جبروت انثى (مكتملة)

البارت الثالث

ناريمان : عمي جان يريد حصتة من الورث وبحالة وفاة ابوية يتاهر الورث وامي تستلم ورثنة وانتو تعرفون شلون يشوف الموت ولايشوف امي  فكال هلحجي حتى احنة نبتعد

شيخ سالم : بس هو مايعرف انو امج راح تكسر الارقام مالتكم وميعرف راح تنكطع اخباركم عنا
ناريمان : بس هو وصانة منرد لاحد وعندي نسخة من رسالة دزها النا قبل لا نكسر الارقام
شيخ سالم : وينها
ناريمان .. فتحت جنطتي طلعت ضرف بي صورة عن الرسالة لان جنت متوقعة راح احتاجها فطبعتها وطبعت وياها رقمة بشكل يبين انو هو دازها حتى ميصير مجال للنكران .
نص الرسالة : البقية بحياتكم بوفاه اخوية .. اتمنى متطلعيني من طوري وتخليني اتصرف تصرف ميعجبج فديري بالج تتواصلين وية احد من العائلة ونبهي بناتج همات ..يكفينا البينة وللعلم هسه اني شاك و الله اعلم انتي قاتلتة حتى تفلتين انتي وبناتج وتزوجين واحد غني واثول يصرف عليكم
راح انبهكم لاخر مرة تغيرون ارقامكم وتنسونا نهائيا مثل ما احنة نسيناكم ..

شافوها وبعدها كال الشيخ جيبلولي تلفون اسعد (موجود بصندوق امانات العشيرة ). راحو جابوه شافها صدك هو داز المسج
شيخ سالم : الله يسامحك اسعد شسويت بينة
علوان : بس شلون طلع من كلبة يحرك كلوبنة عليكم
ناريمان : ما لحك يتندم لان بعد 5ايام من الحادثة مات هو وعائلتة
شيخ سالم : سدو السالفة وخلينا نسوي فاتحة لعبدالله
ناريمان : لابدون فاتحة ابوية مدفون بتركيا بدال ما تسوون فاتحة نقلوه لهناه بهلمصاريف
شيخ سالم : ثنينهن نسويهن احنة عدنة خير يكفينا نسويلة فاتحة ونجيبة لهنا
سلام : ليش يصير تنقلوه وهو صايرلة سنين هناك مدفون
ناريمان : من ناحية القانون يصير ومن ناحية الدين ماعرف نسأل احسن
خابر سلام لشيخ الجامع سالة وطلع عادي
شيخ سالم : سلام ابني ضبط امور السفر الك ولسرمد ولناريمان ولعلوان وبعد متجيبوه وتدفونه هنا بديرتة نسوي الفاتحة
ناريمان .. ضلت بيبي تبجي رحتلها كعدت بصفها وحضنتها و هديتها
بعدها بشوية كامو النسوان كلهم واني وياهم رحنا كعدنا بالمطبخ يسولفن ويسالن بية واسولفلهن عن اجواء امريكا وتركيا سالتهم عن جهال المرحومة كالو نايمين ، ماحبيت اكثر اسئلة عنهم لان ماريد احد يلومني لان تخليت عنهم م̷ن رفضت ابوهم، ، شوية واتذكرت جنطتي بيها المسدس ضلت بالمضيف واكو جهال بالبيت رحتلها اركض دخلت للمضيف كاعد سلام يخابر وبيبيتي تصلي دورت ع الجنطة ماهيه واني مخليتها جنت ع القنفة كمل سلام الاتصال وحاجيتة
ناريمان : ابو اسد وين جنطتي هنا جانت ع هاي القنفة
سلام : ماعرف ماشفتها بس شبيج مخبوصة قابل تضيع
ناريمان : لا يالله وينها ضليت افتر ادور واني متوترة بعد ما كملت بيبيتي صلاة كالت لسلام مرتك اخذتها لان بنت سرمد جانت تلعب بيها فاخذتها تضمها
ناريمان : منية مرتك!! ووينها صيحها
سلام (صاح بصوت ) امل .. امل
امل : ها عيني اجيت
سلام : جنطة البنية وين
امل : ذيج بغرفتي ع الميز
نازيمان : مروتج اركضي جيبيها
امل ... راحت جابتها ركض واجتي انطتنياها ..
ناريمان .. فتحت الجنطة واني ايدي ترجف بحيث كلبت الجنطة ووكعت الغراض البيها ومن ضمنهن المسدس جان بيبي تصيح يمة بسم الله
سلام : (لكف المسدس) شيسوي هذا عندج !!!
