غريب في العراق

البارت - 5-

وصلت للبيت قررت اسوي اني الغده مااكل بلمطعم طبعا مامجرب حتى اطك بيضه بحياتي كلهه فتحت النت طلعت دولمه العراقيه شفت هواي اشياء ناقصتني بعدين طلعت الفلافل وطلع اهم شي لبلبي مامشتري جبت ورقه وقلم وسجلت النقوصات حتى من اروح للسوق اشتريهن اخر شي طلعت تمن وفاصوليا وبديت اطبخه بكل حذافيرهه وانتضرت لحد مااستوت طلعت الريحه تخبل ضكتهه طلعت بعد اطيب فرحت كلش حسيت نفسي سويت انجاز عظيم صورت كومه صور للمواعين ورسلتهه لجورج وسيرج وكوركت وره شويه خابرني كوركت
-الوو شلونك
-زين وانت شلونك
-احنه بخير
-احنه بخير ليش منو يمك
-الشباب كلهم يمي ماعداك
-هااا وين كاعدين
-بالمطعم جاي ناكل صدوك شنو هاي الصوره الي رسلتهه
-لك هاي اني سويتهه الطبخه
-هههه هاي عليمن تضحك انت سويتهه ليش انت تعرف تطك بيضه
-لك الوحده كلشي تعلم
-اي لا تكذب عود
-يعني هسه انت مامصدكني
-طبعا
-اوكي راح اثبتلك
طلعتله الماعين الي طبخت بيهن وشلون المطبخ صاير وصخ وبلكوه يله صدكوني وماصدكو طيب ابد بس اني جنت كلش فرحان بهل الانجاز ومفتخر بنفسي
-صدوك قدمتو للجامعه
-اي قدمنه تصدك كلنه طلعنه نفس الجامعه ونفس القسم
-اها صدوك
-وداعتك بس انت ناقص لو مامسافر جان سوينه هواي اشياء حلوه سوه
-اف انتو شوكت تعوفون هل الموضوع
-اي يعني انت شمستفاد هسه كاعد وحدك حياتك خطره ووضوجه ليش سويت هيج مااعرف
-وماراح تعرف لان انت متريد تعرف اني كم مره كلتلكم هدفي من السفر شنو ليش تجبروني كليوم اعيده بعدين اني ماصالي اسبوع هنا يمته الحك اتعود يعني ويصيرولي اصدقاء دصبر عليه انت
ضلينه نتناقش بلموضوع وبعدين سديته خلصن الاربعه ايام مثل العاده لحد مااجه اول يوم الي بلجامعه وقتت التلفون خاف تاخذني نومه ونمت من وقت كعدت الصبح بس كعدت وحدي بدون المنبه وماجنت شبعان نوم جنت حيل نعسان بس كعدت لان جانت حاره حيل كعدت واني نعسان ومحتر بشكل باوعت للسبلت ليش صار حار شفته طافي افتريت البيت لكيته كله طافي اكتشفت الكهرباء طفت فتحت الفلاش بتليفوني طلعت بره لكيت كل البيوت ظلمه يعني الكل طافي باوعت للساعه لكيتهه ب3:00Amيعني بعد وكت هواي للدوام ظليت كاعد بره انتظر الكهرباء تشتغل طولت هواي مااشتغلت متت حر وانزعجت حيل ومااعرف شنو الموظوع باوعت للساعه لكيتهه صارت وربع يعني مو هواي بس 15دقيقه بس حسيتهه اكثر من ساعه اني بحياتي ماشايف هيج حر ولا شايف الكهرباء تطفي وجان الجو ولا بيه اي نسمات هوه يمكن جانت ذيج الليله من احرر ليالي بغداد او اني حسيت بيهه هيج لان مامتحمل فتحت نت حتى اضيع الوقت بديت اتصفح بلفيس واتصفحت بكل البرامج حسيت مر وقت هواي باوعت للساعه لكيتهه ب4:00شويه حسيت نفسي دخت حيل وحسيت ان راح ينغمي عليه رحت للحمام بسرعه غسلت وجهي بمي لكيت المي كأنما بسخان مو مي طبيعي ركضت على الثلاجه