غريب في العراق

البارت - 14-

مرت ايام على الحادث واني نفستي كلش تعبانه بدت الناس تنسه بس الفاقد عزيز بصعوبه ينسه اجوي الشباب العصريه بلبيت كالولي عدنه شغله وياك

-شكو خير
-علي : احنه نفكر ندور شغل لان تعرف احنه من غير محافظه وهسه مصروفنه صار هواي بيت واكل وهواي اشياء فأذا تريد تشتغل ويانه هم تكسر هل الحزن الي بداخلك نطلع نلتهي بشغله وهم مستفتفادين احنه

-اي والله اني فلوسي بدت تقل ومااكدر اجيب من اهلي لان ابويه يدزهن على تركيا على البنك صعبه اقنعه يدزهن بغير طريقه فنشتغل احسن بس شنشتغل

-سيروان : هوه الشغل هنا مو هواي يعني لو نشتغل حمالين لو عماله لو نشوفلنه محلات نشتغل وياهم
-ليش مااحنه نستثمر فد شغله يعني انسوي مشروع

-ايهاب :وشنو هل المشروع
-بعد هايه يمك بغداد محافضتك وانته تعرف شينجح بيهه اكثر شي
-ايهاب : والله اكو شي ببالي بس يحتاجله مني

-علي : المني يدبر منعدنه كلنه كل واحد شويه وندين بس كون الشغله مضمونه
-اي اي مضمونه
-سيروان : شنو

-ايهاب : نفتح محل مال نت بهاي المنطقه بعيد مال الشبكات وحتى وان كانوا هوايه هوه اكو اقبال خاصتا اذا نسوي خدمات

رحبنه بلفكره وكمنه نطلع كل يوم العصر يوم دورنه على محل لكينه محل مناسب بين مجموعه محلات محد مئجرهن اجرنه واحد وسعره مناسب بعدين رحنه جبنه الاجهزه

وصبغنه المحل وعدلناه وشكلنه الاجهزه مرات نغيب من الجامعه ونبقه نشتغل بلمحل ومرات بس العصر ماادينه افلوس كفت من عدنه كلنه سوينه اعلان الي يشترك شهر اله خمس ايام مجانا بلبدايه ماكو اقبال بس بعدين بدوا الناس يجون الصبح مانفتح بس العصر والفلوس

نقسمهه بلنص مضى شهر تقريبا ربحنه حلو لان موقعنه ستراتيجي والخدمه مال الايام المجانيه كلش فادت قسمنه الفلوس نص لاليجار ونص اشترينه ملابس بيهه ونص مصرف ونص ودوهن الشباب لاهلهم احنه بس يجينه زبون نطير من الفرح سويناهه كل يوم على اثنين ونتبادل ختى منمل لان طول الليل لازم نسهر وبلنهار عدنه دوام صح تعبنه بس حلو ان تتعب وتجيب فلوس من تعبك

ومشروعك انته مو مشروع غير اوف شكد اتمنى اخابر بابا اكله ابنك الي دائما تحجي عليه اتغير وصار رجال راح لاخطر مكان

وتعايش وياهم وجاي يعد لتقرير يغير رئيي العالم كله بلعراق وغير شي اني فتحت شغل ونجح وجاي يتطور بس مااكدر مااكدر اخوفهم عليه واعيشهم بقلق ويمكن يجبروني ارجع لا اني اخبرهم بلوقت المناسب صح اني ماخابرت بابا بس خابرت عمي خليل وكلش فرحلي

وبعدهه خابرت اصدقائي كتلهم ماصدكوا صورته الهم بلكوه صدكوا كالولي انته هواي تغيرت ماجنت تحب الشغل ليش هيج بعدين حاولوا يقللون من عزيمتي رجعوا لنفس

الموال العراق خطر وانته شفت بعينك وتشتغل وتتعب وهنا مرتاح اني كتلهم اذا ضليتوا تحجون هيج اسده سكوتوا بعدهه بفتره

بين الجامعه والمحل طورنه شغلنه وبدينه نربح هواي اجرنه محل ثاني يمنه وجبنه تليفونات وحافظات وبطاريات شاحنات رصيد وكذا وهم نجح المحل شفنه روحنه مانلحك