ناريمان .. (اخذتة من وفحصتة شفتة ملعوب بي لان مسحوب اقسام ). بس فهموني منو لاعب بي وساحب اقسام!!
امل : (بخوف) اني عبالي مسدس لعبة
ناريمان : بربج هو هذا هم شكلة مسدس لعبة زين ماشفتي مبين مو نايلون ووزنة ثكيل(بعياط )
امل : وليش تعيطين قابل شصار
ناريمان : دخيل الله شكد باردة
امل : ديلا على اساس مسدس باشوات واني مادري
ناريمان :اللهم صبرج ياروح بدال ما تعتذرين جاية تصنفين شهالادب هذا!
ع الصوت اجوي بنات عمي وام محمد(زوجة سرمد) وعمتي والحجية مرت الشيخ وحور وزينب وكلهم من شافو المسدس بيدي ضلو يسالون وخايفين
امل:  لتحجين على ادبي احسن مما تشوفين شي ميعجبج
ناريمان:  اعلا مابخيلج اركبي حياتووو 😗 (بمياعة وبرودة دم)
سلام : سدي حلكج امل البنية ضيفتنه وانتي ناريمان ماكلتيلي شيسوي هذا عندج
ناريمان : شنو شيسوي عندي! سلاحي هذا شبيكم متفاجئين
سلام : اعرف سلاحج بس ليش عندج سلاح اصلا
ناريمان : اني ضابطة وهذا سلاحي الشخصي
ام عماد : ضابطة !!!
ناريمان : اي شبيكم  ضابطة
بيبيتي : لا يمة تشاقين مو
ناريمان : ل بيبيا ليش داشاقة والله صدك
حجية هيفاء : بس يايمة ماعدنا بالديرة ضابطات منين صرتي انتي ضابطة
ناريمان : بيبي اني درست خارج العراق وتوضفت  هناك بس بعدين طلبت نقلي لبغداد وهسه اشتغل بمقر هنا ببغداد وصارلي ببغداد اكثر من 5شهور
سلام : شلون خمس شهور وهسه يالله وصلتيلنا 😏
ناريمان : بعد مارحت لبيت خوالي وجدي عرفت انو انتو لا متبرين منة ولا اكو هيج حجي فاجيتكم
سلام : يلا مصار شي وضمي مسدسج اكو جهال بالبيت وانتي امل حسابج بعدين اريد اشوف شلون تلعبين بغرض مو الج وتحركي من مكانة
ناريمان : مصار شي يلا ( ضميت المسدس بالجنطة وشلت جنطتي وياي ورجعت للمطبخ رجعنا نسولف واسولفلهم شلون اتعامل وية الجنود وشلون من ادخل مداهمات وشوفتهم صور بتلفوني الي بالزي العسكري ، جان كلامي اكثرة عن الشغل لان متعجبين م̷ن انو بنية تصير ضايطة بالعراق!  )
امل :(عاوجة حلكها ) كومي ناريمان سلام يريدج بغرفتة
ناريمان : باوعتلها صفح وكمت رحت لغرفة المرحومة القديمة عبالي بيها ينتضرني، دكيت الباب محد رد فتحتها شفت البنات نايمات عرفتهن شهد وعسل رحتلهن بستهن من راسهن وهنه كعدت
عسل : بتفاجئ منو انتي😳
ناريمان : صح النوم يحلو
شهد : وين بابا 😰
ناريمان : موجود برة اني جيت لان مشتاقتلكم
عسل : ليش انتي تعرفينة !
ناريمان : اي اعرفهم واكثر مما اعرف روحي همات
شهد : انتي ناريمان مو
ناريمان :اي شمدريج باسمي
شهد : بابا جان يسولفلنا عنج وكال راح يجي يوم هي تكعدكم من النوم بدالي واحنة جنة ننتضرج تجين
ناريمان : اممم يلا لعد اجة هليوم وتحقق حلمكم بس كولولي اخوانكم وين
عسل : طالعين بالشغل
ناريمان (نصدمت ) شغليش هذا
عسل : هم ثنينهم يشتغلون بفرن مال صمون
ناريمان : جدو يدري بيهم يشتغلون !