طلعت ثلج منهه وموعته بسطل مي وبديت اغسل وجهي شويه يله ردت روحي ظليت كاعد بلحمام للسته والثلج الي بلثلاجه كله خلصته حتى سبح سبحت بيه هنا وبهذا الموقف حسيت نفسي صدوك غلطت ماجان لازم اجي اني متعود على الدلال شجابني للظيم لا الخوف اثر بيه ولا الوحده ولا اي شي بس الحر هلكني اول مره احس الليل طويل ومااعرف وين اروح لا اني اندل واروح ابات بفندق كلت معقوله العراقيين كاظين عمرهم بهيج حاله مااعرف شأوصفهه ومااعرفت اني هسه شاحتاج حسيت بندم حسيت بخطأء فادح المهم كمت وبدلت ورحت للجامعه واني مخنوك من اول يوم ندمان كل عزيمتي وكل شوقي واحلامي واهدافي حسيتهه ثلج ذوبهه الحر بسهوله وصلت للجامعه حتى بدون ريوك شفت مرتبين اسماءنا لكيت اسمي بقاعه 2طبعا اني وصلت من وكت لان جنت بس اريد اطلع من البيت دخلت بكافتيريا الكليه جانت بارده حيل تمنيت مااطلع منهه طلبت ريوك وعصير برتقال عصير كالو ماكو كلتلهم اي شي ينشرب جابولي شاي بالعراق بس الشاي ينشرب الصبح لاغير طبعا اني مو من محبي الشاي كلش المهم بديت اكل فجاءه انصدمت شفت نفس البنيه الي حجت ويايه بلكيا وكشفت هويتي كاعده بلكافتيريا وده تاكل وتباوع بتليفونهه بالهه وياه جانت هل الشي الصدمه الثانيه اليه طلعت بسرعه من الكافتيريا واني اكول اهووو منين تجيني هاي المصايب هاي البنيه تعرف حقيقتي واذا شافتني راح تفضحني والله يعلم شراح يصير بيه اني اعتقدت خلصت منهه منين طلعت كدامي مره ثانيه وانوب بلجامعه بس يله هاي افكر بهل الموظوع اذا اني بقيت هنا ضليت افتر بلكليه شفت كل الطلاب مرسومه الضحكه على وجههم بس اني مختنك ظليت افتر بلكليه افتريتهه نصهه شفت الساعه صارت ب8:30يعني بده الدوام رجعت لقسمي دخلت ماجان اكو استاذ علينه دخلت وبوجهي لكيت المصيبه لو الصدمه او مااعرف شسميهه بلظبط يبدو ان اليوم مملوء بلمصايب ماعرفت وين اهرب وهوه بعد الفاس وكع بلراس حسيت كلشي انتهه الصدمه جانت نفس البنيه كاعده بلقاعه والمشكله شافتني ضليت اباوع عليهه هيه سوت نفسهه ماهتمت دارت وجهه رحت اني كعدت وراهه اجت الدكتوره سلمت علينه وعرفتنه بنفسهه وظلت تحجي على القسم وسط مناقشات ويه الطلاب جنت اتمنى اني اعيش اول يوم الي بلجامعه بكل تفاصيله بس ماصار هل الشي من وره الصدمات الي صارت وياي خلصت المحاظره وطلعنه اني طلعت ومشيت بره واسمع شخص يصيح جان جان جان درت وجهي بدون تفكير لكيتهه نفسهه البنيه
-البنت:مرحبا اني فاطمه اتذكرتني مو
-نعم اتذكرك تشرفت بمعرفتك
-شكرا الي الشرف انته طالب هنايه
-نعم
-اييي عندي كلام هواي احجي وياك خل نروح للكافتيريا نحجي
-حسنا
رحنه للكافتيريا طبعا كلامي كله وياهه جان صدمه شلون عرفت اسمي وشتريد مني وهواي تسأؤلات براس وصلنه كعدنه
-تشرب شي
-كلا قبل قليل كنت هنا واكلت
-هاا جنت هنا اي ميخالف نطلب جاي
-لا انا لا احب الشاي كثيرا