حطينه اعلان للعمل اجه ولد من اول ماحطيناه اشتغل بيه واحنه ضلينه على محل النت بعدهه بفترهه فتحنه محل ثاني سويناه كهوه جبنه

كرويتات وفتحنه شبكه مجانيه واراكيل وجاي وهم جبنه شباب يشتغلون بيهه وحتى محل النت خلينه ولد يفتحه الصبح من احنه بلدوام هاي الفتره كلهه الي مرت سعادتي متنوصف

بنجاحي بلشغل وكل شويه يكبر اكثر ويتوسع وصارت علاقتي بلمنطقه حلوه خاصه بعد مافتحت القهوه يجون الشباب والشياب بيهه يلعبون دومنه ويكنكون ويأركلون نكعد نحجي ونسولف سوالف الشباب على تاريخ العراق قبل وذكرياتهم وسوالف الشباب كلهه تحشيش اني اكيف اكعد ويه الشباب واسمع قصصهم بس باقي الشباب يضوجون لا سامعين هل

القصص ومالين منهن وطبعا اني صرت اأركل اي اني الاحجي بلصحه كله من وره ايهاب علمني عليهه بس صدوك طيبه طلعت وتعلمت اللهجه العراقيه بدقه بس بقت كم كلمه صعبه مااكدر اللفضهه واكو كلمات اسمعهه مااعرفهه جديده اسئل على معناهن شكد عدهم كلمات مدري منين يجيبوهه لو ابقه اسنين مااتعلمهه وهاا لكنتي يكلولي مو عراقيه شلون تصير عراقيه ماادري اما علاقتي بفاطمه زي الفل

بديت اتعلق بيهه داءما اخابرهه ونحجي وهاي غير الجامعه وايهاب ونور نهاركله يتعاركون بس ذاك اليوم اتمرضت وماداومت ضل الدوام كله متنغب ضلينه ناصبين عليه الى ان طلع يحبهه اي ايهاب هم طلع يعرف يحب بس يخاف يعترفلهه وضال ساكت واني اتواصل ويه

اصدقائي احجي وياهم لهجه عراقيه يتعجبون عليه وكتلههم بديت اأركل اتعجبوا بعد اكثر

اوف مشتاقلهم ومشتاق لحياتي هناك ومشتاق لاهلي بس حياتي هنا هم حلوه ونجاحاتي حلو ان تحمل مسؤليه نفسك وبلتالي تنجح كلش حلو واني فرحان بهل الشي يله يجي يوم وارجع لحياتي السابقه بس اكدر اطلع بغداد اكدر اعيش بعيد على هل الشله

اوف اني تعبت هواي بلبدايه من ابتعدت عن اصدقائي واني اعرف اني راجعلهم وجان عندي حلم وعزيمه وماصبرت الا من تعرفت على ذولي الشباب بس ذولي شلون اتركهم واني احس علاقتي بيهم اقوه من اصدقاء طفولتي والمشكله اتركهم بلا رجعه صعبه اوف بس افكر بلموظوع صعبه لعد شلون من يصير صدوك اوف كلش صعبه من يصير عندك وطنين وطن اصلي ووطن حبيته هواي كلش صعبه ماتعرف شتختار مرات اتمنى اني اصلي عراقي وعايش هنا جان ماتركت بلدي شلون ماكان بس هذا قدري يله يكولون الي عاش حياته وماشايف بغداد كأنما ماعايش اي حياة على الاقل اني هسه واكف ببغداد

قبل امتحانات الفاينل بأسبوع تقريبا اكو لعبه وديه صارت بين العراق والسعوديه بملعب الشعب ببغداد ايهاب كال خل ناخذ تذاكر ونروح احنه ماجذبنه خبر رحنه حضرنه العبه بلرغم من ان جانت العبه وديه بس الجمهور الحاضر تارس الملعب والتنظيم ايجنن كلهه تصفك سوه وتصيح عراق

وبعدين الهوسات كلش حلوه من فوك الملعب لعب المنتخب واحنه ويه كل هجمه نصيح الواهس فول وحضور الجمهور بعمري ماشفت مثله الهوسات والتشجيع اتحسه من كل كلبك شجعنه وبصياح وعياط تعبنه بس اتسلينه واني كلشي اشوفه بهل البلد يخليني اعشقه اكثر واحترمه اكثر كشعب

اتمنى لكم قراءة ممتعه
الكاتبه : سيبال علي