شهد : لا ميدري لا هو ولا بابا بس ماما امل تدري
ناريمان:  اسمها امل مو ماما وليش مخليتهم يشتغلون!😠
شهد:  هي تريدهم يشتغلون لان متقبل يبقون بالبيت تكوللهم الزلم ميصير يضلون بس نايمين لازم يطلعون ويصرفون على البيت
ناريمان :(ضجت حيل شلون هلحية تخلي اطفال يشتغلون ) تمام حبيباتي كومن هسه غسلن واطلعن برة تلكن بيت عمو علوان ... (عفتهم وطلعت واني مصدومة من هلحجي يعني الاعرفة هم ممحتاجين فلوس ليش تخلون اطفال واحد 14 سنة والثاني 9سنوات يشتغلون وليش شيخ سالم ميدري بيهم معقولة قصدها تستغلهم لْـۆ فعلا تريدهم يعتمدون ع روحهم ..جنت افكر وامشي بحيث نركعت وخرت باوعت لكيت روحي مركوعة بعماد😂.. اسفة منتبهت
عماد : عادي بس انتبهي ع خطواتج لتوكعين
ناريمان : اي اوك .. (عفتة ورحت لامل.)  وين الكة سلام لان ماهو بغرفة البنات
امل:  مو بغرفة البنات هو تلكي بغرفتي فوك
ناريمان:  (متفاجئة )، بس ماكو غرفة فوك! .
امل :  من تزوجني بنة غرفتين وحدي النة ووحدة لجهالنة😎
ناريمان: ( باوعتلها صفح وصعدت شفت اكو غرفة بابها مفتوحة مبينة مال جهال يعني مو بيها رحت للثانية دكيت الباب سمعتة كال ادخل دخلت وبقيت الباب مفتوح) ... ها ابو اسد كالو ردتني
سلام : اي والله حبيت اعتذر منج عن الصار ترة امل ثولة ومتعرف تصرف ولسانها طويل
ناريمان : عادي لتهتم اساسا المثل امل مينعتب عليها 😎
سلام : 😒وبالنسبة لسلاحج اذا تحبين خلي هنا بكنتوري او جوة بغرفة البنات
ناريمان : لا خلي يمي عادي
سلام : اني علمودج حتى تاخذين راحتج ومتضايقين بوجودة بجنطتح
ناريمان : اممم ماشي لعد ... طلعته من جنطتي ونطيتهيا ونطيتة الطلق ... صدك اني شايلتة من بغداد لبيت عمي علوان  ومن بيت عمي لهنا والف سيطرة وتفتيش بس محد حس بوجودة
سلام : يمعودة سيطراتنة خرطي
ناريمان 😂😂😂 خوش امان بهلبلد لو ماشية بيدي حزام ناسف محد يحس
سلام : هههه هنا اهم شي متكولين اني شايلة حزام محد يحس 😂
ناريمان:  😂😂😂
دخلت امل بس نضرتها معجبتني حيل
امل : اوووو الله يديم الضحكة عليكم
ناريمان : يلا اني استاذين .نزلت وضليت كاعدة بالمطبخ يمي شهد وعسل كاعدات بحضني فتحت جنطي طلعت 400الف انطيتها لشهد
شهد : شكرا ..وباستني
ناريمان : يعمري انتي ..بستها .. شوفي هاي الفلوس الج ولاخوانج كل واحد 100
عسل : احنة 6 مو 4 ☹
ناريمان : باوعت لام محمد اريدها تفسرلي
ام محمد : اي شبيج نسيتي ابوهم مزوج امل وعندة منها طفلين
ناريمان : ها اي والله نسيت ... حبيبتي هاي الكم انتي وشهد وفهد واسد واني عود من اشوف اخوانج الباقين انطيهم فلوسهم
عسل باستني وراحت تركض وابوها جان واكف بالباب بس بس يباوع مجنت منتبهة لوجودة
سلام : ليش كلفتي روحج اني ما مقصر عليهم بشي
ناريمان : حتلو هم مثل ولدي بعدين خليهم يفرحون خطية ... اممم صدك ابو اسد وين اسد وفهد
امل : طالعين يلعبون طوبة
ناريمان : اها ويومية يرحون يلعبون طوبة