-هااا حتى اني يله لعد نشرب عصير
-لايوجد هنا عصير
-لا اكو
-قبل قليل انا سئلت قالو لا يوجد
-انتظرني
راحت شويه جابت كلاصين عصير
-كيف وقبل قليل قال لي لايوجد
-الصبح مايسوون لان الناس تشرب بس جاي اما هسه يسوون
-هااا
-اي كلي انت شلون قدمت دراسه هنا مو على اساس عندك بحث
-نعم عندي بحث ولكي يتم بحثي علي ان اتقرب للكثير من الناس
-هااا زين انت اي مساعده تحتاج اني موجوده واي شخص هنا ماراح يقصر بحقك اني متأكده واعتبر نفسك ببلدك مو غريب
-اتذكرت هذا نفس كلام احمد كأنما كل العراقيين متحدين على نفس الكلمات
-شكرا لكي لكن انا عندي طلب
-اتفظل
-لاتخبري احد اني ليس عراقي الاصل هنا
-ليش
-لان لا اعرف مايمكن ان يحصل لي اذا عرفوا فلا تخبريهم ارجوك
-يعني شيصير ميصير شي مو هاي اني عرفت ورحبت بيك وراح اساعدك همه مايختلفون
-كلا يختلفون فانتي فتاة في نهايه الامر
-ماكو فرق صدكني محيسوون شي واكوللهم احسن بهواي الك
-ارجوكي لا تخبريهم فهذا مطلبي الوحيد هيا اوعديني انك لم تخبريهم
-اوكي مثل متريد ماراح اكول بس انت غلطان بتفكيرك
-شكرا لكي لكن عندي سؤال انتي كيف عرفتي اني ليس عراقي الاصل
-هااا اول شي شفت جنسيتك مو عراقيه من طلعت الفلوس وشفت اسمك جان شكيت من سئلتك وكلت عراقي انته بس عايش هناك جان جوابك مقنع نوعا ما بس اني ردت اتأكد كلت اسوي نفسي مامصدكته اذا ظل مصر كلامه صح اذا اعترفلي معناتها شكي بمحله وهو هذا الي صار
-هااا يعني لاداعي للقلق لا احد سيكشف حقيقتي
-ماظمن الك يمكن يكتشفون لازم تصير حذر اكثر
-كيف
-شوف  هنه شغلتين تسويهن تتعلم لهجتنه وتعرف معلومات عن العراق حت  يصدكون انت عراقي
خلص الدوام وانحلت مشكله واحده وياي بس بقت مشكله البيت اجيت دخلت للبيت لكيتهه بعدهي الكهرباء طافيه كلت اروح اتغده بلمطعم وارجع اخذ ملابس واروح لفندق اجيت اطلع اندك الجرس فتحت الباب
-الرجال : السلام عليكم
-وعليكم السلام
-اخي انطينه خمسه حتى ندفع لاهل الكهرباء حتى يصلحوهه النه اليوم ان شاء الله
دخلت للبيت جبتله خمسه وانطيتهه اله وفرحت ان راح تتصلح بس بنفس الوقت حسيت اصرافي هنا كلش هواي يعني بكل مكان مااصرف هيج اني لازم اقتصد رحت للمطعم طلبت كباب وضليت اكل فكرت شفت ان هذا اليوم المشؤم الي بده بمشاكل عظيمه راح تنتهي مشاكله بنفس اليوم بديت ارجع بقراري ان ارجع اتغديت ورجعت للبيت لكيتهه بعدهي طافيه طلعت بره كلت لازم اسأل شفت هواي من المنطقه طالعين بره وكاعدين يسولفون واعتقد ان يحجون على الكهرباء اجيت يمهم
-السلام عليكم
-وعليكم السلام والرحمه
-سمعتهم يحجون على الكهرباء -يعني لم تشتغل هذا اليوم
-هههههه ليش من شوكت تشتغل باول يوم انته غلطت هواي من عفت الخارج بعزه واجيت هنا والمشكله مامتعود الا تموت شجابك على هل الظيم هو احنه الي صارلنه اسنين ومتعودين طافره روحنه من الدنيا انوب انته ارجع ارجع احسلك
