يحجون عليه لان ما خابرتهم من اول يوم كلتلهم جنت تعبان وبعدين خابرت اصدقائي لكيتهم كاعدين بلكوفي كلهم سوه نفس العاده بس اني ناقصهم هذا الفرق اشتاقيت اكون وياهم مع ان ماصال زمان مفارقهم بس يمكن لان اني هنا وحيد ومامتعود على هيج بعدني بغربه مامتعرف على اي شخص بس احمد وهو عنده اعمال هواي وبالرغم من هذا ماقصر من حجيت وياهم ضلو يضوجون بيه شلون كاعدين ويحجون ويضحكون عرفت غايتهم حتى اضوج وارجع بس بلحقيقه همه ضايجين عليه اكثر مما اني ضايج عليهم
-سيرج :هاا جان مو على اساس تصادق عراقيين وتتعرف عليهم شو اشوفك وحدك
-بعدني هذا اول يوم
-اي ماشي اول يوم واني متأكد عسى ما بعد سنه هم نخابرك نلكاك كاعد وحدك حبيبي مرجعك النه ماتستقر هناك
-لا تحجي كلام مامتأكد منه
-تراهن
-لا
-هاي ليش ومن شوكت ماتراهن انت
-لان اعرف راح تكلي اذا خسرت ارجع
-كوركت :اصلا ماكو داعي نراهنك لان انت اول واخر ترجعلنه ماتبقى اكثر
-اوكي نشوف
-نشوف
وغلقت التليفون بعد مابقيت ساعه احجي وياهم بعدين رجعت دخلت على حسابي العراقي وضليت بس اتابع وخلصت النهار على النت بعدين اتذكرت البيت مابيه مسواك واجه وقت الغده رحت للمطعم نزلت دولمه كملت توجهت للسوك رأسا سوك شعبي مثل مال الفقره الي عدنه احنه الاغلبيه مولات وقليله الأسواق الشعبيه اما همه الاغلبيه اسواق شعبيه وقليله المولات المهم مادخلت السوك كله من بدايته اشتريك الخضروات وفواكه بعدين اشتريت بقوليات تمن وفاصوليه وغيره واشتريت معجونه بعدين مشيت شفت واحد يبيع حلويات اشتريت من كل نوع اشويه رجعت للبيت رتبت الغراض انترست الثلاجه بعد ماكانت فارغه تصفر بديت امل لا طلعه لا اعرف ناس ماعندي شي اسويه وحتى اذا اخابر الشباب راح يحجون انت راح ترجع وتمل بدونه ويضوجوني اكثر فتحت التلفزيون شفت كل القنوات الموجوده عراقيه عفته على قناة سمعت اخبارهم شي سياسي وشي انفجارات واشياء عامه بعدين خلصت الاخبار بده مسلسل كوميدي عجبني ضليت اباوع عليه بعدين خلص المسلسل طلعو اغاني عراقيه ضليت اسمعهن جعت جبت كيك اكلته ونعست ونمت كعدت الصبح قررت اروح للجامعه اقدم خابراني احمد كلي اجي وياك كتله مشكور مايحتاج اني ادبر امري سئلني على النت كتله سويته كلي انطيني حسابك على النت انطيته حسابي العربي هو اول صديق صار الي بهذا الحساب طلعت مكان الجامعه بالنت ورحتلهه بتكسي وصلت فتت للعميد قدمت انقبلت هندسه معماري جامعه اهليه كلي الدوام بعد اربع ايام تقريبا رجعت قررت اصعد بكيا مو بتكسي حتى اعرف الناس اكثر واجرب كلشي صعدت بكيا بيهه الموضف والطالب والي رايح للسوك يعني من كل انواع المجتمع صعدت يمي بنيه محجبه بس حلوه
سئلتهه على الكروه
-ماهو المبلغ الذي علي دفعه
-البنت :الف
دفعت وسكتنه وره شويه
-البنت : عفوا انت منين
-ماذا
-منين جاي من اي بلد
-انا عراقي
-عراقي هاي شلك بيهه كول منين
-انا عراقي مابك
-لا انت مو عراقي احجي منين
-وانت ماهو خصك
-انت داخل ببلدي مانعرف شنو الكارثه الي ممكن تسويهه يمكن تفجر او تنقل امراض او يمكن تحث على الطائفيه من حقي اعرف
-مابكي وكيف تفكرين بهذه الطريقه انا عراقي الاصل
-وشنو هذا كلامك اذا انت عراقي
-انا كنت بغير بلد اجنبي لكني عراقي الاصل والان عدت لذلك كلامي ليس متقن
-لا تكذب عليه احجي انت منين وشجاي تسوي اني موغبيه كدامك اعرف انت مو عراقي شوف اذا ماحجيت هسه انت منو وتحجي الحقيقه راح اعيط انت مفخخ واخليك تدخل بمشكله ماللهه حل وفضيحه احجي الصدك وخلص نفسك
-اف ياربي منين اجتني هل الدوخه زين هسه كل حلوه مصيبه يله خل اكوللهه اصلا اني ماراح التقي بيهه مره ثانيه يعني محد راح يعرف السر غيرهه
-انا بلحقيقه من المانيا  وجئت للعراق لكي اكتب عنه تقرير اي اعمل على طبيعته وغيرها
-هااا اي من البدايه واحجي هيج ولا تفكر تستغفلني ماشي نازل نازل
ونزلت واحنه كملنه مشي بلسياره ضليت افكر بيهه اني شلون عرفت زين اكو شي يخلي كل الناس تعرفني لو هيه غير شكل زين شنو الي يتميزون بيه العراقيين عن غير بلدان اف لو ادري ماصاعد كيه جان مااجتني هاي المشكله

الكاتبه :سيبال علي
اتمنى لكم قراءة ممتعه