سلام : اي يومية بس هسه راح ادز فيصل يصيحهم
ناريمان : اي والله تسوي فضل واذا ما لكاهم بالملعب احتمال يلكاهم بفرن الصمون .. احجي واباوع ع امل جانت وراه واكفة
سلام : شيوديهم لفرن الصمون
امل : (بخوف) مو صاحب الفرن يحبهم وهم يضلون يمة اغلب الوقت
ناريمان : صدك سلام شعجب ما تخليهم يشتغلون يم ابو الصمون فد مرة
سلام : شنو السالفة تراهم صغار وبعدين ميحتاجون شغل الفلوس كافية ووافية خير من الله
ناريمان : الله يزيدكم يارب
راح سلام وضلت امل ترجف اخر شي كالتلي تعاي اريد احجي وياج رحت وياها
امل : منو كلج الولد بفرن الصمون
ناريمان : اني من اجيتكم مريت للفرن وشفتهم بس معرفتهم ومن دخلت لغرفة امهم شفت صورهم وتذكرت
امل : يعني مو شهد وعسل الكالن وانتي ضليتي تذبين بسامير كبال سلام
ناريمان : اي حبيبتي شهد وعسل الحجن واني ما ذبيت بسامير، لا عيب اني من احجي احجي طك بطك بس حبيت انطيج فرصة تعدلين تعاملج وياهم
امل : ليش بشنو مقصرة وياهم
ناريمان : بكلشي 😒 م̷ـــِْن ملابسهم المبهذلة لحد شعرهم المخربط لصحتهم لنومهم ولكعدهم كلشي كلشي
امل : انشالله راح اغير معاملتي بس لتحجين لسلام
ناريمان : سهله عود اذا يحتاج الوضع احجيلة راح احجي واعذريني ساعتها بس ذولة مثل ولدي وما انلام اذا اخلي سلام ياكلج بسنونة
امل : لا مراح يحتاج تكوليلة لان مراح يكون خاطرج الة طيب
ناريمان : اتمنى يكون كلامج صحيح ... (ضليت يومين يمهم طبعا كل ما يسمع بخير وجودي  احد يجينا واني اضل اعيد واسرد بقصتنا ودخيل الله شكد حجيت خلال هلايام هاي
المهم رجعت لبيتي لبين ما تكمل امور الحجز من كلت لخوالي مقبلو اروح اذا مو واحد بيهم وياي المهم بالاخير امين كال اني اروح وياها لتركيا وخلصت اجازتي رجعت للمقر واني ماعرف حسبة توديني وحسبة تجيبني القضايا مختلطة ببعضها واكتشفت الضباط الوياي نصهم جانو يشتغلون لغاياتهم الشخصية وبدال ما يحققون يروحون يضربون كاس وية المجرم وياخذون فلوس حتى يذبون ناس مالهم ذنب بالسجون ويضلون رهن التحقيق والتعذيب لسنين طويلة ولو يطلعون لو يبقون بالسجن طول عمرهم .. المهم مشت ايام وجان لازم عكب باجر سفرنا اخذت اجازة مفتوحة ورحت لبيت جدو بالاول ضليت هناك طبعا حيل بالي ممطمن وبالي مشغول حتى خالتي اسراء لاحضت وسالتني ليش اصفن ودايخة رغم المفروض اكون مرتاحة راح اجيب ابوية وادفنة بين اهلة وناسة بس كدرت اقنعها انو ماكو شي عادي بس قلقة علمود السفر ومابينتلها شي سديت الموضوع وحطيت مسدسي والرخصة مالتة وكم حاجة مهمات يمها امانة وطلعت وية امين بسيارتة لبيت الشيخ سالم هناك عمي وسلام وسرمد ينتضرونا )
امين : اذا اسألج تجاوبين
ناريمان : حسب السؤال
امين : سلاحج ليش دائما وياج
ناريمان : اممم ليش تريد تعرف
امين :يعني عادي مجرد فضول
ناريمان : اذا فضول ميحتاج اكول
امين : واذا اهتمام وحرص وخوف عليج !!