-حجي الحجي زيد الطين بله خنكني اكثر رجعت للبيت خابرت عمي نجاتي
-عمي نجاتي :هلوو جان شلونك شاخبارك شلونه اول يوم بلجامعه عندك
-لا تسألني ماكو ابشع منه
-خير شصاير
-ليش شنو ظل ماصاير عمو اني بعد مااتحمل اريد ارجع
-دكول يالله شبيك ماصارلك اسبوع هناك وين الدافع مالتك راح وين كلامك وين هدفك منو كلك روحه العراق سهله بس انته كدهه لاتضعف احجيلي شصار وياك حتى اتراجعت
-حجيتله كلشي صار
-اتصل باحمد وافهم منه شنو الوضع هناك يمته تتصلح وشلون تتصلح وشلازم تسوي اكيد راح يلكالك حل لاتستسلم بعدين لا تنسه رجعتك مو سهله هسه احنه تعبنه لحد ماوصلناك هناك لا تترراجع خليك قوي
-اتصلت باحمد كلي يمكن شهر او هيج تبقه طافيه كتله والحل كلي روح للسوك وانطاني عنوانه حتى اشتري مولد فعلا رحت واشتريت مولد وسألت بلمنطقه منو يجي يسويلياه واحد كال اني كهربائي واجه سوالياه خلصت الشده الثانيه اتصلو بيه الشباب انطيتهم رفض كلتلهم تعبان وراح انام ظلو يستهزئون ويعيبون بالدردشه مافتحتهن اصلا اجه اليوم الثاني جان احلى بهواي كعدت نشيط اتريكت كيمر عرب وجاي لان عند العراقيين لازم جاي واني مااتخيلت الكيمر عرب وياه عصير اتريكت زين وبدلت طلعت متفائل عكس البارحه تماما وصلت للجامعه شفت فاطمه سلمت عليهه لان بس هيه اعرفهه دخلنه للمحاضره كعدت قبل الاخير جان اكو شباب كاعدين وراي اعتقد همه كلهم صاعدين من الاعداديه سوه ظلو يحششون على الاستاذ بكل كلمه يحجيهه واني اظحك عليهم بعدين بلريست طلعت ويه كم ولد وحجينه امور عاديه سئلوا على كلامي ليش مختلف كتلهم لان ماعايش بلعراق واني انتبهت همه كلهم نفس اللهجه بس اكو اختلاف من سئلتهم كلولي كل محافظه تختلف عن الثانيه بل الهجه بنهايه الدوام رحت لفاطمه طلبت رقمهه اول شي هيه خافت وعصبت اشويه وعقدت حاجبهه وماعرفت ليش لان اني ماسويت شي خطأ كالتلي انطيك حسابي على الفيس وانطتني ياه من وصلت للبيت دزيتلهه طلب صداقه وراسلتهه كتلهه اني جان كالتلي وانت من شوكت مسوي هذا الحساب وكاتب من العراق كتلهه قبل لا اجي ضلينه اندردش اني ليش حبيت العراق وردت اجييه ثاني يوم نفس المحاضرات طبعا كل يوم يوصونه على ملازم اشتريهه واذبهه بلبيت ولا افتحهن ومرات مااشتريهه ونص المواد افهمهن من الشرح ونصهن لا انتبه على التحشيش اكثر المهم بلريست نطلع ويه الشباب مال القاعه كل يوم شخص هيج بلصدفه كلامهم كلش حلو جان وونسه كلت كون تدوم الامور تمشي هيج وماتصير مشاكل تخنكني اخر شي حددنه يوم الخميس بنفس الاسبوع حفله التعارف لان اكو طلاب هواي يداومون الخميس وخلص ثلاث ايام حلوه وتغيير بسيط بين كل يوم والثاني بس بعدني ماواصل لخطوه متقدمه

الكاتبه :سييال علي
اتمنى لكم قراءه ممتعه

اذا حبيتوا القصه ادعموني بتصويت وتعليق حلو ومتابعه   
وشكرا :