ناريمان : اذا هيج اكول بس بشرط يبقى بيناتنه
امين : اي اكيد كولي
ناريمان : ببساطة قبل فترة واحد م̷ـــِْن المتهمين نحكم بسبيي وضل يهدد بية بس ماخذت تهديدة ع عين الاعتبار،  هو امور فساد ومن هذا الحجي، دزلي كم واحد من جراوتة يخطفوني وواحد بيهم دخل لنص بيتنة ومحد حماني منة غير مسدسي
امين:  شنو قضيتة وشنو حكمة
ناريمان: قتل وخطف  اعدام
امين: يستاهل النذل
نزلنة لبيت الشيخ طلع سرمد استقبلنة
سرمد :(كال لابنة محمد روح للبيت سوي طريق  اجانة ضيف) .. تفضلو نورتونا
امين : منور بصحابة
ناريمان : عمو سرمد هذا امين ابن خالي سامي .. امين هذا عمو سرمد ابن عم بابا وبمقام ابوية
(تسالمو بيناتهم )
سرمد: لعد وين ابوك شعجب ما اجة وياكم
امين : غير مرة انشالله
سرمد حياكم بالمضيف تفضلو ... كعدنا وضلو يسولفون شوي واجة سلام سلم وكعدنا كمت من يمهم فشلة ابقة البنية الوحيدة بين الزلم دخلت للنسوان بالمطبخ لكيتهم مخبوصين
ناريمان : شسالفة اشوفكم مخبوصين
ام محمد : اي مو غير ابن خالج هنا ولازم انكوم بواجبة
ناريمان : يمعودين شكو هلخبصة هو كلة نفر واحد
ام محمد : مهما يكون اول مرة يجي لهنا لازم نكوم بواجبة ولتنسين بيت عمج علوان وبيبيتج ع جية وهسه انتي روحي للبنات جانن فرحانات م̷ـــِْن عرفن راح تجين  بس نعسن ونامن خطية من يشوفنج راح يفرحن
ناريمان : اوي فدوة كليباتي هسه رايحتلهن .. رحتلهن لكيتهن نايمات ع جربايتهن كمت العب بوجهن هيج اخلي شعري ع وجهن لو امشي اصبعي ع خدودهن بحيث ثنينهن كعدن
شهد : واخيرا اجيتي اشتاقيتلج
ناريمان (اخذتهن بحضني) يروحي انتي واني هم اشتاقيتلج واشتاقيت لعسولتي ولاخوانكم
عسل: بعد مترحين من يمنة كلة تبقين يمنة
ناريمان : اممم ليش ترديني ابقة
عسل: حتى اخواني ميرحون للشغل ويجون تعبانين وماما امل متضربنا
ناريمان : ام لسان لتخافين محد يضربكم واذ تضربكم كولو لبابا عليها ومن اجيكم اني كلولي عليها
شهد : واذا ماجيتي 😢
ناريمان :(طلعت من جنطتي ايبادات4  ونطيتهميا كمزن حضنني ويبوسن بية ) ذني الايبادات الكم كلكم كل واحد ايبادة تتونسون بيهن وهم اذا ما اجيت وتاخرت عليكم تفتحون الايباد مالتكم تلكون صفحات فيسبوك كل واحد مسويتلة صفحة باسمة تدكون عليه وتكولولي كلشي يصير وياكم
شهد: شكرااا خالة
ناريمان : يروحي عفوا واني مو خالة اني بس ناريمان
عسل : ناريمان
ناريمان : عيونها
عسل: احبج ☹
ناريمان :(حضنتها) عمري انتي واني اموت علبكم كلكم،، يلا كومو خلي ندور على اخوانكم نشوفهم وينهم
شهد : اني اندلهم يلعبون بلي بغرفة بيبي
ناريمان : يلا لعد انتو روحو ودولهم الايبادات واني رايحة لام محمد بالمطبخ
شهد .عسل : اي
رحت لام محمد شفت امل وبناتها ثنين كبار واكفات يمها يساعدنها ومرة ثانية معرفتها طلعت مرة تساعدهم من يجيهم خطار تشتغل وياهم
ناريمان : ام محمد بلا زحمة ممكن سؤال
ام محمد : اي اكيد كولي حبيبتي
ناريمان : اسد وفهد بعدهم يطلعون من البيت مثل كبل !
(امل عافت البيدها وضلت تباوع علية بطريقة استغراب)
ام محمد : لا قليل يطلعون بس ليش تسالين
ناريمان (باوعت صفح ع امل) لا هيج بس داكول ممعقول ميفيد الحجي
ام محمد (باستغراب) يا حجي هذا
ناريمان : لا هيج لتهتمين المهم خلوني اساعدكم
ام محمد : لا عوفي من ايدج كملنة مبقالنة شي هسه نكمل
(اجة فهد يركض باسني من خدي )
فهد : شكرااا ع الايباددد
ناريمان : يروحي انت لو ادري هلكد يفرحك من زمان اجيبلكياه
ام محمد : ليش كلفتي ع روحج
ناريمان : لا كلافة ولا شي ذولة قطعة من روحي وسعدتهم من سعادتي خليهم يفرحون
ام محمد : الله ليحرمكم من بعض
ناريمان : امين يارب ... شفت اسد واكف اباب المطبخ بس مدنك راسة وبيدة الايباد مالتة .... ها اسودي معجبتك الهدية !!
اسد : لا عجبتني حيل بس اني ماريد اخذة
ناريمان : ليش حبيبي ابالك شي ثاني اجيبلكياه!
اسد : لا اني ما اريد اخذ هداية
ناريمان : ليش متاخذ شبيك
اسد : اني اكدر اشتغل واجيب ايباد الي ما اريد اخليج تصرفين علية
ناريمان: بس انت بهالوقت ميصير تشتغل بعدك صغير وراك دراسة ومستقبل عود من تكبر وتتوضف جيب لروحك شكد متريد بس هسه هذا الايباد هدية والهدية مترفض
اسد : بس انتي مرية وعيب المرة تصرف ع الزلم
ناريمان (ضحكت) انت شتعتبرني
اسد : خالتي
ناريمان : خليني صديقتك مو خالتك .واعتبر هاي الهدية من صديقتك تعبرلك بيها شكد هي تحبك وتعزك وعدها اهم شي بالدنيا ضحكتك انت واخوانك .. ساعتها ترفض الهدية لو تقبلها !!
اسد : (ابتسم) اقبلها
ناريمان  : هاهيه لعد اخذة وافتحة تلكاني منزلتلك بي برامج عن طريقهن نتواصل اني وياكم بس اريد منك وعد انو متخلي الايباد يلهيكم عن دراستكم انت واخوانك 
اسد : اي اوعدج
ناريمان (كرصت خدودة) عفية حبيبي
اسد : شكرا ع الايباد
ناريمان : عفوا عمري انت ... من راح اسد سالت ام محمد عن تصرفة جان شوية غريب
ام محمد : هو هيج ما يوم يرضة احد بينة يصرف علية يكول اني رجال ما اقبل احد يصرف علية بس ابوية
ناريمان : اوي فدوة كلبي اي والله رجال صغير
امل : بس مو هواي 4 ايبادات لو جايبتلهم واحد الهم يتشاركون بي احسن مما تصرفين فلوس 4 ايبادات سوة

ناريمان : لٱ مو هواي ليش استكثر عليهم الايبادات واني عندي فلوسهن ومن زمان جانت عندي فكرة اجيبلهم ها نسيت انطيج ايباد لولدج(طلعتة نطيتهيا)
امل : شكرا 😏
ناريمان : عفوا 😒
سلام : ناريمان ابن خالج يريدج 😒
ناريمان : تمام رايحتلة ..ها امين
امين: ولج اريد اروح للتواليت وفشلة من الجماعة اكوللهم اريد ادخل للتواليت واني مصارلي ساعة من جيتهم
ناريمان : يبو شكد تفيك انت  تمام تعال وياي ... (التواليت صاير بالكلدور والكلدور واسع حيل وصايرة كبال التواليت باب المطبخ وبصف المطبخ غرفة المرحومة وبصفها باقي الغرف بعد ما دليت امين التواليت دخل  واني اتجهت للمطبخ بس قبل لا ادخل باب المطبخ جرني واحد دخلني لغرفة المرحومة وسد الباب )
ناريمان : ها ها خيرك جارني هيج
سلام : شيريد منج ابن خالج 😒
ناريمان : كلي يريد يروح للتواليت
سلام : وليش مكلي اني ادلي ع التواليت
ناريمان : استحة منك 😒😒
سلام : وهو هيج عندة ميانة وياج بحيث انتي التودي للتواليت
ناريمان : اي لان بنت عمتة مو غريبة عنة وكافي تحقيق😠) شسالفتك نازل بية تحقيقات
سلام : اللهم صبرج ياروح يالله طلعي
ناريمان : اللهم ثبت علينة العقل والدين
سلام : شكلتي !!
ناريمان : مكلت شي .. طلعت واني اضحك هذا شبي معقول بعدة حاطني ابالة ويغار من امين 😂 والله مخابيل من جهة سلام ومن جهة عماد والله يستر من الجاي 😂 .. اجوي بيت عمي وضليت وية البنات حور وزينب لبين ما صبو الاكل زلم وحد ونسوان وحد لان سلام ميقبل سوة وامين موجود المهم بعد الاكل رحت يم عمي والشيخ وامين وعماد وعبود  كعدت اسولف وجتي حجية هيفاء وعمتي ام عماد وام محمد وامل والبنات هم كعدن يمي شوية واجة سلام